డాక్యుమెంట్ రైటర్లు అపోహలకు గురికావొద్దు: మంత్రి అనగాని

డాక్యుమెంట్ రైటర్ల ఆందోళనపై రాష్ట్ర మంత్రి అనగాని సత్యప్రసాద్ స్పందించారు. రిజిస్ట్రేషన్ కార్యాలయాల ప్రైవేటీకరణ జరుగుతుందనే ప్రచారం పూర్తిగా అవాస్తవమని స్పష్టం చేశారు. డాక్యుమెంట్ రైటర్లు ఎలాంటి అపోహలకు గురికావద్దని కోరారు. రిజిస్ట్రేషన్ వ్యవస్థలో ప్రభుత్వం తీసుకుంటున్న చర్యలు పారదర్శకత, ప్రజలకు మెరుగైన సేవలు అందించడమే లక్ష్యంగా ఉంటాయని తెలిపారు.

రిజిస్ట్రేషన్ ప్రక్రియలో దస్తావేజుల పరిశీలన పూర్తిగా సబ్ రిజిస్ట్రార్ పర్యవేక్షణలోనే జరుగుతుందని మంత్రి అనగాని సత్యప్రసాద్ పేర్కొన్నారు. రిజిస్ట్రేషన్ శాఖలో నిబంధనలకు అనుగుణంగానే ప్రతి ప్రక్రియ కొనసాగుతుందని తెలిపారు. ప్రజలకు ఇబ్బందులు లేకుండా సేవలను మరింత సులభతరం చేసే ఉద్దేశంతోనే మార్పులు తీసుకొస్తున్నామని వివరించారు.

ఇటీవల పబ్లిక్ ప్రైవేట్ పార్ట్‌నర్‌షిప్ విధానంపై డాక్యుమెంట్ రైటర్లు ఆందోళన వ్యక్తం చేస్తూ తమ ఉపాధికి నష్టం కలుగుతుందని ఆవేదన వ్యక్తం చేశారు. ఈ నేపథ్యంలో మంత్రి స్పందిస్తూ రిజిస్ట్రేషన్ కార్యాలయాల ప్రైవేటీకరణపై జరుగుతున్న ప్రచారంలో వాస్తవం లేదని స్పష్టం చేశారు. డాక్యుమెంట్ రైటర్ల సమస్యలను ప్రభుత్వం పరిగణనలోకి తీసుకుంటుందని తెలిపారు.

రిజిస్ట్రేషన్ వ్యవస్థలో పనిచేస్తున్న ప్రతి వర్గం ప్రయోజనాలను దృష్టిలో ఉంచుకుని ప్రభుత్వం నిర్ణయాలు తీసుకుంటుందని మంత్రి పేర్కొన్నారు. ఎలాంటి అనుమానాలు ఉన్నా అధికారులను సంప్రదించి పూర్తి వివరాలు తెలుసుకోవాలని సూచించారు. ప్రజలకు మెరుగైన సేవలు అందించడంతో పాటు సిబ్బంది, అనుబంధ వర్గాల సమస్యలను పరిష్కరించే దిశగా ప్రభుత్వం పనిచేస్తుందని తెలిపారు.