థాయ్‌లాండ్‌లో 15 కోట్ల ఏళ్ల నాటి కొత్త డైనోసార్ జాతి గుర్తింపు

థాయ్‌లాండ్‌లోని ఈశాన్య ప్రాంతంలో ఉన్న కలాసిన్ ప్రావిన్స్‌లో శాస్త్రవేత్తలు సుమారు 15 కోట్ల సంవత్సరాల నాటి కొత్త డైనోసార్ జాతిని గుర్తించారు. ఈ కొత్త జాతికి ‘ఉరగాసారస్ కలాసినెన్సిస్’ (Uragasaurus kalasinensis) అనే పేరు పెట్టారు. మొక్కలను ఆహారంగా తీసుకునే ఈ భారీ డైనోసార్ అసాధారణంగా పొడవైన మెడను కలిగి ఉండేదని, దీని మొత్తం పొడవు సుమారు 20 మీటర్లు (66 అడుగులు) ఉండేదని పరిశోధకులు వెల్లడించారు. ఇది దాదాపు ఒక క్రికెట్ పిచ్ పొడవుతో సమానమని వారు తెలిపారు. ఈ ఆవిష్కరణ జురాసిక్ యుగంలో ఆసియాలో సంచరించిన భారీ శాకాహార డైనోసార్ల పరిణామంపై కొత్త అవగాహనను అందిస్తుందని శాస్త్రవేత్తలు భావిస్తున్నారు. ఈ పరిశోధనకు థాయ్‌లాండ్‌లోని మహాసారఖామ్ విశ్వవిద్యాలయానికి చెందిన డాక్టర్ అపిరత్ నిల్ఫనాఫాన్ నాయకత్వం వహించారు. ఆయన తెలిపిన వివరాల ప్రకారం, ఈ కొత్త డైనోసార్‌కు సంబంధించిన శిలాజం కలాసిన్ ప్రావిన్స్‌లోని ఫు నోయ్ అనే ప్రాంతంలో లభించిన విస్తృత శిలాజ సేకరణలో భాగం. ఈ ప్రాంతం మొదటిసారిగా 2008లో గుర్తించబడింది. అప్పట్లో ఓ స్థానిక వ్యక్తికి నేలలో పాముల పొలుసుల్లా కనిపించే రాతి ముక్కలు కనిపించడంతో పురావస్తు శాస్త్రవేత్తలకు సమాచారం అందించాడు. అనంతరం అక్కడ చేపట్టిన తవ్వకాల్లో అనేక విలువైన శిలాజాలు వెలుగులోకి వచ్చాయి. ఫు నోయ్ ప్రాంతం చివరి జురాసిక్ యుగానికి చెందిన అత్యంత ముఖ్యమైన శిలాజ క్షేత్రంగా గుర్తింపు పొందింది. అక్కడ లభించిన శిలాజాల్లో 90 శాతానికి పైగా డైనోసార్‌లకు చెందిన ఎముకల ముక్కలేనని పరిశోధకులు తెలిపారు. వీటితో పాటు డైనోసార్ పళ్లు, ఎముకలు, ఇతర ప్రాచీన జీవుల అవశేషాలు కూడా లభించాయి. ఈ ప్రాంతం గతంలో జీవవైవిధ్యంతో నిండిన సహజ వాతావరణంగా ఉండేదని శాస్త్రవేత్తలు అంచనా వేస్తున్నారు.

కొత్త డైనోసార్ జాతిని గుర్తించడంలో కీలక పాత్ర పోషించినది వెన్నెముక మధ్య భాగానికి చెందిన ఒక ప్రత్యేక ఎముక. దీనిని డోర్సల్ వెర్టిబ్రా అని పిలుస్తారు. ఈ ఎముక ఆకృతి, నిర్మాణం, ఇతర డైనోసార్‌లతో పోలిస్తే కనిపించిన ప్రత్యేక లక్షణాలు దీనిని కొత్త జాతిగా గుర్తించడానికి ఆధారమయ్యాయి. ఇప్పటికే తెలిసిన ఇతర శాకాహార డైనోసార్‌ల ఎముకలతో పోల్చిన తర్వాత ఇది పూర్తిగా కొత్త జాతి అని శాస్త్రవేత్తలు నిర్ధారించారు.