బ్రెజిల్ ఓటమి ముగింపు కాదు.. కొత్త ఆరంభం: అంచెలోట్టి

ప్రపంచకప్ రౌండ్ ఆఫ్ 16లో నార్వే చేతిలో 2-1 తేడాతో ఓటమి పాలై టోర్నీ నుంచి నిష్క్రమించిన తర్వాత బ్రెజిల్ ప్రధాన కోచ్ కార్లో అంచెలోట్టి తన జట్టుకు ధైర్యం చెప్పారు. ఈ పరాజయాన్ని ఒక ముగింపుగా కాకుండా, కొత్త జట్టు నిర్మాణానికి నాంది పలికే ఆరంభంగా చూడాలని ఆయన పేర్కొన్నారు. ప్రపంచ ఫుట్‌బాల్‌లో అత్యంత విజయవంతమైన దేశంగా పేరుగాంచిన బ్రెజిల్‌కు ఈ ఫలితం నిరాశ కలిగించినప్పటికీ, భవిష్యత్ కోసం బలమైన పునర్నిర్మాణం అవసరమని అంచెలోట్టి స్పష్టం చేశారు న్యూజెర్సీలో జరిగిన ఈ కీలక మ్యాచ్‌లో బ్రెజిల్ ఆశించిన స్థాయిలో రాణించలేకపోయింది. మ్యాచ్‌లో కొన్ని దశల్లో ఆధిపత్యం కనబరిచినప్పటికీ, అవకాశాలను గోల్స్‌గా మలచడంలో విఫలమైంది. మరోవైపు నార్వే తన అవకాశాలను సమర్థంగా వినియోగించుకుని చారిత్రక విజయాన్ని నమోదు చేసింది. దీంతో ఐదు సార్లు ప్రపంచకప్ గెలిచిన బ్రెజిల్ నాకౌట్ దశలోనే ఇంటిముఖం పట్టాల్సి వచ్చింది

మ్యాచ్ అనంతరం మీడియాతో మాట్లాడిన అంచెలోట్టి, జట్టు టోర్నమెంట్‌లో పోటీపడే సామర్థ్యాన్ని చూపిందని, అయితే కీలక సమయంలో అవసరమైన స్థాయిలో ప్రదర్శన ఇవ్వలేకపోయిందని అంగీకరించారు. ప్రపంచకప్‌లో లోతైన దశల వరకు వెళ్లే నాణ్యత తమ జట్టులో ఉందని తాను నమ్మానని, కానీ నాకౌట్ మ్యాచ్‌ల్లో చిన్న చిన్న తప్పిదాలే భారీ మూల్యం చెల్లింపజేస్తాయని ఆయన వ్యాఖ్యానించారు.

ఈ ఓటమి తర్వాత బ్రెజిల్ ఫుట్‌బాల్‌లో మార్పులపై చర్చ ప్రారంభమైంది. యువ ఆటగాళ్లకు మరిన్ని అవకాశాలు కల్పించడం, జట్టు సమతుల్యతను మెరుగుపరచడం, భవిష్యత్ టోర్నీల కోసం దీర్ఘకాలిక ప్రణాళిక రూపొందించడం అవసరమని విశ్లేషకులు అభిప్రాయపడుతున్నారు. అంచెలోట్టి కూడా ఇదే దిశగా కొత్త జట్టును తీర్చిదిద్దే ప్రక్రియ ప్రారంభమవుతుందని సంకేతాలు ఇచ్చారు