హెచ్-1బీ వీసా నిబంధనల్లో భారీ మార్పులు.. విద్యార్థులపై ప్రభావం

అమెరికా ప్రభుత్వం హెచ్-1బీ (H-1B) వీసా వ్యవస్థలో పలు కీలక మార్పులను ప్రతిపాదించింది. అమెరికా కార్మిక శాఖ (Department of Labor), అంతర్గత భద్రతా శాఖ (DHS), విదేశాంగ శాఖ (State Department) తాజా నియంత్రణ ప్రణాళికల ప్రకారం, హెచ్-1బీ వీసా విధానాన్ని మరింత కఠినతరం చేయడం, అమెరికా ఉద్యోగాలకు స్థానికులకు అధిక ప్రాధాన్యం ఇవ్వడం, విదేశీ ఉద్యోగుల నియామకాలను మరింత కట్టుదిట్టంగా పర్యవేక్షించడం లక్ష్యంగా ఈ మార్పులు ప్రతిపాదించబడ్డాయి. ఈ ప్రతిపాదనలు ముఖ్యంగా భారతీయ ఐటీ నిపుణులు, అంతర్జాతీయ విద్యార్థులు, హెచ్-4 వీసాదారులు, అమెరికాలో ఉద్యోగ అవకాశాల కోసం ఎదురుచూస్తున్న వేలాది మందిపై ప్రభావం చూపే అవకాశముంది ప్రతిపాదిత మార్పుల్లో ప్రధాన అంశం హెచ్-1బీ వీసాల అర్హత ప్రమాణాలను మరింత కఠినతరం చేయడం. అమెరికా కార్మిక శాఖ, ఉద్యోగాలకు చెల్లించే వేతన ప్రమాణాలను (Prevailing Wage Levels) పెంచాలని ప్రతిపాదించింది. దీని ఉద్దేశం తక్కువ వేతనాలతో విదేశీ ఉద్యోగులను నియమించి అమెరికన్ ఉద్యోగులను భర్తీ చేసే పరిస్థితులను తగ్గించడం. అధిక నైపుణ్యం, అధిక వేతనం కలిగిన ఉద్యోగాలకు మాత్రమే హెచ్-1బీ వీసాలు ప్రాధాన్యం పొందేలా వ్యవస్థను రూపొందించే ప్రయత్నం జరుగుతోంది.

మరో కీలక ప్రతిపాదన హెచ్-1బీ దరఖాస్తులను మరింత కఠినంగా పరిశీలించడం. యజమానులు నిజంగా ప్రత్యేక నైపుణ్యం అవసరమైన ఉద్యోగాలకే విదేశీ ఉద్యోగులను నియమిస్తున్నారా అనే అంశంపై అధిక తనిఖీలు నిర్వహించాలని ప్రభుత్వం భావిస్తోంది. ఉద్యోగ వివరణలు, వేతన వివరాలు, నియామక అవసరాలు వంటి అంశాలపై మరింత లోతైన పరిశీలన జరగనుంది. దీంతో దరఖాస్తుల పరిశీలన సమయం కూడా పెరిగే అవకాశం ఉందని నిపుణులు చెబుతున్నారు