జగన్ అరాచక పాలనకు చరమగీతం పాడాలి.. కూటమితోనే రాష్ట్ర అభివృద్ధి: మంత్రి కొల్లు రవీంద్ర

ఆంధ్రప్రదేశ్‌లో అభివృద్ధి, సంక్షేమం కూటమి ప్రభుత్వంతోనే సాధ్యమవుతుందని రాష్ట్ర గనులు, భూగర్భ వనరులు, ఎక్సైజ్ శాఖ మంత్రి కొల్లు రవీంద్ర అన్నారు. అనకాపల్లిలో నిర్వహించిన కూటమి ప్రభుత్వం రెండేళ్ల పాలనలో సాధించిన అభివృద్ధి, సంక్షేమ కార్యక్రమాల బహిరంగ సభలో పాల్గొన్న ఆయన, వైసీపీ హయాంలో రాష్ట్రం విధ్వంసం దిశగా వెళ్లిందని విమర్శించారు. రాష్ట్రాన్ని తిరిగి అభివృద్ధి మార్గంలో నడిపించేందుకు ప్రజలు కూటమికి భారీ మెజారిటీ ఇచ్చారని పేర్కొన్నారు.

జగన్ రెడ్డి పాలనలో అన్ని వ్యవస్థలు దెబ్బతిన్నాయని, ప్రజాస్వామ్య విలువలు క్షీణించాయని ఆరోపించిన మంత్రి, కులం, మతం, ప్రాంతీయ విద్వేషాలను రెచ్చగొట్టి అధికారంలోకి వచ్చిన వైసీపీ ప్రభుత్వం రాష్ట్రాన్ని ఆర్థిక, సామాజిక సంక్షోభంలోకి నెట్టిందన్నారు. ప్రజల సమస్యలు చెప్పుకునే అవకాశం కూడా లేకుండా అణచివేత పాలన సాగిందని విమర్శించారు.

కూటమి ప్రభుత్వం అధికారంలోకి వచ్చిన తర్వాత ఎన్నికల్లో ఇచ్చిన హామీలను అమలు చేస్తోందని కొల్లు రవీంద్ర తెలిపారు. పెన్షన్లు, ‘తల్లికి వందనం’, ‘అన్నదాత సుఖీభవ’, ‘స్త్రీ శక్తి’ వంటి పథకాల ద్వారా కోట్లాది మంది లబ్ధిదారులకు ప్రయోజనం కల్పిస్తున్నామని చెప్పారు. వివిధ వర్గాల సంక్షేమం కోసం ప్రత్యేక కార్యక్రమాలు అమలు చేస్తున్నామని పేర్కొన్నారు.

రాష్ట్ర అభివృద్ధికి కేంద్ర ప్రభుత్వ సహకారంతో కీలక ప్రాజెక్టులు వేగంగా ముందుకు సాగుతున్నాయని మంత్రి వెల్లడించారు. పోలవరం ప్రాజెక్టును 2027 నాటికి పూర్తి చేయడమే లక్ష్యమని, అమరావతి రాజధాని పనులు తిరిగి ప్రారంభమయ్యాయని తెలిపారు. విశాఖ ఉక్కు కర్మాగారానికి పునరుజ్జీవం కల్పించడం, రైల్వే జోన్ సాధించడం, భారీ పెట్టుబడులను ఆకర్షించడం కూటమి ప్రభుత్వ విజయాలుగా పేర్కొన్నారు.

ఉద్యోగాల అంశంపై మాట్లాడుతూ, మెగా డీఎస్సీ ద్వారా వేలాది ఉపాధ్యాయ పోస్టులను భర్తీ చేస్తున్నామని చెప్పారు. డీఎస్సీ నియామకాలపై వైసీపీ చేస్తున్న ఆరోపణలను ఖండిస్తూ, ఆధారాలు లేకుండా తప్పుడు ప్రచారం చేస్తున్నారని విమర్శించారు.

హోంమంత్రి పై వైసీపీ నేతలు చేసిన వ్యాఖ్యలను కూడా మంత్రి తీవ్రంగా ఖండించారు. మహిళలను అవమానించే విధంగా మాట్లాడటం బాధాకరమని, ప్రజాస్వామ్య రాజకీయాల్లో అలాంటి భాషకు స్థానం లేదని అన్నారు.

మద్యం విధానంపై స్పందిస్తూ, వైసీపీ హయాంలో భారీ మద్యం కుంభకోణాలు జరిగాయని ఆరోపించారు. కూటమి ప్రభుత్వం కొత్త విధానం తీసుకువచ్చి అక్రమాలను అరికట్టేందుకు చర్యలు తీసుకుంటోందని చెప్పారు. కల్తీ మద్యం బ్రాండ్లను తొలగించి ప్రజల ఆరోగ్య రక్షణకు ప్రాధాన్యత ఇస్తున్నామని పేర్కొన్నారు.

రాష్ట్రంలో స్థిరమైన పాలన కొనసాగితేనే అభివృద్ధి సాధ్యమని, గుజరాత్, ఒడిశా వంటి రాష్ట్రాలు దీనికి ఉదాహరణలని మంత్రి కొల్లు రవీంద్ర అన్నారు. ప్రజల సహకారంతో ఆంధ్రప్రదేశ్‌ను దేశంలోనే అగ్రగామి రాష్ట్రంగా తీర్చిదిద్దుతామని, కూటమి ప్రభుత్వం అభివృద్ధి, సంక్షేమ లక్ష్యాలతో ముందుకు సాగుతుందని స్పష్టం చేశారు.