సీషెల్స్ జాతీయ వేడుకల్లో భారత సైన్యం సత్తా

సీషెల్స్ జాతీయ దినోత్సవ స్వర్ణోత్సవ వేడుకల్లో భారత సైన్యం, నౌకాదళం పాల్గొనడం రెండు దేశాల మధ్య ఉన్న బలమైన స్నేహానికి ప్రతీకగా నిలిచింది. ప్రధానమంత్రి నరేంద్ర మోదీ సీషెల్స్ పర్యటన సందర్భంగా విక్టోరియాలో జరిగిన వేడుకల్లో భారత సైన్య దళం, భారత నౌకాదళ మార్చింగ్ బ్యాండ్‌తో పాటు రెండు భారత నౌకాదళ నౌకలు పాల్గొన్నాయి. భారత నౌకలు తార్కాష్, ఇక్షక్ పోర్ట్ విక్టోరియాకు చేరుకుని వేడుకల్లో భాగమయ్యాయి సీషెల్స్ స్వాతంత్ర్య స్వర్ణోత్సవానికి భారత ప్రతినిధుల హాజరు కేవలం ఆచారపరమైన కార్యక్రమం మాత్రమే కాకుండా, హిందూ మహాసముద్ర ప్రాంతంలో భారత్‌కు ఉన్న వ్యూహాత్మక ప్రాధాన్యాన్ని కూడా చాటిచెప్పింది. సముద్ర భద్రత, రక్షణ సహకారం, సామర్థ్య నిర్మాణం, వాణిజ్య మార్గాల రక్షణ వంటి అంశాల్లో భారత్‌–సీషెల్స్ భాగస్వామ్యం మరింత బలపడుతోందని ఈ వేడుకలు స్పష్టంచేశాయి. ప్రధాని మోదీ సీషెల్స్ పార్లమెంట్‌లో చేసిన ప్రసంగంలో హిందూ మహాసముద్రం రెండు దేశాలను కలిపే జీవన బంధమని పేర్కొన్నారు.

భారత దళాలు సీషెల్స్ జాతీయ పరేడ్‌లో పాల్గొనగా, అక్కడి ప్రజలు ఘనంగా స్వాగతించారు. సీషెల్స్ జాతీయ పతాకంతో చేసిన ప్రత్యేక ప్రదర్శనలు, సైనిక విన్యాసాలు, సాంస్కృతిక కార్యక్రమాలు వేడుకలకు ప్రత్యేక ఆకర్షణగా నిలిచాయి. ఈ కార్యక్రమంలో భారత దళాల పాల్గొనడం ద్వారా రెండు దేశాల మధ్య సైనిక, దౌత్య, ప్రజా సంబంధాలు మరింత బలపడినట్లు అధికారులు పేర్కొన్నారు.

హిందూ మహాసముద్ర ప్రాంతంలో సీషెల్స్ భారతదేశానికి కీలక భాగస్వామి. సముద్ర మార్గాల భద్రత, అక్రమ రవాణా నియంత్రణ, సముద్ర దోపిడీ నిరోధం, విపత్తు స్పందన వంటి అంశాల్లో రెండు దేశాలు కలిసి పనిచేస్తున్నాయి. తాజాగా జాతీయ దినోత్సవ వేడుకల్లో భారత సైన్యం, నౌకాదళం పాల్గొనడం ఈ వ్యూహాత్మక స్నేహానికి మరో ఉదాహరణగా నిలిచింది.