కొండూరు ఉపాధి పనుల విచారణలో రసాభాసగా మారిన సభ

పెనగలూరు మండలం కొండూరు గ్రామ పంచాయతీలో ఉపాధి హామీ పథకం పనుల్లో అవకతవకలు జరిగాయనే ఫిర్యాదుపై అధికారుల విచారణ చేపట్టారు. జిల్లా కలెక్టర్‌కు మద్దెల ప్రసాద్ అందించిన ఫిర్యాదు మేరకు డ్వామా ప్రాజెక్టు డైరెక్టర్ ఆదేశాలతో ఏపీడీ మృత్యుంజయ నాయుడు గురువారం కొండూరు గ్రామ సచివాలయంలో విచారణ నిర్వహించారు. ఉపాధి కూలీల సమక్షంలో ఫిర్యాదుదారు చేసిన ఆరోపణలపై అధికారులు వివరాలు సేకరించారు. విచారణ జరుగుతున్న సమయంలో రెండు వర్గాల మధ్య వాగ్వాదం చోటుచేసుకోవడంతో సభ కొంతసేపు రసాభాసగా మారింది. పరిస్థితి అదుపు తప్పకుండా పోలీసులు జోక్యం చేసుకుని గొడవకు దిగిన వారిని అక్కడి నుంచి పంపించారు. అనంతరం అధికారులు విచారణ ప్రక్రియను కొనసాగించారు.

ఏపీడీ మృత్యుంజయ నాయుడు మాట్లాడుతూ ఉపాధి హామీ పథకంలో జరిగినట్లు భావిస్తున్న అవకతవకలకు సంబంధించి ఎవరి వద్దైనా ఆధారాలు ఉంటే వాటిని అధికారులకు అందించాలని సూచించారు. గ్రామంలోని ఉపాధి కూలీలు, ప్రజలు తమ వద్ద ఉన్న సమాచారం, ఆధారాలను పెనగలూరు ఉపాధి కార్యాలయంలో లేదా కోడూరు ఏపీడీ కార్యాలయంలో సమర్పించవచ్చని తెలిపారు. అందిన ఆధారాలను పరిశీలించి పూర్తి స్థాయి నివేదికను తయారు చేసి ఉన్నతాధికారులకు అందజేస్తామని చెప్పారు.

ఈ విచారణ కార్యక్రమంలో డిప్యూటీ ఎంపీడీవో శ్రీకాంత్, ఏపీవో మీనా కుమారి, ఉపాధి హామీ పథకం సిబ్బంది పాల్గొన్నారు. అధికారులు నిష్పక్షపాతంగా విచారణ జరిపి వాస్తవాలను వెలుగులోకి తీసుకువస్తామని తెలిపారు. ఉపాధి పనుల్లో పారదర్శకత ఉండేలా చర్యలు తీసుకుంటామని, అర్హులైన కూలీలకు న్యాయం జరిగేలా చూస్తామని వెల్లడించారు.