రహస్య గోళాల మూలాన్ని గుర్తించిన ఆస్ట్రేలియా అంతరిక్ష సంస్థ

ఆస్ట్రేలియాలోని క్వీన్స్‌ల్యాండ్ రాష్ట్ర తీరంలో ఇటీవల వెలుగులోకి వచ్చిన రహస్య గోళాల మూలాన్ని గుర్తించినట్లు ఆస్ట్రేలియా అంతరిక్ష సంస్థ ప్రకటించింది. ఉత్తర క్వీన్స్‌ల్యాండ్‌లోని ఫారెస్ట్ బీచ్ తీరానికి కొట్టుకొచ్చిన ఆరు భారీ ఘన గోళాలు అంతరిక్ష ప్రయోగ వాహనానికి చెందిన పీడన పాత్రలుగా ఉండే అవకాశం ఉందని సంస్థ తెలిపింది. అయితే అవి ఏ దేశానికి చెందిన ఏ రాకెట్ లేదా అంతరిక్ష ప్రయోగ వాహనం నుంచి వచ్చాయనే విషయాన్ని అధికారికంగా నిర్ధారించేందుకు అంతర్జాతీయ సంస్థలతో కలిసి దర్యాప్తు కొనసాగిస్తున్నట్లు వెల్లడించింది. టౌన్‌స్విల్లే నగరానికి ఉత్తరాన ఉన్న ఫారెస్ట్ బీచ్ వద్ద ఈ భారీ గోళాలు కనిపించడంతో స్థానిక ప్రజలు ఆశ్చర్యానికి గురయ్యారు. బీచ్ ఒడ్డుకు కొట్టుకొచ్చిన ఈ గోళాలు అసలు ఏమిటనే దానిపై మొదట అనేక ఊహాగానాలు వినిపించాయి. వాటి పరిమాణం, నిర్మాణం, రూపురేఖలను పరిశీలించిన అనంతరం అవి సాధారణ వస్తువులు కాదని అధికారులు భావించారు.

ప్రాథమిక పరిశీలనలో ఈ వస్తువులు అంతరిక్ష శకలాలు అయి ఉండవచ్చని భావించిన అధికారులు వాటిని వెంటనే భద్రతా పరిధిలోకి తీసుకున్నారు. అనంతరం ఆస్ట్రేలియా అంతరిక్ష సంస్థ నిపుణులు పరిశీలించి, ఇవి అంతరిక్ష ప్రయోగ వాహనాల్లో ఉపయోగించే పీడన పాత్రలు అయ్యే అవకాశమే ఎక్కువగా ఉందని ప్రకటించారు. రాకెట్ వ్యవస్థల్లో ఇలాంటి పీడన పాత్రలు వివిధ వాయువులు లేదా ఇతర పదార్థాలను నిల్వ చేయడానికి ఉపయోగిస్తారు.