112 పోలీసు వాహనానికి 71 ట్రాఫిక్ చలాన్లు

కర్ణాటకలో చట్టాన్ని అమలు చేయాల్సిన పోలీసు వాహనమే వరుసగా ట్రాఫిక్ నిబంధనలు ఉల్లంఘించిన ఘటన చర్చనీయాంశమైంది. అత్యవసర సేవల కోసం వినియోగించే ‘112’ పెట్రోలింగ్ వాహనంపై ఏకంగా 71 ట్రాఫిక్ ఉల్లంఘన కేసులు నమోదైనట్లు వెలుగులోకి వచ్చింది. ఈ విషయం సోషల్ మీడియాలో వైరల్ కావడంతో అధికారులు స్పందించారు.

Mysuruకు చెందిన న్యాయవాది పునీత్ ట్రాఫిక్ పోర్టల్‌లో పోలీసు పెట్రోలింగ్ వాహనం వివరాలను పరిశీలించగా, 2024 జూలై నుంచి 2026 జూన్ వరకు మొత్తం 71 చలాన్లు నమోదైనట్లు గుర్తించారు. అనంతరం ఈ వివరాలను సోషల్ మీడియాలో పోస్టు చేస్తూ, “ఈ జరిమానా ఎవరు చెల్లిస్తారు?” అని ప్రశ్నించారు.

KA-55-G-0433 నంబర్ కలిగిన ఈ వాహనంపై నమోదైన కేసుల్లో ఎక్కువ భాగం సీట్ బెల్ట్ ధరించకపోవడానికి సంబంధించినవే. నగరంలోని వివిధ ప్రాంతాల్లో ఏర్పాటు చేసిన ఇంటెలిజెంట్ ట్రాఫిక్ మేనేజ్‌మెంట్ సిస్టమ్ (ITMS) కెమెరాలు ఈ ఉల్లంఘనలను గుర్తించి ఆటోమేటిక్‌గా చలాన్లు నమోదు చేశాయి. మొత్తం జరిమానా సుమారు రూ.36,500 కాగా, ప్రస్తుతం రాయితీ తర్వాత కూడా రూ.18,250 బకాయి ఉన్నట్లు సమాచారం.

ఈ వ్యవహారంపై స్పందించిన మైసూర్ ట్రాఫిక్ డీసీపీ Sundar Raj, ట్రాఫిక్ చట్టాలు అందరికీ సమానంగా వర్తిస్తాయని స్పష్టం చేశారు. ప్రభుత్వ వాహనాలు అయినా, పోలీసు వాహనాలు అయినా నిబంధనలు ఉల్లంఘిస్తే చర్యలు తప్పవని చెప్పారు. సంబంధిత పెట్రోలింగ్ వాహనంపై నమోదైన కేసులను పరిశీలించి, బాధ్యులపై చర్యలు తీసుకుంటామని వెల్లడించారు.

పోలీసు శాఖకు చెందిన వాహనంపైనే ఇంత పెద్ద సంఖ్యలో ట్రాఫిక్ కేసులు నమోదవడం ప్రజల్లో చర్చకు దారితీసింది. చట్టాన్ని అమలు చేసే వ్యవస్థే నిబంధనలు ఉల్లంఘిస్తే ప్రజలకు తప్పుడు సంకేతాలు వెళ్తాయని పలువురు అభిప్రాయపడుతున్నారు. మరోవైపు, ఈ ఘటనపై విచారణకు ఆదేశాలు జారీ కావడం ప్రాధాన్యం సంతరించుకుంది.