‘నన్ను గుర్తుందా?’ కేజ్రీవాల్‌పై పర్వేశ్ వర్మ వ్యంగ్యం

రామమందిర విరాళాల వివాదం దేశ రాజకీయాల్లో తీవ్ర చర్చకు దారితీస్తున్న వేళ, ఈ అంశంపై అధికార, ప్రతిపక్ష పార్టీల మధ్య మాటల యుద్ధం మరింత ముదిరింది. ఆమ్ ఆద్మీ పార్టీ జాతీయ కన్వీనర్ అరవింద్ కేజ్రీవాల్, భారతీయ జనతా పార్టీ జాతీయ అధ్యక్షుడు నితిన్ నబిన్‌పై చేసిన వ్యాఖ్యలకు ఢిల్లీ మంత్రి పర్వేశ్ వర్మ ఘాటుగా స్పందించారు. "జాతీయ అధ్యక్షుడు పెద్ద పదవి, కానీ నన్ను మాత్రం గుర్తుందా?" అంటూ కేజ్రీవాల్‌ను ఎద్దేవా చేశారు. దీంతో ఈ రాజకీయ వివాదం మరింత వేడెక్కింది వివాదానికి ఆరంభం బీజేపీ నిర్వహించిన ఒక కార్యక్రమంలో నితిన్ నబిన్ చేసిన వ్యాఖ్యలతో మొదలైంది. లక్నోలో జరిగిన సభలో ఆయన కాంగ్రెస్ నేత రాహుల్ గాంధీ, సమాజ్‌వాదీ పార్టీ నాయకుడు అఖిలేశ్ యాదవ్, ఆమ్ ఆద్మీ పార్టీ అధినేత అరవింద్ కేజ్రీవాల్‌లను ఉద్దేశించి మాట్లాడారు. హిందూ మతాన్ని ప్రజలు అంత బలహీనంగా భావించరని, రాజకీయ వ్యాఖ్యలతో ప్రజలను తప్పుదారి పట్టించడం సాధ్యం కాదని ఆయన అన్నారు. రామమందిర విరాళాల అంశంపై ప్రతిపక్షం చేస్తున్న ఆరోపణలను కూడా ఆయన ఖండించారు. .నితిన్ నబిన్ వ్యాఖ్యలకు ప్రతిస్పందించిన అరవింద్ కేజ్రీవాల్, "మీరు ఎవరు?" అంటూ ప్రశ్నించారు. బీజేపీ జాతీయ అధ్యక్షుడి వ్యాఖ్యలకు ఈ విధంగా స్పందించడం రాజకీయ వర్గాల్లో చర్చకు దారితీసింది. కేజ్రీవాల్ వ్యాఖ్యలతో బీజేపీ నాయకులు కూడా వరుసగా ప్రతిస్పందించడం ప్రారంభించారు.

ఈ నేపథ్యంలో ఢిల్లీ మంత్రి పర్వేశ్ వర్మ కూడా స్పందించారు. "జాతీయ అధ్యక్షుడు అంటే చాలా పెద్ద విషయం. కానీ నన్నైనా గుర్తుపట్టారా లేదా?" అంటూ కేజ్రీవాల్‌ను ఉద్దేశించి వ్యంగ్యంగా వ్యాఖ్యానించారు. ఈ వ్యాఖ్య ద్వారా 2025 ఢిల్లీ అసెంబ్లీ ఎన్నికలను ఆయన గుర్తు చేశారు. ఆ ఎన్నికల్లో కేజ్రీవాల్‌పై విజయం సాధించిన పర్వేశ్ వర్మ, అప్పటి నుంచి బీజేపీలో కీలక నాయకుడిగా ఎదిగారు. అందుకే తనను కేజ్రీవాల్ మరచిపోయారా అంటూ రాజకీయ వ్యంగ్యానికి దిగారు.