మున్సిపల్ కార్మికుల సంక్షేమమే ప్రభుత్వ లక్ష్యం: బొండా ఉమ

మున్సిపల్ కార్మికుల సంక్షేమానికి కూటమి ప్రభుత్వం అత్యంత ప్రాధాన్యత ఇస్తోందని సెంట్రల్ నియోజకవర్గ ఎమ్మెల్యే బొండా ఉమామహేశ్వరరావు తెలిపారు. విజయవాడ సెంట్రల్ నియోజకవర్గం 36వ డివిజన్ గాంధీనగర్‌లోని కందుకూరి కళ్యాణ మండపంలో TNTUC అనుబంధ యూనివర్సల్ మున్సిపల్ వర్కర్స్ అండ్ ఎంప్లాయీస్ యూనియన్ నగర శాఖ, వెహికల్ డిపో కమిటీ సమావేశం నిర్వహించారు. ఈ సమావేశంలో నూతన నగర కమిటీని ఏకగ్రీవంగా ఎన్నుకున్నారు.

ఈ కార్యక్రమానికి ప్రభుత్వ విప్, సెంట్రల్ నియోజకవర్గ ఎమ్మెల్యే బొండా ఉమామహేశ్వరరావు, ఏపీ స్వచ్ఛాంధ్ర కార్పొరేషన్ ఛైర్మన్ కొమ్మారెడ్డి పట్టాభి ముఖ్య అతిథులుగా హాజరయ్యారు. ఆంధ్రప్రదేశ్ బిల్డింగ్స్ అండ్ అదర్ కన్స్‌ట్రక్షన్ వర్కర్స్ అడ్వైజరీ కమిటీ ఛైర్మన్, TNTUC రాష్ట్ర అధ్యక్షుడు గొట్టుముక్కల రఘురామరాజు అధ్యక్షత వహించారు.

ఈ సందర్భంగా ఎమ్మెల్యే బొండా ఉమ మాట్లాడుతూ రాష్ట్రంలోని అంగన్‌వాడీ టీచర్లు, హెల్పర్లు, మున్సిపల్ పారిశుద్ధ్య సిబ్బంది, ఆశా వర్కర్లు వంటి చిరు ఉద్యోగుల సంక్షేమానికి ప్రభుత్వం ప్రత్యేక శ్రద్ధ చూపుతోందని తెలిపారు. ఈ వర్గాల సమస్యలను అసెంబ్లీలో ప్రస్తావిస్తూ, వారికి ప్రభుత్వ సంక్షేమ పథకాలు మరింత చేరువయ్యేలా కృషి చేస్తున్నామని పేర్కొన్నారు.

రాష్ట్రం ఆర్థిక సవాళ్లను ఎదుర్కొంటున్నప్పటికీ ముఖ్యమంత్రి నాయకత్వంలోని కూటమి ప్రభుత్వం ప్రజలకు ఇచ్చిన హామీలను అమలు చేస్తూ ముందుకు సాగుతోందని అన్నారు. తల్లికి వందనం వంటి సంక్షేమ పథకాల ద్వారా అనేక కుటుంబాలకు ఆర్థిక భరోసా కల్పిస్తున్నామని తెలిపారు.

మున్సిపల్ కార్మికులు నగర పరిశుభ్రతకు కీలకంగా పనిచేస్తున్నారని ఎమ్మెల్యే పేర్కొన్నారు. వారి సేవలను గుర్తించి ఉద్యోగ భద్రత, సంక్షేమం, హక్కుల పరిరక్షణకు ప్రభుత్వం కట్టుబడి ఉందని స్పష్టం చేశారు. కార్మికుల సమస్యలను పరిష్కరించేందుకు ప్రభుత్వం ప్రత్యేక చర్యలు తీసుకుంటోందని, భవిష్యత్తులో మరిన్ని సంక్షేమ కార్యక్రమాలు అమలు చేస్తామని తెలిపారు.

అనంతరం నూతనంగా ఎన్నికైన యూనివర్సల్ మున్సిపల్ వర్కర్స్ అండ్ ఎంప్లాయీస్ యూనియన్ నగర శాఖ, వెహికల్ డిపో కమిటీ సభ్యులను ఎమ్మెల్యే బొండా ఉమ అభినందించారు. కార్మికుల సంక్షేమం కోసం యూనియన్ మరింత సమర్థవంతంగా పనిచేయాలని ఆకాంక్షించారు.

ఈ సమావేశంలో TNTUC నాయకులు, మున్సిపల్ కార్మిక సంఘాల ప్రతినిధులు, యూనియన్ సభ్యులు, ప్రజాప్రతినిధులు, తెలుగుదేశం పార్టీ నాయకులు, కార్యకర్తలు పాల్గొన్నారు. మున్సిపల్ కార్మికుల సమస్యల పరిష్కారం, వారి సంక్షేమం కోసం సమిష్టిగా పనిచేయాలని నాయకులు పిలుపునిచ్చారు.