రైతుల దశాబ్దాల కల నెరవేర్చాలి: సోమిరెడ్డి

నెల్లూరు జిల్లా మనుబోలు పంచాయతీలో నిర్వహించిన పల్లెవీక్షణ కార్యక్రమంలో సర్వేపల్లి ఎమ్మెల్యే సోమిరెడ్డి చంద్రమోహన్ రెడ్డి, కలెక్టర్ హిమాన్షు శుక్లా, వివిధ శాఖల జిల్లా అధికారులు పాల్గొన్నారు. ఈ సందర్భంగా గ్రామంలో అమలవుతున్న ప్రభుత్వ పథకాలను పరిశీలించడంతో పాటు ప్రజల సమస్యలను అడిగి తెలుసుకున్నారు. రైతులు, పేదలు, గ్రామీణ ప్రాంత ప్రజలకు సంబంధించిన పలు కీలక అంశాలను ఎమ్మెల్యే సోమిరెడ్డి అధికారుల దృష్టికి తీసుకెళ్లారు.

క్షేత్రస్థాయిలో ప్రజా సమస్యలను తెలుసుకుని పరిష్కరించేందుకు కలెక్టర్ హిమాన్షు శుక్లా పల్లెవీక్షణం కార్యక్రమాన్ని నిర్వహించడం అభినందనీయమని సోమిరెడ్డి పేర్కొన్నారు. జిల్లా అధికారులందరినీ ఒకే వేదికపైకి తీసుకువచ్చి ప్రజల సమస్యలకు పరిష్కార మార్గాలు చూపడం మంచి పరిణామమని అన్నారు. ప్రజలకు నేరుగా అధికారులు అందుబాటులో ఉండేలా ఇలాంటి కార్యక్రమాలు మరింత విస్తరించాలని సూచించారు.

మనుబోలు మండల రైతుల దశాబ్దాల కలగా ఉన్న డేగపూడి–బండేపల్లి కాలువ నిర్మాణాన్ని పూర్తిచేయాలని సోమిరెడ్డి కోరారు. సుమారు ఇరవై వేల ఎకరాలకు సాగునీరు అందించేందుకు ఉద్దేశించిన ఈ కాలువ రైతులకు ఎంతో కీలకమని వివరించారు. సోమశిల జలాశయం నుంచి సంగం బ్యారేజీ వరకు నీరు చేరి, అక్కడి నుంచి బండేపల్లి కాలువకు ప్రవాహం అందేలా వ్యవస్థ ఉందని తెలిపారు. కనుపూరు కాలువ దారి పొడవునా పలు ప్రాంతాల పంటలకు నీరు అందించిన అనంతరం చివరగా మనుబోలు మండలానికి చేరుతోందని, దీంతో చివరి ఆయకట్టుకు నీరు అందడం కష్టంగా మారుతోందని చెప్పారు.

ప్రతి పంట సీజన్‌లో రైతులు సాగునీటి కోసం ఇబ్బందులు పడుతున్న పరిస్థితుల్లో డేగపూడి–బండేపల్లి కాలువ ప్రతిపాదన తీసుకొచ్చామని సోమిరెడ్డి తెలిపారు. కండలేరు నుంచి కేవలం రెండు గంటల్లో ఆయకట్టుకు నీరు అందించేందుకు ఈ కాలువ ఉపయోగపడుతుందని అన్నారు. భూసేకరణతో పాటు కాలువ నిర్మాణానికి నిధులు మంజూరు చేసి పనులు ప్రారంభించినప్పటికీ, సుమారు ముప్పై ఐదు శాతం పనులు పూర్తైన తర్వాత వైకాపా ప్రభుత్వం అధికారంలోకి వచ్చి కాంట్రాక్టర్లను తొలగించడంతో పనులు నిలిచిపోయాయని ఆరోపించారు. కూటమి ప్రభుత్వం అధికారంలోకి వచ్చిన తర్వాత కాలువ పనులను పూర్తిచేసేందుకు ప్రయత్నాలు ప్రారంభించామని తెలిపారు.

డేగపూడి–బండేపల్లి కాలువను పూర్తిచేసే అంశాన్ని ప్రభుత్వం ప్రత్యేకంగా దృష్టిలో పెట్టుకోవాలని సోమిరెడ్డి కోరారు. ఈ కాలువ పూర్తైతే మనుబోలు ప్రాంత రైతులకు సాగునీటి సమస్య చాలా వరకు పరిష్కారమవుతుందని, పంటలను కాపాడుకునేందుకు రైతులకు ఎంతో ఉపయోగకరంగా ఉంటుందని పేర్కొన్నారు.

