పేదల భూముల ఆక్రమణపై కఠిన చర్యలు: కొల్లు రవీంద్ర

పేదలకు సేవ చేయాలనే ఉద్దేశంతో దాతలు అందించిన భూములను కాపాడుకోవడం ప్రతి ఒక్కరి బాధ్యత అని రాష్ట్ర గనులు, భూగర్భ వనరులు, ఎక్సైజ్ శాఖ మంత్రి కొల్లు రవీంద్ర అన్నారు. మచిలీపట్నంలోని చల్లరాస్తా సెంటర్‌లో నిర్వహించిన శ్రీ తమ్మన పిచ్చయ్యగారి ధర్మ సత్రం అభివృద్ధి కమిటీ ప్రమాణ స్వీకారోత్సవ కార్యక్రమంలో మంత్రి పాల్గొని కీలక వ్యాఖ్యలు చేశారు.

ఈ సందర్భంగా మంత్రి మాట్లాడుతూ పేదలకు మేలు చేయాలనే గొప్ప లక్ష్యంతో అనేక మంది దాతలు తమ ఆస్తులను, భూములను సమాజానికి అందించారని తెలిపారు. విద్య అందరికీ చేరాలనే ఉద్దేశంతో కొంతమంది దాతలు వందలాది ఎకరాల భూములను ఇచ్చి పాఠశాలలు, కళాశాలల నిర్మాణానికి సహకరించారని పేర్కొన్నారు. అలాగే అభాగ్యులకు అండగా నిలిచేందుకు ధర్మసత్రాలు, సేవా సంస్థలను ఏర్పాటు చేశారని వివరించారు.

ఇలాంటి ప్రజా ప్రయోజనాల కోసం ఇచ్చిన భూములను కొందరు స్వార్థ ప్రయోజనాల కోసం ఆక్రమించుకోవడం బాధాకరమని మంత్రి ఆవేదన వ్యక్తం చేశారు. దేవాలయాల భూములు, అపరకర్మ భూములు, విద్యాసంస్థలకు చెందిన ఆస్తులను ఆక్రమించే వారిని ఎట్టి పరిస్థితుల్లోనూ ఉపేక్షించేది లేదని స్పష్టం చేశారు.

ప్రజల ఆస్తులను రక్షించడం ప్రభుత్వం మాత్రమే కాకుండా సమాజంలోని ప్రతి ఒక్కరి బాధ్యత అని మంత్రి పేర్కొన్నారు. దాతల ఆశయాలను కాపాడుతూ ఆ భూములు భవిష్యత్ తరాలకు ఉపయోగపడేలా చర్యలు తీసుకోవాల్సిన అవసరం ఉందన్నారు.

శ్రీ తమ్మన పిచ్చయ్యగారి ధర్మ సత్రం చరిత్రను మంత్రి ఈ సందర్భంగా గుర్తు చేశారు. 1917 సంవత్సరంలో తమ్మన పిచ్చయ్యగారు అపరకర్మల కోసం ఈ సత్రాన్ని ఏర్పాటు చేశారని తెలిపారు. అనంతరం వారి వారసులు కూడా ఎంతో నిబద్ధతతో నిర్వహించారని చెప్పారు. అయితే కాలక్రమేణా నిర్వహణ భారంగా మారడంతో 1982లో ప్రభుత్వానికి అప్పగించినట్లు వివరించారు.

1984లో స్థానిక ప్రముఖులు, వాసవి బ్యాంకు చైర్మన్ సహకారంతో సత్రాన్ని తిరిగి ప్రారంభించినట్లు మంత్రి తెలిపారు. గతంలో అద్దె ఇళ్లలో నివసించే కుటుంబాల్లో ఎవరైనా మరణిస్తే అపరకర్మలకు ఇబ్బందులు ఎదురైన సందర్భాలను తాను చూశానని పేర్కొన్నారు. అందుకే అపరకర్మల కోసం కేటాయించిన భూములను రక్షించడంతో పాటు అభివృద్ధి చేయాల్సిన బాధ్యత ఉందన్నారు.

‘ధర్మో రక్షతి రక్షితః’ అనే సిద్ధాంతాన్ని తాను నమ్ముతానని మంత్రి తెలిపారు. మంచి పనులు చేసే వారిని అడ్డుకోవడం సరికాదని, సమాజానికి ఉపయోగపడే కార్యక్రమాలకు అందరూ సహకరించాలని కోరారు. ధర్మాన్ని కాపాడితే అదే మనల్ని కాపాడుతుందని అన్నారు.

అపరకర్మల కోసం కేటాయించిన భూములను రక్షించేందుకు ప్రతి ఒక్కరూ ముందుకు రావాలని మంత్రి పిలుపునిచ్చారు. ప్రజలకు ఉపయోగపడే ఆస్తులను కబ్జా చేసే ప్రయత్నాలను అడ్డుకోవాల్సిన అవసరం ఉందన్నారు. దుష్ట శక్తులకు తగిన గుణపాఠం తప్పదని హెచ్చరించారు.

తమ్మన పిచ్చయ్య ధర్మసత్రం అభివృద్ధికి తన వంతుగా రూ.5 లక్షల ఆర్థిక సహాయం అందిస్తానని మంత్రి కొల్లు రవీంద్ర ప్రకటించారు. అవసరమైతే దేవాదాయ శాఖ నుంచి కూడా నిధులు తీసుకొచ్చేందుకు చర్యలు తీసుకుంటానని తెలిపారు. భవిష్యత్ తరాల అవసరాలను దృష్టిలో ఉంచుకుని ఆధునిక సదుపాయాలతో కొత్త భవనం నిర్మించేలా కృషి చేస్తామని చెప్పారు.

బందరు నియోజకవర్గంలో ప్రజల ప్రయోజనం కోసం దాతలు ఇచ్చిన భూముల్లో ఎవరైనా ఆక్రమణలకు పాల్పడితే వాటిని తొలగించే బాధ్యత తీసుకుంటానని మంత్రి హామీ ఇచ్చారు. ప్రజా సేవకు ఉపయోగపడే ఆస్తులను పరిరక్షించడం ప్రభుత్వ ప్రధాన లక్ష్యమని స్పష్టం చేశారు.

ఈ కార్యక్రమంలో పార్టీ సీనియర్ నాయకులు గొర్రెపాటి గోపీచంద్, మున్సిపల్ మాజీ ఛైర్మన్ మోటమర్రి బాబాప్రసాద్ తదితర నాయకులు, కమిటీ సభ్యులు పాల్గొన్నారు.