మెక్సికో అభిమానుల అర్ధరాత్రి హంగామా.. ఈక్వడార్ జట్టుకు ఇబ్బందులు

ఫిఫా ప్రపంచకప్ 2026 నాకౌట్ దశలో మెక్సికో–ఈక్వడార్ మధ్య జరిగే రౌండ్ ఆఫ్ 32 మ్యాచ్‌కు ముందు ఉద్రిక్త వాతావరణం నెలకొంది. మ్యాచ్‌కు కొన్ని గంటల ముందు మెక్సికో అభిమానులు వందల సంఖ్యలో ఈక్వడార్ జట్టు బస చేసిన హోటల్ బయటకు చేరుకుని రాత్రంతా డప్పులు, ఎయిర్ హార్న్లు, లౌడ్‌స్పీకర్లు, నినాదాలతో భారీ హంగామా సృష్టించారు. ప్రత్యర్థి జట్టు ఆటగాళ్లకు విశ్రాంతి లేకుండా చేయాలనే ఉద్దేశంతో ఈ చర్యకు పాల్పడ్డారని అంతర్జాతీయ మీడియా పేర్కొంది.

సోషల్ మీడియాలో వైరల్ అయిన వీడియోల్లో అర్ధరాత్రి తర్వాత కూడా అభిమానులు హోటల్ బయట పెద్ద ఎత్తున చేరి నిరంతరం శబ్దాలు చేస్తూ కనిపించారు. డప్పులు మోగించడం, వాహనాల హార్న్లు మోగించడం, గట్టిగా నినాదాలు చేయడం ద్వారా ఈక్వడార్ ఆటగాళ్ల నిద్రకు భంగం కలిగించే ప్రయత్నం జరిగినట్లు తెలుస్తోంది. కొన్ని వీడియోల్లో హోటల్ గదుల కిటికీల నుంచి ఈక్వడార్ ఆటగాళ్లు బయట పరిస్థితిని గమనిస్తున్న దృశ్యాలు కూడా కనిపించాయి

ఈ మ్యాచ్‌కు ముందు ఇరు జట్లపై భారీ అంచనాలు ఉన్నాయి. సహ ఆతిథ్య దేశమైన మెక్సికో గ్రూప్ దశలో అద్భుత ప్రదర్శన చేస్తూ మూడు మ్యాచ్‌ల్లోనూ విజయం సాధించి ఒక్క గోల్ కూడా ఇవ్వకుండా నాకౌట్ దశకు చేరుకుంది. మరోవైపు ఈక్వడార్ జట్టు గ్రూప్ దశలో నాలుగుసార్లు ప్రపంచ ఛాంపియన్ అయిన జర్మనీని సంచలనంగా ఓడించి రౌండ్ ఆఫ్ 32కు అర్హత సాధించింది. దీంతో ఈ మ్యాచ్‌పై ప్రపంచవ్యాప్తంగా ఆసక్తి నెలకొంది.

మెక్సికో అభిమానుల ఈ చర్యపై క్రీడా వర్గాల్లో మిశ్రమ స్పందన వ్యక్తమవుతోంది. కొందరు దీన్ని ఫుట్‌బాల్ అభిమానుల ఉత్సాహంగా అభివర్ణిస్తుండగా, మరికొందరు ప్రత్యర్థి జట్టు విశ్రాంతికి భంగం కలిగించే ప్రయత్నం క్రీడాస్ఫూర్తికి విరుద్ధమని అభిప్రాయపడుతున్నారు. అంతర్జాతీయ టోర్నీల్లో గతంలో కూడా ఇలాంటి ఘటనలు చోటుచేసుకున్నప్పటికీ, ప్రపంచకప్ వంటి అత్యున్నత వేదికపై మళ్లీ పునరావృతం కావడం చర్చకు దారితీసింది.