గాజాపై ట్రంప్‌ 15 అంశాల ప్రణాళికను ఇజ్రాయెల్‌ తిరస్కరణ

 ట్రంప్‌ ప్రతిపాదించిన 15 అంశాల ప్రణాళిక గాజాలో దీర్ఘకాలిక శాంతి, భద్రత, పరిపాలనకు మార్గం చూపించాలనే ఉద్దేశంతో రూపొందించబడినట్లు తెలుస్తోంది. ఈ ప్రణాళికలో హమాస్‌తో పాటు గాజాలోని ఇతర సాయుధ సంస్థలను పూర్తిగా నిరాయుధీకరించాలనే అంశానికి ప్రాధాన్యం ఉంది. అమెరికా మద్దతుతో పనిచేస్తున్న బోర్డ్‌ ఆఫ్‌ పీస్‌ గత నెలలో హమాస్‌, ఇతర సాయుధ సంస్థల పూర్తి నిరాయుధీకరణకు సంబంధించిన ఒప్పందం కుదిరిందని ప్రకటించింది. అయితే ఆ ప్రతిపాదన అమలులో ఇజ్రాయెల్‌ సైనిక ఉపసంహరణ, హమాస్‌ ఆయుధాల అప్పగింత వంటి అంశాలు పరస్పరం అనుసంధానమై ఉండటంతో వివాదం కొనసాగుతోంది. ఇజ్రాయెల్‌ ప్రధాని నెతన్యాహు ఆదివారం జరిగిన మంత్రివర్గ సమావేశంలో ఈ అంశంపై స్పష్టమైన వైఖరిని వెల్లడించారు. 15 అంశాల పత్రాన్ని ఇజ్రాయెల్‌ తిరస్కరిస్తోందని ఆయన ప్రకటించారు. హమాస్‌ నిజంగా నిరాయుధీకరణకు అంగీకరించి, దాన్ని అమలు చేసే వరకు ఇజ్రాయెల్‌ సైన్యం గాజా నుంచి వెనక్కి వెళ్లదని తెలిపారు. అంతేకాకుండా ఇజ్రాయెల్‌ సైనికులు, పౌరులకు ఎదురయ్యే ముప్పులను అడ్డుకునే చర్యలు కొనసాగుతాయని చెప్పారు. దీంతో గాజాలో భద్రతా నియంత్రణ విషయంలో ఇజ్రాయెల్‌ ఇప్పటికీ కఠినమైన వైఖరినే కొనసాగిస్తున్నట్లు స్పష్టమైంది.

ఇజ్రాయెల్‌ వైఖరికి ప్రధాన కారణం హమాస్‌ వద్ద ఉన్న ఆయుధాలేనని నెతన్యాహు పేర్కొన్నారు. హమాస్‌ ఆయుధాలు పూర్తిగా తొలగించబడకపోతే ఇజ్రాయెల్‌ బలగాలు వెనక్కి వెళ్లడం వల్ల భవిష్యత్తులో ఇజ్రాయెల్‌ పౌరులు, సైనికులపై మళ్లీ దాడులు జరిగే ప్రమాదం ఉందని ఇజ్రాయెల్‌ భావిస్తోంది. అందుకే ఏదైనా శాంతి ఒప్పందంలో హమాస్‌ సైనిక సామర్థ్యాన్ని పూర్తిగా తొలగించడం తప్పనిసరి అంశంగా ఉండాలని ఇజ్రాయెల్‌ పట్టుబడుతోంది. హమాస్‌ను కేవలం తాత్కాలికంగా నియంత్రించడం కాకుండా పూర్తిగా నిరాయుధీకరించాల్సిందేనని నెతన్యాహు ప్రభుత్వం స్పష్టం చేస్తోంది.

మరోవైపు హమాస్‌ మాత్రం ఆయుధాల అప్పగింతకు ముందు ఇజ్రాయెల్‌ తన సైనిక చర్యలను పూర్తిగా నిలిపివేయాలని కోరుతోంది. గాజాపై అన్ని రకాల దాడులను ఇజ్రాయెల్‌ ముగించి, తన బలగాలను గాజా నుంచి ఉపసంహరించుకున్న తర్వాతే భారీ ఆయుధాలను అప్పగించే అంశాన్ని పరిశీలించగలమని హమాస్‌ తెలిపింది. దీంతో ఇరుపక్షాల మధ్య ప్రధాన సమస్య ఒకదానితో ఒకటి ముడిపడి ఉంది. ఇజ్రాయెల్‌ ముందుగా హమాస్‌ నిరాయుధీకరణను కోరుతుండగా, హమాస్‌ ముందుగా ఇజ్రాయెల్‌ సైనిక ఉపసంహరణ, దాడుల ముగింపును కోరుతోంది.