చీరాలలో ఇంటింటి ప్రచారానికి ఎమ్మెల్యే మాలకొండయ్య పిలుపు

చీరాల నియోజకవర్గ తెలుగుదేశం పార్టీ విస్తృత స్థాయి సమావేశం ఘనంగా జరిగింది. కూటమి ప్రభుత్వం రెండేళ్ల పాలనలో అమలు చేసిన అభివృద్ధి, సంక్షేమ కార్యక్రమాలను ప్రజలకు వివరించే లక్ష్యంతో చేపట్టిన "రెండేళ్ల నమ్మకం – అభివృద్ధి, సంక్షేమం" ఇంటింటి ప్రచార కార్యక్రమంపై సమావేశంలో చర్చించారు. ఈ సందర్భంగా చీరాల ఎమ్మెల్యే మద్దులూరి మాలకొండయ్య పార్టీ శ్రేణులకు పలు సూచనలు చేశారు.

కూటమి ప్రభుత్వం ప్రజలకు ఇచ్చిన హామీలను నెరవేర్చుతూ రెండేళ్లలో అనేక సంక్షేమ, అభివృద్ధి కార్యక్రమాలను అమలు చేసిందని ఎమ్మెల్యే తెలిపారు. ప్రభుత్వం చేసిన మంచి పనులను ప్రతి ఇంటి గడపకు తీసుకెళ్లే బాధ్యత కార్యకర్తలపై ఉందన్నారు. ఈ కార్యక్రమాన్ని కేవలం పార్టీ కార్యక్రమంగా కాకుండా ప్రజలతో మమేకమయ్యే కార్యక్రమంగా భావించాలని సూచించారు.

ప్రతి కార్యకర్త ప్రజల్లోకి వెళ్లి ప్రభుత్వం అమలు చేస్తున్న సంక్షేమ పథకాలు, అభివృద్ధి కార్యక్రమాలను వివరించాలని ఎమ్మెల్యే పిలుపునిచ్చారు. తల్లికి వందనం, స్త్రీ శక్తి, అన్నదాత సుఖీభవ, ఉచిత గ్యాస్ సిలిండర్లు, ఉచిత ఇసుక విధానం, సబ్సిడీ రుణాలు, ఎన్టీఆర్ భరోసా పింఛన్లు, మత్స్యకార భరోసా వంటి పథకాల ద్వారా ప్రజలకు అందుతున్న ప్రయోజనాలను వివరించాలని సూచించారు.

రైతులు, మహిళలు, యువత, విద్యార్థులు, వృద్ధులు, అన్ని వర్గాల ప్రజలకు ప్రభుత్వం అందిస్తున్న సంక్షేమ ఫలాలను ఇంటింటికీ చేరవేయాలని ఎమ్మెల్యే పేర్కొన్నారు. ప్రజల సమస్యలను నేరుగా తెలుసుకుని వాటి పరిష్కారానికి కృషి చేయాలని పార్టీ నాయకులకు సూచించారు.

ప్రతి బూత్ పరిధిలో ప్రతిరోజూ కనీసం 30 ఇళ్లను సందర్శించి ప్రభుత్వ విజయాలను ప్రజలకు వివరించాలని ఆదేశించారు. ప్రజల అభిప్రాయాలను సేకరించి సంబంధిత వివరాలను నమోదు చేయాలని, ప్రచార కార్యక్రమంలో నిర్దేశించిన విధానాలను కచ్చితంగా పాటించాలని సూచించారు.

సమావేశం అనంతరం "రెండేళ్ల నమ్మకం – అభివృద్ధి, సంక్షేమం" ఇంటింటి ప్రచార కార్యక్రమానికి సంబంధించిన పోస్టర్‌ను ఎమ్మెల్యే మద్దులూరి మాలకొండయ్య పార్టీ నాయకులు, ప్రజాప్రతినిధులతో కలిసి ఆవిష్కరించారు. కార్యక్రమాన్ని విజయవంతం చేయాలని పార్టీ శ్రేణులకు పిలుపునిచ్చారు.

చీరాల నియోజకవర్గంలో ఈ ప్రచార కార్యక్రమాన్ని ఆదర్శంగా నిర్వహించి ప్రతి కుటుంబానికి కూటమి ప్రభుత్వం చేసిన అభివృద్ధి, సంక్షేమ కార్యక్రమాల సమాచారాన్ని చేరవేయాలని ఎమ్మెల్యే తెలిపారు. ప్రజల ఆశీర్వాదంతో మరింత అభివృద్ధి సాధించేందుకు అందరూ సమన్వయంతో పనిచేయాలని సూచించారు.

ఈ సమావేశంలో పార్టీ నాయకులు, ప్రజాప్రతినిధులు, మండల అధ్యక్షులు, క్లస్టర్, యూనిట్, బూత్ ఇన్‌ఛార్జ్‌లు, అనుబంధ విభాగాల నాయకులు, కూటమి పార్టీల ప్రతినిధులు, కార్యకర్తలు పెద్ద సంఖ్యలో పాల్గొన్నారు. ఇంటింటి ప్రచార కార్యక్రమాన్ని విజయవంతం చేయాలని వారు సంకల్పించారు.