నందిగామలో ఆకతాయిలపై పోలీసుల ఉక్కుపాదం..

ఎన్టీఆర్ జిల్లా నందిగామలో విద్యార్థినులు, మహిళలను వేధిస్తూ హల్‌చల్ చేస్తున్న ఆకతాయిలపై పోలీసులు చర్యలు చేపట్టారు. నెహ్రు నగర్ వాటర్ ట్యాంక్ సమీపంలో కొంతమంది యువకులు అసభ్యకరంగా ప్రవర్తిస్తూ, మహిళలు మరియు బాలికలను ఇబ్బందులకు గురిచేస్తున్నారన్న ఫిర్యాదుల నేపథ్యంలో పోలీసులు నిఘా ఏర్పాటు చేశారు. సీఐ పీ. శ్రీను ఆదేశాల మేరకు పోలీసులు రంగంలోకి దిగి ఆకతాయిలను అదుపులోకి తీసుకున్నారు.

వాటర్ ట్యాంక్ సమీపంలోని గోడపై కూర్చొని స్కూల్, హాస్టల్ విద్యార్థినులు, మహిళలను ఉద్దేశించి అసభ్యకర వ్యాఖ్యలు చేస్తూ ఇబ్బందులకు గురిచేస్తున్నారని స్థానికులు పోలీసుల దృష్టికి తీసుకెళ్లారు. దీంతో విద్యార్థినులు, మహిళల భద్రతను దృష్టిలో పెట్టుకుని పోలీసులు ప్రత్యేకంగా నిఘా పెట్టారు. అనుమానాస్పదంగా తిరుగుతున్న యువకుల కదలికలను గమనిస్తూ, ఫిర్యాదులపై విచారణ చేపట్టారు.

మరోవైపు కొంతమంది యువకులు తమ ద్విచక్ర వాహనాలకు అధిక శబ్దం వచ్చే సైలెన్సర్లు ఏర్పాటు చేసుకుని వేగంగా బైక్‌లు నడుపుతున్నట్లు సమాచారం. స్కూళ్లు, బాలికల హాస్టళ్ల పరిసరాల్లో బైక్‌లపై చక్కర్లు కొడుతూ విద్యార్థినులను ఇబ్బందులకు గురిచేస్తున్నారని స్థానికులు ఆరోపించారు. అధిక శబ్దంతో వాహనాలు నడపడం, వేగంగా ప్రయాణించడం వల్ల విద్యార్థులు, మహిళల్లో భయాందోళనలు ఏర్పడుతున్నాయని తెలిపారు.

ఈ ఫిర్యాదులను తీవ్రంగా పరిగణించిన పోలీసులు నెహ్రు నగర్ వాటర్ ట్యాంక్ పరిసరాల్లో నిఘా ముమ్మరం చేశారు. పోలీసుల పర్యవేక్షణలో ఆకతాయి యువతను గుర్తించి కొంతమందిని అదుపులోకి తీసుకున్నారు. కానిస్టేబుల్ ప్రసాద్ ఆధ్వర్యంలో వారిని పోలీస్ స్టేషన్‌కు తరలించి వివరాలు సేకరించారు. ఈ చర్యలతో స్థానికంగా ఆకతాయిల ఆగడాలకు అడ్డుకట్ట పడుతుందని ప్రజలు ఆశాభావం వ్యక్తం చేస్తున్నారు.

విద్యార్థినులు, మహిళలను వేధించే వారిపై కఠిన చర్యలు తీసుకుంటామని సీఐ పీ. శ్రీను హెచ్చరించారు. ముఖ్యంగా పాఠశాలలు, బాలికల హాస్టళ్ల పరిసరాల్లో అసాంఘిక కార్యకలాపాలకు పాల్పడితే ఎట్టి పరిస్థితుల్లోనూ ఉపేక్షించబోమని పోలీసులు స్పష్టం చేశారు. మహిళలు, విద్యార్థినులకు ఇబ్బంది కలిగించేలా ప్రవర్తిస్తే చట్టపరమైన చర్యలు తప్పవని హెచ్చరించారు.

ప్రజలు కూడా తమ పరిసరాల్లో అనుమానాస్పదంగా తిరిగే వ్యక్తులు లేదా విద్యార్థినులు, మహిళలను వేధించే వారిని గుర్తిస్తే వెంటనే పోలీసులకు సమాచారం అందించాలని అధికారులు సూచిస్తున్నారు. పాఠశాలలు, హాస్టళ్ల పరిసరాల్లో ప్రశాంతమైన వాతావరణం ఉండేలా పోలీసుల నిఘా కొనసాగుతుందని తెలిపారు. నందిగామలో చేపట్టిన ఈ చర్యలతో విద్యార్థినులు, మహిళల భద్రతకు పోలీసులు ప్రాధాన్యత ఇస్తున్నారనే భరోసా స్థానికుల్లో ఏర్పడింది.