ఎస్‌బీఐ కార్డు వినియోగదారులకు అలర్ట్‌.. ఓవర్‌డ్యూ సమస్య

ఎస్‌బీఐ కార్డు క్రెడిట్‌ కార్డు వినియోగదారులకు కీలక హెచ్చరిక. జులై నెల క్రెడిట్‌ కార్డు బిల్లుల్లో సాంకేతిక సమస్య కారణంగా పలువురు వినియోగదారులకు ఓవర్‌డ్యూ చూపిస్తున్నట్లు సమాచారం. గడువు తేదీకి ముందే బిల్లులు చెల్లించినప్పటికీ, ఇంకా చెల్లింపు గడువు రాకపోయినా క్రెడిట్‌ రిపోర్టుల్లో బకాయి ఉన్నట్లు కనిపిస్తోందని పలువురు ఫిర్యాదులు చేస్తున్నారు. ఈ సమస్య కారణంగా తమ క్రెడిట్‌ స్కోర్లు భారీగా తగ్గిపోయాయని వినియోగదారులు ఆందోళన వ్యక్తం చేస్తున్నారు.

సామాజిక మాధ్యమాల ద్వారా పలువురు వినియోగదారులు తమ సమస్యలను వెల్లడించారు. కొందరు తమ క్రెడిట్‌ రిపోర్టుల స్క్రీన్‌షాట్లను పంచుకుంటూ, ఎలాంటి బకాయిలు లేకపోయినా ఓవర్‌డ్యూ చూపించడం వల్ల ఇబ్బందులు ఎదురవుతున్నాయని తెలిపారు. ఈ తప్పిదం కారణంగా కొందరి క్రెడిట్‌ స్కోర్లు 50 నుంచి 70 పాయింట్ల వరకు తగ్గినట్లు వినియోగదారులు పేర్కొన్నారు.

క్రెడిట్‌ స్కోరు అనేది బ్యాంకు రుణాలు, కొత్త క్రెడిట్‌ కార్డుల మంజూరు వంటి అంశాల్లో కీలక పాత్ర పోషిస్తుంది. క్రెడిట్‌ స్కోరు తగ్గితే భవిష్యత్తులో రుణాల పొందడంలో ఇబ్బందులు ఎదురయ్యే అవకాశం ఉందని వినియోగదారులు ఆందోళన చెందుతున్నారు. అందుకే ఎస్‌బీఐ క్రెడిట్‌ కార్డు వినియోగదారులు తమ క్రెడిట్‌ రిపోర్టులను ఒకసారి పరిశీలించుకోవాలని సూచిస్తున్నారు.

ఒకవేళ వినియోగదారుల క్రెడిట్‌ రిపోర్టుల్లో కూడా ఇలాంటి పొరపాట్లు కనిపిస్తే, సంబంధిత ఆధారాలతో ఫిర్యాదు చేయాలని సూచనలు వెలువడుతున్నాయి. క్రెడిట్‌ కార్డు స్టేట్‌మెంట్‌, బిల్లు చెల్లించిన రసీదులు లేదా ఇతర ఆధారాలను జత చేసి ఎస్‌బీఐ కార్డు అధికారులకు సమాచారం అందించాలని చెబుతున్నారు. ఈ సమస్యను వెంటనే క్రెడిట్‌ బ్యూరోల దృష్టికి తీసుకెళ్లి సరిచేయాలని కోరుతున్నారు.

ఈ వ్యవహారంపై ఇప్పటివరకు ఎస్‌బీఐ కార్డు నుంచి అధికారిక ప్రకటన వెలువడలేదు. అయితే కొందరు వినియోగదారులు తమకు ఎస్‌బీఐ కార్డు ప్రతినిధుల నుంచి ఫోన్లు వచ్చాయని, సమస్య పరిష్కారానికి సంబంధిత బృందం పనిచేస్తోందని తెలిపినట్లు వెల్లడించారు. అయితే సమస్య ఎప్పటిలోగా పూర్తిగా పరిష్కారం అవుతుందనే విషయంపై స్పష్టత ఇవ్వలేదని సమాచారం.

క్రెడిట్‌ రిపోర్టుల్లో పొరపాట్లు కనిపించిన వినియోగదారులు ఆలస్యం చేయకుండా సంబంధిత అధికారులను సంప్రదించాలని నిపుణులు సూచిస్తున్నారు. సరైన సమయంలో ఫిర్యాదు చేయడం ద్వారా క్రెడిట్‌ రికార్డుల్లో మార్పులు చేయించుకునే అవకాశం ఉంటుందని చెబుతున్నారు. క్రెడిట్‌ స్కోరు భవిష్యత్‌ ఆర్థిక అవసరాలకు ఎంతో ముఖ్యమైనది కావడంతో వినియోగదారులు అప్రమత్తంగా ఉండాలని సూచిస్తున్నారు.