ప్రజల సహకారంతోనే స్వచ్ఛ అనంత సాధ్యం: ఎమ్మెల్యే దగ్గుపాటి

అనంతపురం నగరాన్ని పరిశుభ్రంగా, అభివృద్ధి చెందిన నగరంగా తీర్చిదిద్దేందుకు ప్రజల సహకారం అత్యంత అవసరమని అనంతపురం అర్బన్ ఎమ్మెల్యే దగ్గుపాటి ప్రసాద్ పేర్కొన్నారు. స్వర్ణాంధ్ర–స్వచ్ఛాంధ్ర కార్యక్రమంలో భాగంగా కొవ్వూరు నగర్‌లో నిర్వహించిన ప్రత్యేక పారిశుద్ధ్య కార్యక్రమంలో ఆయన పాల్గొన్నారు. ఈ కార్యక్రమంలో మున్సిపల్ కమిషనర్ జస్వంత్ కుమార్, అధికారులు, ప్రజాప్రతినిధులు, టీడీపీ నాయకులు, స్థానిక ప్రజలు పాల్గొన్నారు.

కార్యక్రమంలో భాగంగా ఎమ్మెల్యే దగ్గుపాటి ప్రసాద్ స్వయంగా చీపురు పట్టి రోడ్లపై చెత్త ఊడ్చారు. కమిషనర్ జస్వంత్ కుమార్‌తో కలిసి పరిశుభ్రత కార్యక్రమాల్లో పాల్గొంటూ ప్రజలకు అవగాహన కల్పించారు. ప్రతి ఇంటికి పరిశుభ్రతపై అవగాహన కలిగించే పోస్టర్లు అతికిస్తూ స్వచ్ఛ అనంత లక్ష్యాలను ప్రజలకు వివరించారు. నగరాన్ని పరిశుభ్రంగా ఉంచేందుకు ప్రతి ఒక్కరూ బాధ్యతగా వ్యవహరించాలని కోరారు.

స్వచ్ఛ అనంత కోసం కట్టుబడి ఉంటామని ప్రజలతో ప్రతిజ్ఞ చేయించిన ఎమ్మెల్యే, అనంతరం కాలనీల్లో పర్యటిస్తూ రోడ్లు, డ్రైనేజీలు, మౌలిక సదుపాయాల పరిస్థితిని పరిశీలించారు. స్థానికుల సమస్యలను తెలుసుకుని అధికారులకు తగిన సూచనలు చేశారు. నగర అభివృద్ధి కోసం ప్రభుత్వం ప్రత్యేక కార్యాచరణతో ముందుకు సాగుతోందని తెలిపారు.

ఈ సందర్భంగా ఎమ్మెల్యే మాట్లాడుతూ నగరంలో పారిశుద్ధ్య పరిస్థితులను మెరుగుపరచడానికి అన్ని చర్యలు తీసుకుంటున్నామని చెప్పారు. ప్రతి రోజు ఇంటింటా చెత్త సేకరణ జరుగుతున్నప్పటికీ కొందరు రోడ్లపై చెత్త వేయడం, ప్లాస్టిక్ వ్యర్థాలను డ్రైనేజీల్లో పడేయడం వల్ల సమస్యలు తలెత్తుతున్నాయని అన్నారు. ప్లాస్టిక్ వ్యర్థాలు డ్రైనేజీల్లో పేరుకుపోవడంతో నీటి ప్రవాహానికి ఆటంకం ఏర్పడి, చిన్నపాటి వర్షాలకే రోడ్లపై నీరు నిలిచిపోతుందని వివరించారు.

నగరంలో రోజురోజుకు జనాభా పెరుగుతున్న నేపథ్యంలో ప్రస్తుత డ్రైనేజీ వ్యవస్థపై ఒత్తిడి పెరుగుతోందని ఎమ్మెల్యే పేర్కొన్నారు. గత ఐదేళ్లలో డ్రైనేజీ వ్యవస్థ అభివృద్ధిపై సరైన దృష్టి పెట్టకపోవడం వల్ల అనేక ప్రాంతాల్లో సమస్యలు తీవ్రమయ్యాయని విమర్శించారు. డ్రైనేజీలు పూడికతో నిండిపోయినా వాటి నిర్వహణపై శ్రద్ధ చూపలేదని ఆరోపించారు.

