ప్రముఖ సంగీత దర్శకుడు ఇళయరాజాకు సంగీత హక్కుల వివాదంలో మరోసారి ఢిల్లీ హైకోర్టులో ఎదురుదెబ్బ తగిలింది. తాను స్వరపరిచిన పాత పాటల యాజమాన్య హక్కులకు సంబంధించిన కేసులో గతంలో ఇచ్చిన మధ్యంతర ఉత్తర్వులను కోర్టు కొనసాగిస్తూ తాజా నిర్ణయం వెల్లడించింది.
ఈ కేసులో13 ఫిబ్రవరి న కోర్టు విధించిన స్టేను తాజాగా కూడా కొనసాగించింది. దీంతో వివాదంలో ఉన్న కొన్ని పాటలను ఇళయరాజా తన అనుమతితో వినియోగించుకోవడంపై ఇప్పటికీ పరిమితులు కొనసాగుతున్నాయి. ఈ పరిణామం సినీ, సంగీత వర్గాల్లో చర్చనీయాంశమైంది.
ఈ వివాదానికి మూలం గతేడాది విడుదలైన తమిళ చిత్రం ‘అగత్యా’. ఈ సినిమాలో ‘ఎన్ ఇనియా పొన్నిలావే’ పాటను ఇళయరాజా తనయుడు యువన్ శంకర్ రాజా కొత్తగా రీక్రియేట్ చేశారు. అదే అంశం సంగీత హక్కులపై కొత్త వివాదానికి దారితీసింది.
1976 నుంచి 2001 మధ్య ఇళయరాజా సంగీతం అందించిన మొత్తం 134 చిత్రాల ఆడియో హక్కులు తమ వద్దే ఉన్నాయని సరిగమ సంస్థ కోర్టులో వాదించింది. ఆ ఒప్పందాల ప్రకారం పాటల వినియోగ హక్కులు తమకే వర్తిస్తాయని సంస్థ పేర్కొంది.
మరోవైపు ఆ పాటలపై తనకే యాజమాన్య హక్కులు ఉండాలని ఇళయరాజా కోర్టును ఆశ్రయించారు. తాను స్వరపరిచిన సంగీతాన్ని వినియోగించే హక్కు తనకే ఉండాలని ఆయన తరఫు న్యాయవాదులు వాదనలు వినిపించారు.
అయితే ఇరు పక్షాల వాదనలు పరిశీలించిన ఢిల్లీ హైకోర్టు ప్రస్తుతం సరిగమ సంస్థ వాదనలకు ప్రాధాన్యం ఇచ్చింది. దీంతో గతంలో విధించిన స్టేను కొనసాగించాలని నిర్ణయించింది. తుది తీర్పు వచ్చే వరకు ప్రస్తుత పరిస్థితి కొనసాగనుంది.
ఇళయరాజా గతంలో తన పాటలను అనుమతి లేకుండా ఉపయోగించిన వారిపై పలుమార్లు కోర్టును ఆశ్రయించారు. పలు సందర్భాల్లో కాపీరైట్ ఉల్లంఘన కేసులు నమోదు చేసి నష్టపరిహారం కూడా కోరారు. ఈ నేపథ్యంలో ఇప్పుడు అదే సంగీత హక్కుల అంశంలో ఆయనకు ఎదురుదెబ్బ తగలడం విశేషంగా మారింది.
సంగీత హక్కులు, కాపీరైట్లకు సంబంధించిన ఈ కేసు దక్షిణ భారత సినీ పరిశ్రమలో కీలకంగా మారింది. భవిష్యత్తులో పాత పాటలను రీమిక్స్ చేయడం, రీక్రియేట్ చేయడం, ఇతర చిత్రాల్లో ఉపయోగించడం వంటి అంశాలపై ఈ కేసు ప్రభావం చూపే అవకాశం ఉందని న్యాయ నిపుణులు భావిస్తున్నారు.
సినీ పరిశ్రమలో సంగీత హక్కులపై అవగాహన పెరుగుతున్న నేపథ్యంలో ఈ వివాదం మరింత ప్రాధాన్యం సంతరించుకుంది. నిర్మాతలు, సంగీత దర్శకులు, రికార్డు సంస్థల మధ్య కుదిరే ఒప్పందాల విలువను కూడా ఈ కేసు మరోసారి గుర్తు చేస్తోంది.
ప్రస్తుతం ఈ వ్యవహారంపై తుది తీర్పు వెలువడాల్సి ఉంది. అప్పటి వరకు ఢిల్లీ హైకోర్టు ఇచ్చిన మధ్యంతర ఉత్తర్వులే అమల్లో ఉంటాయి. దీంతో ఇళయరాజా కోరిన పూర్తి యాజమాన్య హక్కుల అంశంపై తుది నిర్ణయం వచ్చే వరకు వేచి చూడాల్సిన పరిస్థితి ఏర్పడింది.
