బంగ్లాదేశ్‌లో మీజిల్స్ విజృంభణ.. చిన్నారుల మరణాలు పెరుగుతున్నాయి

ఒకప్పుడు మీజిల్స్ (తట్టు) వ్యాధి నిర్మూలనలో గణనీయమైన పురోగతి సాధించిన బంగ్లాదేశ్ ఇప్పుడు తీవ్రమైన ఆరోగ్య సంక్షోభాన్ని ఎదుర్కొంటోంది. ఇటీవల నెలల్లో మీజిల్స్ కేసులు ఒక్కసారిగా పెరగడంతో వందలాది మంది చిన్నారులు ప్రాణాలు కోల్పోయారు. ప్రపంచ ఆరోగ్య సంస్థ (డబ్ల్యూహెచ్‌ఓ) ప్రశంసించిన టీకా కార్యక్రమాలు ఉన్నప్పటికీ, పరిస్థితి అనూహ్యంగా మారడం వైద్య వర్గాలను తీవ్ర ఆందోళనకు గురిచేస్తోంది. ఆసుపత్రులు రోగులతో నిండిపోవడం, ఆరోగ్య వ్యవస్థపై తీవ్ర ఒత్తిడి పడటం, మరణాల సంఖ్య మరింత ఎక్కువగా ఉండే అవకాశం ఉందని యునిసెఫ్ హెచ్చరించడం ఈ సంక్షోభ తీవ్రతను తెలియజేస్తోంది. బంగ్లాదేశ్‌లోని మైమెన్సింగ్ నగరంలోని మెడికల్ కాలేజ్ ఆసుపత్రిలో పరిస్థితి అత్యంత విషమంగా ఉంది. అక్కడి శిశు వైద్య నిపుణుడు డాక్టర్ మహమ్మద్ గోలామ్ మౌలా మాట్లాడుతూ, తన వైద్య జీవితంలో ఇంత పెద్ద స్థాయిలో మీజిల్స్ వ్యాప్తిని ఎప్పుడూ చూడలేదని తెలిపారు. ఆసుపత్రిలోని మీజిల్స్ వార్డులు పూర్తిగా నిండిపోగా, అదనపు రోగులకు బెడ్లు లేకపోవడంతో కుటుంబ సభ్యులు పిల్లలతో కలిసి నేలపై దుప్పట్లు పరుచుకుని చికిత్స పొందాల్సిన పరిస్థితి ఏర్పడింది.

ప్రపంచ ఆరోగ్య సంస్థ ప్రకారం, ఈ ఏడాది మార్చి వరకు బంగ్లాదేశ్ మీజిల్స్ నిర్మూలన దిశగా "గణనీయమైన పురోగతి" సాధించింది. దేశంలో మీజిల్స్ టీకా కవరేజ్ 90 శాతానికి పైగా ఉండేది. అధిక టీకా శాతం కారణంగా వ్యాధి నియంత్రణలోనే ఉందని భావించారు. అయితే ఆ పరిస్థితి ఒక్కసారిగా మారిపోయింది. మార్చి తర్వాత కేసులు వేగంగా పెరిగి దేశవ్యాప్తంగా అత్యవసర పరిస్థితి నెలకొంది.

ప్రభుత్వ గణాంకాల ప్రకారం, మార్చి నుంచి ఇప్పటివరకు దాదాపు 750 మంది మరణించారు. వీరిలో ఎక్కువ మంది చిన్నారులే. ఈ మరణాల్లో ప్రయోగశాల పరీక్షల ద్వారా నిర్ధారించిన కేసులతో పాటు అనుమానిత మీజిల్స్ కేసులు కూడా ఉన్నాయి. అయితే యునిసెఫ్ అభిప్రాయం ప్రకారం, వాస్తవ మరణాల సంఖ్య అధికారిక లెక్కల కంటే ఎక్కువగా ఉండే అవకాశం ఉంది. కేసులు ఒక్కసారిగా పెరగడం, ఆరోగ్య వ్యవస్థపై తీవ్రమైన ఒత్తిడి, అన్ని ప్రాంతాల నుంచి పూర్తి సమాచారం సేకరించడంలో ఎదురవుతున్న ఇబ్బందుల కారణంగా అసలు సంఖ్య ఇంకా ఎక్కువగా ఉండవచ్చని సంస్థ హెచ్చరించింది.