జూలైలోగా రాష్ట్రమంతా సంజీవని అమలు – సీఎం చంద్రబాబు

రాష్ట్ర ప్రజల ఆరోగ్యాన్ని మెరుగుపరచేందుకు సంజీవని ప్రాజెక్టును జూలైలోగా రాష్ట్రమంతా అమలు చేయాలని ముఖ్యమంత్రి చంద్రబాబు నాయుడు అధికారులను ఆదేశించారు. ఈ కార్యక్రమాన్ని ఉద్యమంలా ముందుకు తీసుకెళ్లాలని సూచిస్తూ, ప్రజారోగ్యంపై ప్రత్యేక దృష్టి పెట్టాలని పిలుపునిచ్చారు.

ఏప్రిల్ నెల నుంచి ఎంపీలు, ఎమ్మెల్యేలు, కలెక్టర్లు, వైద్యాధికారులు ప్రజల్లోకి వెళ్లి అవగాహన కల్పించాలని సీఎం పేర్కొన్నారు. ప్రతి నెల నాలుగో శనివారం స్వర్ణాంధ్ర-పాపులేషన్ మేనేజ్మెంట్ గ్రామ సభలు, హెల్త్ క్యాంపులు మరియు అవగాహన కార్యక్రమాలను క్రమం తప్పకుండా నిర్వహించాలని ఆదేశించారు.

ప్రస్తుతం చిత్తూరు జిల్లా కుప్పం, నారావారిపల్లెలలో సమర్థంగా అమలవుతున్న ఈ ప్రాజెక్టును, అక్కడి అనుభవాలను ఆధారంగా తీసుకుని రాష్ట్రవ్యాప్తంగా విస్తరించనున్నట్లు తెలిపారు. జూలై నాటికి అన్ని ప్రాంతాల్లో సంజీవని ప్రాజెక్టు అమలయ్యేలా చర్యలు తీసుకోవాలని స్పష్టం చేశారు.

అదేవిధంగా, వచ్చే ఏడాదిలోగా రాష్ట్రంలో సుమారు 56.40 లక్షల మందికి వైద్య పరీక్షలు నిర్వహించాలని లక్ష్యాన్ని నిర్దేశించారు. ఈ కార్యక్రమం ద్వారా ప్రజలకు సమగ్ర ఆరోగ్య సేవలు అందించి, వ్యాధులను ముందుగానే గుర్తించి నివారణ చేయడమే ప్రధాన ఉద్దేశమని సీఎం పేర్కొన్నారు.