వోకింగ్ పిజ్జా ఘటనపై పిజ్జా ఎక్స్‌ప్రెస్ అంతర్గత విచారణ

బ్రిటన్ రాజకుటుంబానికి చెందిన ఆండ్రూ మౌంట్‌బ్యాటన్ విండ్సర్ చేసిన వోకింగ్ పిజ్జా రెస్టారెంట్ సందర్శన వాదనపై పిజ్జా ఎక్స్‌ప్రెస్ సంస్థ అంతర్గతంగా విచారణ నిర్వహించినట్లు తాజాగా వెలుగులోకి వచ్చింది. ఈ విషయాన్ని బీబీసీ న్యూస్‌నైట్ తన పరిశోధనలో వెల్లడించింది. అయితే ఆ విచారణలో ఆయన నిజంగా ఆ రెస్టారెంట్‌కు వచ్చారా లేదా అనే విషయంపై ఎలాంటి స్పష్టమైన ఆధారాలు లభించలేదని సమాచారం.వర్జీనియా జియుఫ్రే తనపై చేసిన ఆరోపణల్లో, 2001 మార్చి 10న తాను ఆండ్రూ మౌంట్‌బ్యాటన్ విండ్సర్‌తో కలిసి భోజనం చేసి, అనంతరం నైట్‌క్లబ్‌కు వెళ్లి, తర్వాత లండన్‌లోని బెల్‌గ్రేవియాలో ఘిస్లేన్ మాక్స్‌వెల్ నివాసంలో లైంగిక దాడికి గురైనట్లు పేర్కొన్నారు. ఆ సమయంలో తన వయసు కేవలం 17 సంవత్సరాలని ఆమె ఆరోపించారు. ఈ ఆరోపణలను ఆండ్రూ మౌంట్‌బ్యాటన్ విండ్సర్ మొదటి నుంచి పూర్తిగా ఖండిస్తూ వస్తున్నారు . 2019లో బీబీసీ న్యూస్‌నైట్‌కు ఇచ్చిన ఇంటర్వ్యూలో ఆండ్రూ మౌంట్‌బ్యాటన్ విండ్సర్ తనపై వచ్చిన లైంగిక ఆరోపణలను ఖండిస్తూ, 2001 మార్చి 10న తాను సర్రేలోని వోకింగ్ పట్టణంలోని పిజ్జా ఎక్స్‌ప్రెస్ రెస్టారెంట్‌లో ఉన్నానని చెప్పారు. ఆ రోజు తాను కుటుంబ సభ్యులతో కలిసి అక్కడికి వెళ్లినందున తనపై వచ్చిన ఆరోపణలు నిజం కావని ఆయన పేర్కొన్నారు. ఈ వ్యాఖ్యలు అప్పట్లో ప్రపంచవ్యాప్తంగా తీవ్ర చర్చకు దారితీశాయి.