ఏపీలో ఆటోమోటివ్ EV ఎకో సిస్టమ్ అభివృద్ధి చేస్తున్నాం: లోకేష్

దక్షిణ కొరియా రాజధాని సియోల్‌లో నిర్వహించిన కొరియా ఆటో ఇండస్ట్రీస్ రౌండ్ టేబుల్ సమావేశంలో రాష్ట్ర విద్య, ఐటీ, ఎలక్ట్రానిక్స్ శాఖల మంత్రి నారా లోకేష్ పాల్గొన్నారు. ఈ సందర్భంగా ఆంధ్రప్రదేశ్‌ను దేశంలోనే ప్రముఖ ఎలక్ట్రిక్ వాహనాల తయారీ కేంద్రంగా తీర్చిదిద్దే లక్ష్యంతో ప్రభుత్వం చేపడుతున్న చర్యలను అంతర్జాతీయ పారిశ్రామికవేత్తలకు వివరించారు. పెట్టుబడులకు అనుకూలమైన పారిశ్రామిక వాతావరణం, మౌలిక సదుపాయాలు, నైపుణ్యం కలిగిన మానవ వనరులు రాష్ట్ర బలమని ఆయన పేర్కొన్నారు.

ఆంధ్రప్రదేశ్‌లో సమగ్ర ఆటోమోటివ్ ఈవీ ఎకో సిస్టమ్‌ను అభివృద్ధి చేస్తున్నామని మంత్రి నారా లోకేష్ తెలిపారు. పుంగనూరులో ప్రత్యేక ఈవీ క్లస్టర్‌ను ఏర్పాటు చేస్తున్నామని, రాష్ట్రవ్యాప్తంగా ప్రతి 30 కిలోమీటర్లకు ఒక ఎలక్ట్రిక్ వాహన ఛార్జింగ్ స్టేషన్ ఏర్పాటు చేసే లక్ష్యంతో ప్రభుత్వం ముందుకు సాగుతోందని వెల్లడించారు. దీంతో ఎలక్ట్రిక్ వాహనాల వినియోగానికి అవసరమైన మౌలిక వసతులు మరింత బలోపేతం అవుతాయని చెప్పారు.

ఎలక్ట్రిక్ వాహనాల తయారీలో కీలకమైన ఈవీ మాగ్నెట్ల ఉత్పత్తి కోసం కేంద్ర ప్రభుత్వ సహకారంతో రేర్ ఎర్త్ కారిడార్‌ను అభివృద్ధి చేస్తున్నామని మంత్రి తెలిపారు. భవిష్యత్ అవసరాలను దృష్టిలో ఉంచుకుని ఎలక్ట్రిక్ వాహనాల తయారీ పరిశ్రమలకు అవసరమైన ముడి పదార్థాల సరఫరా వ్యవస్థను బలోపేతం చేయడంపై ప్రభుత్వం ప్రత్యేక దృష్టి సారించిందన్నారు. ఈ చర్యలు రాష్ట్రాన్ని ప్రపంచ స్థాయి ఈవీ తయారీ గమ్యస్థానంగా నిలబెడతాయని ఆయన విశ్వాసం వ్యక్తం చేశారు.

కియా పరిశ్రమ, శ్రీసిటీ పరిసర ప్రాంతాల్లో ఆటో కాంపోనెంట్ పార్కులను అభివృద్ధి చేస్తున్నామని నారా లోకేష్ వెల్లడించారు. పెద్ద ఎత్తున ఆటోమొబైల్, ఈవీ అనుబంధ పరిశ్రమలు రాష్ట్రానికి రావడానికి ప్రభుత్వం అన్ని విధాలా ప్రోత్సాహం అందిస్తోందన్నారు. అంతర్జాతీయ సంస్థలకు వేగవంతమైన అనుమతులు, ప్రపంచ స్థాయి మౌలిక వసతులు, ఎగుమతులకు అనుకూలమైన రవాణా వ్యవస్థను అందుబాటులో ఉంచుతున్నామని తెలిపారు. ఆంధ్రప్రదేశ్‌ను ఆటోమోటివ్, ఎలక్ట్రిక్ వాహనాల రంగంలో ప్రపంచ పెట్టుబడిదారులకు అత్యంత ఆకర్షణీయ గమ్యస్థానంగా తీర్చిదిద్దడమే ప్రభుత్వ లక్ష్యమని మంత్రి నారా లోకేష్ స్పష్టం చేశారు.