ప్రస్తుతం ఆ సమస్యలను పరిష్కరించేందుకు ప్రభుత్వం కృషి చేస్తోందని చెప్పారు. జనశక్తి నగర్‌తో పాటు పలు ప్రాంతాల్లో మూడు దశాబ్దాలుగా కొనసాగుతున్న సమస్యలకు పరిష్కారం చూపుతున్నామని వెల్లడించారు. వంకలు, కాల్వలపై ఉన్న ఆక్రమణలను తొలగించి శాశ్వత పరిష్కారానికి చర్యలు తీసుకుంటున్నామని తెలిపారు. నగరంలోని రోడ్లు, డ్రైనేజీలు మరియు ఇతర మౌలిక సదుపాయాల అభివృద్ధి కోసం ఇప్పటికే రూ.180 కోట్ల వరకు ఖర్చు చేసినట్లు వెల్లడించారు.

మున్సిపల్ కమిషనర్ జస్వంత్ కుమార్ మాట్లాడుతూ నగర పారిశుద్ధ్యంపై ఎమ్మెల్యే ప్రత్యేక దృష్టి సారిస్తున్నారని చెప్పారు. ప్రతిరోజూ పరిస్థితులను సమీక్షిస్తూ అవసరమైన సూచనలు చేస్తున్నారని తెలిపారు. నగర పాలక సంస్థ సిబ్బంది ఇంటింటికి వెళ్లి చెత్త సేకరిస్తున్నారని, అదనంగా ప్రైవేట్ వాహనాలను కూడా అద్దెకు తీసుకుని సేవలను విస్తరించామని వెల్లడించారు.

పారిశుద్ధ్య పనులను మరింత సమర్థవంతంగా నిర్వహించేందుకు అదనంగా 25 మంది సిబ్బందిని నియమించినట్లు కమిషనర్ తెలిపారు. అయితే ప్రజల సహకారం లేకుండా ఎంత ప్రయత్నించినా ఆశించిన ఫలితాలు సాధ్యం కావని స్పష్టం చేశారు. చెత్త సేకరణ వాహనాలు వచ్చినప్పుడు చెత్తను అందించడం ప్రజలు చేయాల్సిన కనీస బాధ్యత అని పేర్కొన్నారు. ఒకరోజు చెత్త ఇవ్వలేకపోయినా మరుసటి రోజు అందజేయవచ్చని సూచించారు.

నగరంలో ఉన్న సమస్యలను దశలవారీగా పరిష్కరిస్తూ ముందుకు వెళ్తున్నామని, గతంతో పోలిస్తే ప్రస్తుతం పరిస్థితులు గణనీయంగా మెరుగుపడ్డాయని కమిషనర్ పేర్కొన్నారు. ప్రభుత్వం, మున్సిపల్ అధికారులు, ప్రజల భాగస్వామ్యంతో అనంతపురాన్ని పరిశుభ్రమైన, ఆరోగ్యవంతమైన నగరంగా తీర్చిదిద్దడమే లక్ష్యమని తెలిపారు.

స్వర్ణాంధ్ర–స్వచ్ఛాంధ్ర కార్యక్రమం కేవలం ప్రభుత్వ కార్యక్రమం మాత్రమే కాదని, ప్రతి పౌరుడి బాధ్యతగా భావించి అందరూ భాగస్వాములు కావాలని ఎమ్మెల్యే దగ్గుపాటి ప్రసాద్ పిలుపునిచ్చారు. ప్రజల సహకారంతోనే స్వచ్ఛ అనంత లక్ష్యం సాధ్యమవుతుందని ఆయన స్పష్టం చేశారు.