ఝార్ఖండ్‌లో ఘోర ప్రమాదం.. బ్యాండ్ కళాకారుల్లో ఏడుగురు మృతి

ఝార్ఖండ్ రాష్ట్రంలోని రామ్‌గఢ్ జిల్లాలో జరిగిన ఘోర రోడ్డు ప్రమాదం తీవ్ర విషాదాన్ని మిగిల్చింది. బొగ్గుతో వెళ్తున్న లారీ ఎదురుగా వస్తున్న ప్రయాణికుల వ్యానును ఢీకొట్టడంతో ఏడుగురు అక్కడికక్కడే మృతిచెందగా, మరో వ్యక్తి తీవ్ర గాయాలతో ఆస్పత్రిలో చికిత్స పొందుతున్నాడు. మృతులంతా బ్యాండ్, తాషా బృందానికి చెందిన కళాకారులేనని పోలీసులు వెల్లడించారు.

ఈ ప్రమాదం రామ్‌గఢ్–బొకారో జాతీయ రహదారిపై అర్ధరాత్రి సమయంలో చోటుచేసుకుంది. ఓ కార్యక్రమంలో పాల్గొని తిరిగి స్వగ్రామాలకు వెళ్తున్న కళాకారులు ప్రయాణిస్తున్న వ్యానును వేగంగా వచ్చిన బొగ్గు లారీ ఢీకొట్టింది. ప్రాథమిక దర్యాప్తు ప్రకారం లారీ ఓవర్‌టేక్ చేసే ప్రయత్నంలో రాంగ్‌సైడ్‌లోకి వచ్చి ప్రమాదానికి కారణమైనట్లు అధికారులు అనుమానిస్తున్నారు.

ఢీకొట్టిన వేగానికి వ్యాను పూర్తిగా ధ్వంసమైంది. వాహనంలో చిక్కుకున్న వారిని స్థానికులు, పోలీసులు కలిసి బయటకు తీసి ఆస్పత్రికి తరలించారు. అయితే వారిలో ఏడుగురు అప్పటికే మృతి చెందినట్లు వైద్యులు నిర్ధారించారు. తీవ్రంగా గాయపడిన మరో వ్యక్తిని మెరుగైన చికిత్స కోసం రాంచీకి తరలించారు.

ప్రమాదంలో మృతిచెందినవారు మారంగ్‌మర్చా, బల్సగరా ప్రాంతాలకు చెందిన కళాకారులుగా గుర్తించారు. మృతదేహాలను పోస్టుమార్టం కోసం మార్చురీకి తరలించగా, కుటుంబ సభ్యులు కన్నీరుమున్నీరయ్యారు. ప్రమాదానికి కారణమైన లారీ డ్రైవర్‌పై చట్టపరమైన చర్యలు తీసుకుంటామని పోలీసులు తెలిపారు.

ఈ ఘటనపై ఆగ్రహం వ్యక్తం చేసిన స్థానికులు జాతీయ రహదారిపై నిరసన చేపట్టారు. తరచూ ప్రమాదాలు జరుగుతున్నప్పటికీ శాశ్వత భద్రతా చర్యలు తీసుకోవడం లేదని ఆరోపించారు. ఈ ప్రాంతాన్ని ప్రమాదకర ప్రాంతంగా గుర్తించి వేగ నియంత్రణ చర్యలు, హెచ్చరిక బోర్డులు, కట్టుదిట్టమైన ట్రాఫిక్ పర్యవేక్షణ ఏర్పాటు చేయాలని ప్రభుత్వాన్ని డిమాండ్ చేశారు. ప్రస్తుతం పోలీసులు కేసు నమోదు చేసి ప్రమాదానికి దారితీసిన ఖచ్చితమైన కారణాలపై దర్యాప్తు కొనసాగిస్తున్నారు.