దేశంలో పెరుగుతున్న క్యాన్సర్ భారం..

న్యూఢిల్లీ: దేశంలో క్యాన్సర్ భారంపై కేంద్ర ప్రభుత్వం కీలక గణాంకాలను వెల్లడించింది. గత ఐదేళ్లలో భారత్‌లో కొత్త క్యాన్సర్ కేసుల సంఖ్యతో పాటు క్యాన్సర్ కారణంగా మరణాల సంఖ్య కూడా క్రమంగా పెరిగినట్లు పార్లమెంట్‌లో వెల్లడించిన వివరాలు సూచిస్తున్నాయి.

2021లో దేశవ్యాప్తంగా అంచనా వేసిన కొత్త క్యాన్సర్ కేసుల సంఖ్య 14.26 లక్షలుగా ఉండగా, 2025 నాటికి ఈ సంఖ్య 15.70 లక్షలకు పెరిగినట్లు కేంద్ర ఆరోగ్య శాఖ తెలిపింది. ఇదే కాలంలో క్యాన్సర్ సంబంధిత మరణాలు కూడా 7.89 లక్షల నుంచి 8.69 లక్షలకు పెరిగినట్లు వెల్లడించింది.

ఈ గణాంకాల ప్రకారం 2025లో భారత్‌లో సుమారు 15.7 లక్షల కొత్త క్యాన్సర్ కేసులు నమోదయ్యే అవకాశం ఉందని, క్యాన్సర్ కారణంగా 8.69 లక్షల మంది ప్రాణాలు కోల్పోయే అవకాశం ఉందని అంచనా వేస్తున్నారు. 2021తో పోలిస్తే కొత్త కేసులు 1.43 లక్షలకు పైగా పెరగగా, మరణాలు సుమారు 79 వేల వరకు పెరిగాయి.

వృద్ధాప్య జనాభా పెరుగుదల, జీవనశైలిలో మార్పులు, వ్యాధి నిర్ధారణ విధానాల్లో మెరుగుదల వంటి కారణాలతో క్యాన్సర్ ప్రజారోగ్య సవాలుగా మారుతోందని గణాంకాలు స్పష్టం చేస్తున్నాయి.

రాజ్యసభలో అడిగిన ఓ ప్రశ్నకు కేంద్ర ఆరోగ్య శాఖ సహాయ మంత్రి ప్రతాప్‌రావ్ జాధవ్ సమాధానం ఇస్తూ ఈ వివరాలను వెల్లడించారు. ఈ గణాంకాలను భారత వైద్య పరిశోధన మండలి పరిధిలోని నేషనల్ ఇన్‌స్టిట్యూట్ ఆఫ్ ఎపిడెమియాలజీ రూపొందించినట్లు తెలిపారు.

2021 నుంచి 2025 మధ్య రాష్ట్రాలు, కేంద్ర పాలిత ప్రాంతాల వారీగా అన్ని రకాల క్యాన్సర్ల అంచనా కేసులు, మరణాల వివరాలను ఈ నివేదికలో పొందుపరిచినట్లు మంత్రి తెలిపారు.

ప్రపంచ ఆరోగ్య సంస్థ క్యాన్సర్ గ్లోబల్ స్టేటస్ రిపోర్ట్-2026లో పేర్కొన్న వివరాలను కూడా మంత్రి ప్రస్తావించారు. గ్లోబోకాన్-2022 అంచనాల ప్రకారం భారత్‌లో 14.1 లక్షల కొత్త క్యాన్సర్ కేసులు, సుమారు 9.2 లక్షల క్యాన్సర్ మరణాలు నమోదైనట్లు నివేదిక వెల్లడించింది.

75 ఏళ్ల వయస్సు వచ్చేలోపు క్యాన్సర్ బారిన పడే ప్రమాదం భారత్‌లో 10.6 శాతంగా ఉందని ప్రపంచ ఆరోగ్య సంస్థ నివేదిక అంచనా వేసింది. అంటే ప్రతి పది మంది భారతీయుల్లో ఒకరు 75 ఏళ్లలోపు క్యాన్సర్‌కు గురయ్యే అవకాశం ఉందని తెలిపింది.

రాష్ట్రాల వారీగా పరిశీలిస్తే 2025లో అత్యధిక క్యాన్సర్ కేసులు ఉత్తరప్రదేశ్‌లో నమోదయ్యే అవకాశం ఉందని అంచనా వేశారు. అక్కడ 2.26 లక్షల కొత్త కేసులు ఉండవచ్చని తెలిపారు. ఆ తర్వాత మహారాష్ట్రలో 1.30 లక్షలు, పశ్చిమ బెంగాల్‌లో 1.22 లక్షలు, బిహార్‌లో 1.18 లక్షలు, తమిళనాడులో 1.01 లక్షల కేసులు నమోదయ్యే అవకాశం ఉందని వివరించారు.

