ఉద్ధవ్‌కు మరో దెబ్బ.. షిండే శివసేనలోకి సచిన్ అహిర్

మహారాష్ట్ర రాజకీయాల్లో ఉద్ధవ్ ఠాక్రే నేతృత్వంలోని శివసేన యూబీటీకి మరో పెద్ద ఎదురుదెబ్బ తగిలింది. పార్టీ ఎమ్మెల్సీ సచిన్ అహిర్ ఏక్‌నాథ్ షిండే నేతృత్వంలోని శివసేన వైపు మళ్లారు. ఆయన మహారాష్ట్ర శాసన మండలి ఉపాధ్యక్ష పదవికి మహాయుతి అభ్యర్థిగా నామినేషన్ దాఖలు చేయడం ఈ రాజకీయ మార్పుకు స్పష్టమైన సంకేతంగా మారింది. ఈ నామినేషన్ సమయంలో ముఖ్యమంత్రి దేవేంద్ర ఫడ్నవీస్, ఉప ముఖ్యమంత్రులు ఏక్‌నాథ్ షిండే, సునేత్రా పవార్ హాజరుకావడం ఈ పరిణామానికి మరింత ప్రాధాన్యం తెచ్చింది సచిన్ అహిర్ సాధారణ నాయకుడు కాదు. ఆయన ఆదిత్య ఠాక్రేకు సన్నిహితుడిగా, ముఖ్యంగా వోర్లీ నియోజకవర్గంలో యూబీటీ బలాన్ని పెంచడంలో కీలక పాత్ర పోషించిన నాయకుడిగా గుర్తింపు పొందారు. గతంలో నేషనలిస్ట్ కాంగ్రెస్ పార్టీలో ఉన్న అహిర్, 2019లో అవిభాజిత శివసేనలో చేరారు. 2022లో ఆయనకు ఎమ్మెల్సీ పదవి దక్కింది. అలాంటి నాయకుడు ఇప్పుడు షిండే శిబిరం వైపు వెళ్లడం ఉద్ధవ్ వర్గానికి రాజకీయంగా గట్టి దెబ్బగా భావిస్తున్నారు

ఈ పరిణామం కొద్ది రోజుల క్రితం ఆరుగురు శివసేన యూబీటీ లోక్‌సభ ఎంపీలు షిండే వర్గంలో చేరిన తర్వాత జరగడం మరింత చర్చనీయాంశమైంది. ఇప్పటికే పార్టీ బలహీనపడుతోందనే చర్చల మధ్య సచిన్ అహిర్ నిర్ణయం ఉద్ధవ్ ఠాక్రే నాయకత్వానికి మరో సవాల్‌గా మారింది. మహారాష్ట్రలో శివసేనలో అంతర్గత విభజన ఇంకా పూర్తిగా ముగియలేదని, నాయకుల మార్పులు కొనసాగుతున్నాయని ఈ సంఘటన చూపిస్తోంది.

సచిన్ అహిర్ శాసన మండలి ఉపాధ్యక్ష పదవికి నామినేషన్ దాఖలు చేయడం కేవలం వ్యక్తిగత రాజకీయ నిర్ణయం మాత్రమే కాదు. ఇది మహాయుతి శిబిరం శాసన మండలిలో తన ప్రభావాన్ని పెంచుకునే వ్యూహంలో భాగంగా కనిపిస్తోంది. మహాయుతి అభ్యర్థిగా ఆయనను ముందుకు తేవడం ద్వారా షిండే శివసేన, బీజేపీ, మిత్రపక్షాలు శాసన మండలిలో కీలక స్థానాన్ని తమవైపు తిప్పుకునేందుకు ప్రయత్నిస్తున్నాయి. ఈ ఎన్నిక జూలై 1న జరగనుంది