ఆంధ్రుల రాజధాని అమరావతికి సరికొత్త శోభ: మంత్రి నారాయణ

ఆంధ్రుల రాజధాని అమరావతికి సరికొత్త శోభ వచ్చిందని రాష్ట్ర పురపాలక, పట్టణాభివృద్ధి శాఖ మంత్రి పొంగూరు నారాయణ అన్నారు. అమరావతి ముఖద్వారం ఉండవల్లి వద్ద సీడ్‌ యాక్సిస్‌ రోడ్‌ ఫేజ్‌-2తో పాటు స్టీల్‌ బ్రిడ్జిని ముఖ్యమంత్రి చంద్రబాబు నాయుడు ప్రారంభించారు. అనంతరం నిర్వహించిన రైతుల బహిరంగ సభలో మంత్రి నారాయణ ప్రసంగించారు.

రాజధాని నిర్మాణం కోసం రైతులు చేసిన త్యాగాలు ఎప్పటికీ గుర్తుండిపోతాయని మంత్రి నారాయణ పేర్కొన్నారు. అమరావతి కోసం భూములు ఇచ్చిన రైతుల సహకారం చరిత్రలో నిలిచిపోతుందని అన్నారు. రాజధాని నిర్మాణంపై రైతులకు ఉన్న విశ్వాసానికి వారి స్వచ్ఛంద భూసమీకరణే నిదర్శనమని తెలిపారు.

2015 జనవరిలో రాజధాని కోసం భూసమీకరణ ప్రక్రియ ప్రారంభించామని మంత్రి వివరించారు. జనవరి 1 నుంచి ఫిబ్రవరి 28 వరకు కేవలం 58 రోజుల్లోనే రైతులు సుమారు 34 వేల ఎకరాల భూమిని స్వచ్ఛందంగా అందించారని చెప్పారు. ఎలాంటి న్యాయ వివాదాలు లేకుండా రైతులు భూములు ఇవ్వడం దేశ చరిత్రలో ప్రత్యేకమైన విషయమని పేర్కొన్నారు.

ఆంధ్రప్రదేశ్‌ రాజధాని లేని రాష్ట్రంగా మారిన పరిస్థితుల్లో ఆర్థికంగా బలమైన రాజధాని నిర్మించాలనే లక్ష్యంతో అమరావతిని ఎంపిక చేసినట్లు మంత్రి తెలిపారు. తెలంగాణకు హైదరాబాద్‌, మహారాష్ట్రకు ముంబయి, కర్ణాటకకు బెంగళూరు, తమిళనాడుకు చెన్నై వంటి నగరాలు ఆర్థిక వృద్ధికి కేంద్రాలుగా ఉన్నాయని పేర్కొన్నారు. అదే విధంగా ఆంధ్రప్రదేశ్‌కు కూడా ఆర్థిక రాజధానిగా అమరావతిని అభివృద్ధి చేయాలని సీఎం చంద్రబాబు సంకల్పించారని అన్నారు.

రాష్ట్రంలోని అన్ని ప్రాంతాలకు సమన్యాయం జరిగేలా కృష్ణా నది ఒడ్డున అమరావతిని ఏర్పాటు చేసినట్లు మంత్రి వివరించారు. శ్రీకాకుళం నుంచి అనంతపురం వరకు రాష్ట్రానికి మధ్య ప్రాంతంలో ఉండటం, రోడ్డు, రైలు మార్గాల అనుసంధానం మెరుగ్గా ఉండటం రాజధాని ఎంపికకు కారణమని తెలిపారు.

అమరావతిని అంతర్జాతీయ ప్రమాణాలతో కూడిన నగరంగా తీర్చిదిద్దేందుకు సింగపూర్‌ ప్రభుత్వం ఉచితంగా మాస్టర్‌ ప్లాన్‌ అందించిందని మంత్రి చెప్పారు. రాజధానిలో ప్రతిష్టాత్మక భవనాల రూపకల్పన కోసం అంతర్జాతీయ సంస్థల సహకారం తీసుకున్నామని తెలిపారు. ప్రపంచంలోని అత్యుత్తమ నగరాల్లో ఒకటిగా అమరావతిని అభివృద్ధి చేయడమే లక్ష్యమని పేర్కొన్నారు.

అమరావతిలో సుమారు 350 కిలోమీటర్ల మేర ట్రంక్‌ రోడ్లు నిర్మిస్తున్నామని మంత్రి తెలిపారు. విద్యుత్‌, గ్యాస్‌, టెలిఫోన్‌, తాగునీటి సరఫరా వంటి మౌలిక సదుపాయాలను భూగర్భంలో ఏర్పాటు చేసేలా ప్రణాళిక రూపొందించామని చెప్పారు. డ్రైనేజీ, పునర్వినియోగ నీటి పైపులైన్లు, వర్షపు నీటి కాలువలను కూడా సమగ్రంగా అభివృద్ధి చేస్తున్నామని వివరించారు.

గతంలో అమరావతి నిర్మాణ పనులకు ఆటంకాలు ఏర్పడ్డాయని మంత్రి నారాయణ అన్నారు. పనులు నిలిచిపోవడంతో నిర్మాణ సంస్థల ఒప్పందాలను సాంకేతికంగా పూర్తి చేసి తిరిగి టెండర్లు పిలవాల్సి వచ్చిందని చెప్పారు. ఐఐటీ చెన్నై, ఐఐటీ హైదరాబాద్‌ నిపుణులతో నిర్మాణ నాణ్యతను పరిశీలించిన తర్వాత పనులను వేగవంతం చేస్తున్నామని తెలిపారు.

అమరావతి నిర్మాణానికి అడ్డంకులు సృష్టించే ప్రయత్నాలు జరిగినప్పటికీ రైతులు వెనక్కి తగ్గలేదని మంత్రి అన్నారు. రాజధాని కోసం రైతులు చూపిన సహకారం వల్లే అమరావతికి బలమైన పునాది ఏర్పడిందని తెలిపారు. వారి ఆశలు, రాష్ట్ర ప్రజల ఆకాంక్షలకు అనుగుణంగా నిర్మాణాన్ని పూర్తి చేస్తామని స్పష్టం చేశారు.

సీడ్‌ యాక్సిస్‌ రోడ్డుకు అనుసంధానంగా నిర్మించిన స్టీల్‌ బ్రిడ్జిలు అమరావతి రవాణా వ్యవస్థలో కీలకంగా మారనున్నాయని మంత్రి పేర్కొన్నారు. ఒక వంతెన జాతీయ రహదారికి, మరో వంతెన మంగళగిరి మార్గానికి అనుసంధానమవుతుందని తెలిపారు.

సీడ్‌ యాక్సిస్‌ రోడ్‌ ఫేజ్‌-2, స్టీల్‌ బ్రిడ్జి ప్రారంభంతో అమరావతి అభివృద్ధిలో మరో కీలక అడుగు పడిందని మంత్రి నారాయణ అన్నారు. రాజధానిని ఆర్థిక, పరిపాలనా, మౌలిక వసతుల కేంద్రంగా తీర్చిదిద్దడమే ప్రభుత్వ లక్ష్యమని తెలిపారు. అమరావతి నిర్మాణంలో భాగస్వామ్యం కల్పించినందుకు ముఖ్యమంత్రి చంద్రబాబు నాయుడికి ధన్యవాదాలు తెలిపారు.