ఇన్‌స్టాగ్రామ్‌లో బాలల లైంగిక దుర్వినియోగ ప్రకటనలపై ఆందోళన

సోషల్ మీడియా వేదికలలో కంటెంట్ నియంత్రణపై మరోసారి తీవ్ర ఆందోళనలు వ్యక్తమవుతున్నాయి. ప్రముఖ సోషల్ మీడియా ప్లాట్‌ఫారమ్ ఇన్‌స్టాగ్రామ్లో భారత్‌లో బాలల లైంగిక దుర్వినియోగానికి సంబంధించిన (Child Sexual Abuse Material - CSAM) కంటెంట్‌ను ప్రోత్సహించే ప్రకటనలు నడుస్తున్నాయని BBC Eye పరిశోధన వెల్లడించింది. ఈ విషయం ప్రపంచవ్యాప్తంగా డిజిటల్ సేఫ్టీ, ఆన్‌లైన్ మోడరేషన్ వ్యవస్థలపై పెద్ద చర్చకు దారితీసింది. BBC వరల్డ్ సర్వీస్ గుర్తించిన ప్రకటనల్లో “rape video”, “child video” వంటి పదాలను ఉపయోగించి వినియోగదారులను ఆకర్షించే ప్రయత్నం చేసినట్లు తేలింది. ఈ ప్రకటనలు వినియోగదారులను మెసేజింగ్ యాప్ టెలిగ్రామ్లోని చానెల్స్‌కు తీసుకెళ్లి, అక్కడ అతి తక్కువ ధరకు—సుమారు 99 రూపాయల (దాదాపు 1 డాలర్)కే—అటువంటి అక్రమ కంటెంట్‌ను విక్రయిస్తున్నట్లు BBC వెల్లడించింది.ఇన్‌స్టాగ్రామ్‌లో ప్రకటనలు సాధారణంగా ప్రచురించబడే ముందు మోడరేషన్ టెక్నాలజీ ద్వారా సమీక్షించబడతాయి. అయినప్పటికీ, ఈ ప్రకటనలు ప్లాట్‌ఫారమ్‌లో కనిపించడం కంటెంట్ ఫిల్టరింగ్ వ్యవస్థపై ప్రశ్నలు లేవనెత్తుతోంది. ఆటోమేటెడ్ మోడరేషన్ వ్యవస్థలు ఇలాంటి సున్నితమైన కంటెంట్‌ను గుర్తించడంలో విఫలమవుతున్నాయా అనే అంశంపై నిపుణులు ఆందోళన వ్యక్తం చేస్తున్నారు.

BBC ఒక ప్రకటనను ఇన్‌స్టాగ్రామ్‌కు రిపోర్ట్ చేసిన తర్వాత, 24 గంటలలో ప్లాట్‌ఫారమ్ ఆ పోస్టు తమ కమ్యూనిటీ గైడ్‌లైన్స్‌ను ఉల్లంఘించలేదని ప్రారంభంలో స్పందించింది. ఇది మరింత వివాదాస్పదంగా మారింది. అయితే తర్వాత BBC ప్రశ్నించిన తర్వాత, ఇన్‌స్టాగ్రామ్ మాతృసంస్థ మెటా (Meta) స్పందిస్తూ కొన్ని ప్రకటనలను తొలగించినట్లు, సంబంధిత ఖాతాలను నిలిపివేసినట్లు తెలిపింది.