క్యాన్సర్ మరణాల విషయంలో కూడా ఉత్తరప్రదేశ్ ముందంజలో ఉంటుందని అంచనా. అక్కడ 1.25 లక్షల మరణాలు నమోదయ్యే అవకాశం ఉందని తెలిపారు. మహారాష్ట్రలో 71,696, పశ్చిమ బెంగాల్‌లో 67,093, బిహార్‌లో 65,571, తమిళనాడులో 54,864 క్యాన్సర్ మరణాలు ఉండవచ్చని పేర్కొన్నారు.

ఈశాన్య రాష్ట్రాల్లో అసోంలో క్యాన్సర్ భారం ఎక్కువగా ఉందని గణాంకాలు వెల్లడిస్తున్నాయి. 2025లో అసోంలో 42,694 కొత్త కేసులు, 25,727 మరణాలు నమోదయ్యే అవకాశం ఉందని అంచనా వేశారు. మేఘాలయ, త్రిపుర, మణిపూర్, మిజోరం, నాగాలాండ్, అరుణాచల్ ప్రదేశ్ రాష్ట్రాల్లో మాత్రం తక్కువ సంఖ్యలో కేసులు నమోదయ్యే అవకాశం ఉందని తెలిపారు.

దేశవ్యాప్తంగా సంవత్సరాల వారీగా చూస్తే క్యాన్సర్ కేసులు నిరంతరం పెరుగుతున్న ధోరణి కనిపిస్తోంది. 2021లో 14.26 లక్షలుగా ఉన్న కొత్త కేసులు 2022లో 14.61 లక్షలు, 2023లో 14.97 లక్షలు, 2024లో 15.33 లక్షలకు చేరుకున్నాయి. 2025లో ఈ సంఖ్య 15.70 లక్షలకు చేరుతుందని అంచనా వేస్తున్నారు.

అదే విధంగా క్యాన్సర్ మరణాలు కూడా 2021లో 7.89 లక్షల నుంచి 2022లో 8.09 లక్షలు, 2023లో 8.28 లక్షలు, 2024లో 8.48 లక్షలు, 2025లో 8.69 లక్షలకు పెరుగుతాయని అంచనా వేశారు.

క్యాన్సర్ నియంత్రణ కోసం కేంద్ర ప్రభుత్వం రాష్ట్రాలకు ఆర్థిక, సాంకేతిక సహకారం అందిస్తోందని మంత్రి తెలిపారు. జాతీయ ఆరోగ్య మిషన్ కింద అసంక్రమిత వ్యాధుల నివారణ, నియంత్రణ కార్యక్రమం ద్వారా చర్యలు చేపడుతున్నట్లు చెప్పారు.

దేశవ్యాప్తంగా 770 జిల్లా స్థాయి అసంక్రమిత వ్యాధుల క్లినిక్‌లు, 6,410 కమ్యూనిటీ హెల్త్ సెంటర్లలో క్లినిక్‌లు ఏర్పాటు చేసినట్లు తెలిపారు. జిల్లా ఆసుపత్రుల్లో 524 డే కేర్ క్యాన్సర్ సెంటర్లు పనిచేస్తున్నాయని వెల్లడించారు.

30 ఏళ్లు పైబడిన వారిలో నోటి క్యాన్సర్, రొమ్ము క్యాన్సర్, గర్భాశయ ముఖద్వార క్యాన్సర్లను ముందుగానే గుర్తించేందుకు జనాభా ఆధారిత స్క్రీనింగ్ కార్యక్రమాలు నిర్వహిస్తున్నట్లు తెలిపారు.

ప్రత్యేక క్యాన్సర్ చికిత్స సదుపాయాలను బలోపేతం చేసేందుకు 19 రాష్ట్ర క్యాన్సర్ సంస్థలు, 20 అత్యున్నత స్థాయి క్యాన్సర్ కేంద్రాలు కలిపి మొత్తం 39 సంస్థలకు ఆమోదం తెలిపినట్లు కేంద్రం వెల్లడించింది.

పెరుగుతున్న క్యాన్సర్ భారాన్ని ఎదుర్కొనేందుకు ముందస్తు గుర్తింపు, మెరుగైన వైద్య సదుపాయాలు, ప్రజల్లో అవగాహన పెంపు కీలకమని కేంద్ర ప్రభుత్వం పేర్కొంది.