భారత్ బంద్‌కు గిరిజన సంఘం మద్దతు: కృష్ణ నాయక్

ఈనెల 24న దేశవ్యాప్తంగా నిర్వహించనున్న భారత్ బంద్‌కు సంపూర్ణ మద్దతు ఇస్తున్నట్లు గిరిజన విద్యార్థి యువజన సంఘం ఆంధ్రప్రదేశ్ రాష్ట్ర అధ్యక్షులు కటారి కృష్ణ నాయక్ తెలిపారు. నంద్యాల జిల్లాలోని కార్పొరేట్, ప్రైవేట్ పాఠశాలలు, జూనియర్ కళాశాలలు, డిగ్రీ కళాశాలలు, పీజీ కళాశాలల యాజమాన్యాలు, విద్యార్థులు, తల్లిదండ్రులు, మేధావులు బంద్‌కు సహకరించాలని ఆయన విజ్ఞప్తి చేశారు.

ఢిల్లీలోని పటేల్ చౌక్ వద్ద శాంతియుతంగా నిరసన చేపట్టిన విద్యార్థులు, యువకులపై పోలీసులు, ర్యాపిడ్ యాక్షన్ ఫోర్స్ బలగాలు లాఠీఛార్జ్ చేయడాన్ని కృష్ణ నాయక్ తీవ్రంగా ఖండించారు. రాజ్యాంగం కల్పించిన శాంతియుత నిరసన హక్కును కాలరాస్తూ విద్యార్థులు, మహిళలపై బలప్రయోగం చేయడం ప్రజాస్వామ్య విలువలపై దాడిగా అభివర్ణించారు.

ప్రజల సమస్యలను వెలుగులోకి తీసుకువచ్చే జర్నలిస్టులను అడ్డుకోవడం, మీడియాపై ఆంక్షలు విధించడం తీవ్ర ఆందోళన కలిగించే అంశమని ఆయన పేర్కొన్నారు. ప్రజాస్వామ్య వ్యవస్థలో మీడియా స్వేచ్ఛకు ఎంతో ప్రాధాన్యత ఉందని, దానిని కాపాడాల్సిన బాధ్యత ప్రభుత్వాలపై ఉందని అన్నారు.

శాంతియుత నిరసనకారులపై లాఠీఛార్జ్‌కు పాల్పడిన అధికారులపై వెంటనే కఠిన చర్యలు తీసుకోవాలని కటారి కృష్ణ నాయక్ డిమాండ్ చేశారు. గాయపడిన నిరసనకారులకు మెరుగైన వైద్య సేవలు అందించాలని కోరారు. విద్యార్థుల సమస్యలను పరిష్కరించేందుకు ప్రభుత్వం వెంటనే చర్చలు ప్రారంభించాలని సూచించారు.

నీట్ పరీక్షలో జరిగిన అవకతవకలకు బాధ్యత వహిస్తూ కేంద్ర విద్యాశాఖ మంత్రి రాజీనామా చేయాలని ఆయన డిమాండ్ చేశారు. విద్యార్థుల భవిష్యత్తును దృష్టిలో ఉంచుకుని పారదర్శకమైన చర్యలు తీసుకోవాలని కోరారు. ప్రజా ఆందోళనలను గౌరవించి సమస్యల పరిష్కారానికి ప్రభుత్వం ముందుకు రావాలని కృష్ణ నాయక్ పేర్కొన్నారు.