IND vs IRE: ప్రాక్టీస్‌లో రగడ.. ఐర్లాండ్ బోర్డుపై గంభీర్ అసహనం

భారత్-ఐర్లాండ్ తొలి టీ20 మ్యాచ్‌కు ముందు బెల్ఫాస్ట్‌లో జరిగిన టీమిండియా ప్రాక్టీస్ సెషన్‌లో కనీస సౌకర్యాల కొరత వివాదానికి దారితీసింది. నెట్స్‌లో బౌలర్ వెనుక ఉండాల్సిన సైట్-స్క్రీన్ లేకపోవడంతో బ్యాటర్లకు బంతి స్పష్టంగా కనిపించక ఇబ్బందులు ఎదురయ్యాయి. ఈ విషయంపై హెడ్ కోచ్ గౌతమ్ గంభీర్, టీమ్ మేనేజ్‌మెంట్ తీవ్ర అసంతృప్తి వ్యక్తం చేస్తూ ఐర్లాండ్ క్రికెట్ బోర్డుకు ఫిర్యాదు చేశారు. స్పందించిన నిర్వాహకులు వెంటనే అవసరమైన ఏర్పాట్లు చేసి సమస్యను పరిష్కరించారు. ఇదే సమయంలో అరంగేట్రానికి సిద్ధమవుతున్న 15 ఏళ్ల యువ సంచలనం వైభవ్ సూర్యవంశీకి పూర్తి స్థాయి ప్రాక్టీస్ కల్పించాలన్న గంభీర్ ప్రణాళికకు స్వల్ప అంతరాయం ఏర్పడింది. అయితే అనంతరం నెట్స్‌లో హర్షిత్ రాణా, ప్రసిద్ధ్ కృష్ణ, అక్షర్ పటేల్, వాషింగ్టన్ సుందర్, రవి బిష్ణోయ్ వంటి బౌలర్లను ధైర్యంగా ఎదుర్కొన్న వైభవ్ తన ప్రతిభతో అందరినీ ఆకట్టుకున్నాడు. తొలి టీ20లో అతనికి తుది జట్టులో చోటు దక్కుతుందా అన్న ఉత్కంఠ అభిమానుల్లో నెలకొంది.