సుప్రీంకోర్టులో అనిల్ అంబానీకి ఎదురుదెబ్బ

వ్యాపారవేత్త అనిల్ అంబానీకి సుప్రీంకోర్టులో ఎదురుదెబ్బ తగిలింది. రిలయన్స్ కమ్యూనికేషన్స్‌కు చెందిన మోసపూరిత ఖాతాల వ్యవహారంలో బాంబే హైకోర్టు ఇచ్చిన అనుమతులను సవాల్ చేస్తూ ఆయన దాఖలు చేసిన పిటిషన్‌ను సుప్రీంకోర్టు తోసిపుచ్చింది. ఈ తీర్పు ఆయనకు భారీ న్యాయ పరాజయంగా మారింది.

ఈ కేసులో బ్యాంక్ ఆఫ్ బరోడా, ఇండియన్ ఓవర్సీస్ బ్యాంక్, అలాగే ఐడీబీఐ బ్యాంక్ వంటి బ్యాంకులు రిలయన్స్ కమ్యూనికేషన్స్ ఖాతాలను మోసపూరితంగా ప్రకటించాయి. ఈ నిర్ణయాన్ని అనిల్ అంబానీ తొలుత బాంబే హైకోర్టులో సవాల్ చేయగా, సింగిల్ బెంచ్ ఆయనకు కొంత ఊరట ఇచ్చింది.

అయితే అనంతరం డివిజన్ బెంచ్ ఆ ఉత్తర్వులను రద్దు చేసి బ్యాంకులకు తదుపరి చర్యలకు అనుమతి ఇచ్చింది. దీనిపై అనిల్ అంబానీ సుప్రీంకోర్టును ఆశ్రయించగా, ప్రధాన న్యాయమూర్తి జస్టిస్ సూర్యకాంత్ నేతృత్వంలోని త్రిసభ్య ధర్మాసనం ఆయన పిటిషన్‌ను తిరస్కరించింది. అయితే బ్యాంకుల షోకాజ్ నోటీసులపై హైకోర్టు సింగిల్ జడ్జి బెంచ్ ముందు తన వాదనలు వినిపించుకునే అవకాశం ఆయనకు ఇచ్చింది.

అలాగే ఈ కేసు విచారణను త్వరగా పూర్తి చేయాలని హైకోర్టుకు సుప్రీంకోర్టు సూచించింది. దీంతో ఈ కేసులో న్యాయపరమైన పోరాటం మరో దశకు చేరినట్లైంది.