విద్యార్థుల సైన్స్ యాత్రకు శ్రీకారం చుట్టిన కాకర్ల సురేష్

ఉదయగిరి ఎమ్మెల్యే కాకర్ల సురేష్ విద్యార్థులలో శాస్త్రీయ దృక్పథాన్ని పెంపొందించే లక్ష్యంతో నిర్వహించిన సైన్స్ యాత్రను ప్రారంభించారు. డాక్టర్ జి. విజయ్ కుమార్ మెమోరియల్ ట్రస్ట్ ఆధ్వర్యంలో, జిల్లా విద్యాశాఖ సహకారంతో వింజమూరు జడ్పీహెచ్‌ఎస్‌లో నిర్వహించిన కార్యక్రమంలో ఆయన సైన్స్ యాత్ర బస్సుకు పచ్చజెండా ఊపారు. అనంతరం పాఠశాల ఆవరణలో మొక్క నాటి పర్యావరణ పరిరక్షణపై విద్యార్థులకు అవగాహన కల్పించారు.

ఈ సందర్భంగా ఎమ్మెల్యే కాకర్ల సురేష్ మాట్లాడుతూ, విద్యార్థుల్లో శాస్త్రీయ దృక్పథం, పరిశోధనా తత్వం, సైన్స్‌పై ఆసక్తి పెంపొందించడంలో ఇటువంటి యాత్రలు కీలక పాత్ర పోషిస్తాయని అన్నారు. పాఠ్యపుస్తకాలలోని అంశాలను ప్రత్యక్షంగా పరిశీలించడం ద్వారా విద్యార్థుల్లో సృజనాత్మకత, విశ్లేషణాత్మక ఆలోచన పెరుగుతుందని తెలిపారు. భవిష్యత్తులో శాస్త్ర, సాంకేతిక రంగాల్లో రాణించేందుకు ప్రతి అవకాశాన్ని సద్వినియోగం చేసుకోవాలని సూచించారు.

సైన్స్ యాత్రలో భాగంగా విద్యార్థులు జిల్లా సైన్స్ సెంటర్‌ను సందర్శించి శాస్త్రీయ నమూనాలు, ప్రయోగాలు, విజ్ఞాన ప్రదర్శనలను పరిశీలించనున్నారు. అనంతరం జిల్లా మ్యూజియంలో చారిత్రక, సాంస్కృతిక వారసత్వానికి సంబంధించిన విశేషాలను తెలుసుకోనున్నారు. అలాగే సర్ సి.వి. రామన్ సైన్స్ సెంటర్‌లో ఆధునిక శాస్త్ర సాంకేతిక పరిజ్ఞానం, వినూత్న ఆవిష్కరణలపై అవగాహన పొందనున్నారు.

ఈ కార్యక్రమంలో మండల నాయకులు, ప్రజాప్రతినిధులు, డాక్టర్ జి. విజయ్ కుమార్ మెమోరియల్ ట్రస్ట్ ప్రతినిధులు, ఉపాధ్యాయులు, విద్యార్థులు పాల్గొన్నారు. విద్యార్థుల్లో శాస్త్ర విజ్ఞానంపై ఆసక్తిని పెంపొందించేందుకు ఇటువంటి కార్యక్రమాలను మరింత విస్తృతంగా నిర్వహించాలని పలువురు అభిప్రాయపడ్డారు.