పిల్లల సామాజిక మాధ్యమాలపై ఆస్ట్రేలియా మరింత కఠినం

పదహారేళ్లలోపు పిల్లల కోసం తీసుకొచ్చిన సామాజిక మాధ్యమాల నిషేధాన్ని మరింత కఠినంగా అమలు చేయాలని ఆస్ట్రేలియా ప్రభుత్వం నిర్ణయించింది. నిబంధనలను పాటించడంలో విఫలమయ్యే సాంకేతిక సంస్థలపై విధించే గరిష్ఠ జరిమానాను రెట్టింపు చేస్తున్నట్లు ప్రకటించింది. ఇప్పటి వరకు ఉన్న గరిష్ఠ జరిమానాను పెంచి దాదాపు తొంభై తొమ్మిది మిలియన్ ఆస్ట్రేలియా డాలర్ల వరకు విధించేలా చట్ట సవరణలు తీసుకురానున్నట్లు వెల్లడించింది. పిల్లల భద్రత విషయంలో రాజీ పడబోమని ప్రభుత్వం స్పష్టం చేసింది. ఈ నిర్ణయం వెనుక ప్రధాన కారణం ఇటీవల వెలుగులోకి వచ్చిన నివేదికలు. నిషేధం అమల్లోకి వచ్చినప్పటికీ, పదహారేళ్లలోపు పిల్లల్లో అధిక శాతం ఇప్పటికీ సామాజిక మాధ్యమాలను ఉపయోగిస్తున్నట్లు అధ్యయనాలు వెల్లడించాయి. తప్పుడు వయసు వివరాలు, ఇతర మార్గాలను ఉపయోగించి చాలా మంది బాలలు నిబంధనలను సులభంగా తప్పించుకుంటున్నారని గుర్తించారు. దీంతో ప్రస్తుతం అమల్లో ఉన్న చర్యలు ఆశించిన ఫలితాలను ఇవ్వలేకపోయాయని ప్రభుత్వం భావిస్తోంది.

కొత్త ప్రతిపాదనల ప్రకారం, సామాజిక మాధ్యమ సంస్థలు పిల్లలు ఖాతాలు తెరవకుండా తీసుకున్న చర్యలపై స్పష్టమైన ఆధారాలను సమర్పించాల్సి ఉంటుంది. ఇందుకోసం ఆన్‌లైన్ భద్రత పర్యవేక్షణ సంస్థకు మరిన్ని అధికారాలు ఇవ్వనున్నారు. అవసరమైతే సంస్థల అంతర్గత పత్రాలు, వయసు నిర్ధారణ విధానాలు, మూడో పక్ష సంస్థల సమాచారం కూడా కోరే అధికారం కల్పించనున్నారు. దీంతో నిబంధనల అమలు మరింత కఠినంగా మారనుంది.

ప్రస్తుతం పరిశీలనలో ఉన్న ప్రముఖ సామాజిక మాధ్యమ వేదికలపై ప్రభుత్వం ప్రత్యేక దృష్టి సారించింది. పిల్లల భద్రతకు సంబంధించిన నిబంధనలను సమర్థంగా అమలు చేయకపోతే భారీ జరిమానాలతో పాటు మరిన్ని చర్యలు తీసుకునే అవకాశం ఉందని అధికారులు హెచ్చరిస్తున్నారు. పిల్లల కోసం రూపొందించిన చట్టాలను కేవలం కాగితాలకే పరిమితం చేయకుండా కఠినంగా అమలు చేయడమే ప్రభుత్వ లక్ష్యమని పేర్కొన్నారు