మడమనూరు వద్ద శ్యామ్ కంపెనీ ఏర్పాటు చేయనున్న ఉక్కు పరిశ్రమకు సంబంధించి భూసేకరణ ప్రక్రియను సజావుగా నిర్వహించాలని సోమిరెడ్డి సూచించారు. ఇప్పటికే రైతులతో తాను మాట్లాడానని తెలిపారు. పరిశ్రమ యాజమాన్యం, రైతులు, అధికారులు కలిసి ప్రత్యేక సమావేశం నిర్వహిస్తే భూసేకరణ సమస్యలు పరిష్కరించి పనులను ముందుకు తీసుకెళ్లవచ్చని అన్నారు.

జగనన్న కాలనీల పేరుతో పేదలకు పంపిణీ చేసిన ఇళ్ల స్థలాల వ్యవహారంపై కూడా సోమిరెడ్డి తీవ్రంగా స్పందించారు. తొమ్మిది అంకణాల చొప్పున స్థలాలు ఇచ్చినప్పటికీ చాలా వరకు లబ్ధిదారులు వాటిని వినియోగించకుండా వదిలేశారని తెలిపారు. కొన్ని స్థలాలను వైకాపా నాయకులు బినామీ పేర్లతో పొందినట్లు ఆరోపించారు. మరికొన్ని చోట్ల నాయకులే స్టాంపులు వేసి పట్టాలు ఇచ్చిన పరిస్థితులు ఉన్నాయని పేర్కొన్నారు.

ఐదు మండలాల తహసీల్దార్లు సమగ్ర విచారణ చేపట్టి రాజకీయాలకు అతీతంగా అర్హులైన లబ్ధిదారులను గుర్తించాలని సోమిరెడ్డి కోరారు. అర్హులైన పేదలకు పద్దెనిమిది అంకణాల చొప్పున స్థలాలను పంపిణీ చేసేలా చర్యలు తీసుకోవాలని సూచించారు. పేదల ఇళ్ల స్థలాల విషయంలో జరిగిన అక్రమాలను పూర్తిగా ప్రక్షాళన చేసి అర్హులైన ప్రతి కుటుంబానికి న్యాయం చేయాలని అన్నారు.

ఆప్షన్‌ మూడు కింద నిర్మించిన ఇళ్లలో కూడా భారీగా అక్రమాలు జరిగాయని సోమిరెడ్డి ఆరోపించారు. బేస్‌మెంట్‌ నిర్మాణానికి తక్కువ మొత్తంలో ఖర్చు చేసి అధిక మొత్తాలను డ్రా చేసినట్లు పేర్కొన్నారు. విజిలెన్స్‌ విచారణలో భారీ మొత్తంలో అక్రమాలు జరిగినట్లు తేలిందని తెలిపారు. వెంకటేశ్వరపురం, కావలి కాలనీల్లోనే పెద్ద మొత్తంలో నిధులు దుర్వినియోగమైనట్లు అధికారులు నివేదిక ఇచ్చారని పేర్కొన్నారు.

పేదలు పది కాలాల పాటు నివసించాల్సిన ఇళ్ల నిర్మాణంలో అవినీతి, అక్రమాలకు పాల్పడటం దురదృష్టకరమని సోమిరెడ్డి అన్నారు. నాణ్యత లోపించిన ఇళ్లను సంబంధిత కాంట్రాక్టర్లతోనే తిరిగి నిర్మించేలా చర్యలు తీసుకోవాలని కోరారు. గృహ నిర్మాణం, రెవెన్యూ, పోలీసు శాఖల అధికారులు సమన్వయంతో పనిచేసి పేదలకు నాణ్యమైన ఇళ్లు అందేలా చూడాలని సూచించారు.

వైకాపా పాలనలో గ్రామాల్లో డ్రెయిన్ల నిర్మాణం అస్తవ్యస్తంగా సాగిందని సోమిరెడ్డి విమర్శించారు. నుడా ద్వారా కోట్లాది రూపాయలు మంజూరైనప్పటికీ సరైన ప్రణాళిక లేకపోవడంతో నిధులు వృథా అయ్యాయని ఆరోపించారు. గ్రామాల్లో మురుగునీటి పారుదల సక్రమంగా లేకపోవడంతో దోమల బెడద, దుర్గంధం కారణంగా ప్రజలు ఇబ్బందులు పడుతున్నారని తెలిపారు.

ప్రతి గ్రామంలో ప్రజల అవసరాలకు అనుగుణంగా డ్రెయిన్లను పునర్నిర్మించి మురుగునీటి పారుదల వ్యవస్థను మెరుగుపరచాలని ఎమ్మెల్యే కోరారు. ప్రజారోగ్యానికి ఇబ్బంది కలిగించే సమస్యలను అధికారులు అత్యవసరంగా పరిష్కరించాలని సూచించారు. పల్లెవీక్షణం ద్వారా గుర్తించిన సమస్యలపై శాఖలవారీగా చర్యలు తీసుకుని త్వరితగతిన పరిష్కారం చూపాలని అన్నారు.

రైతులకు సాగునీరు, పేదలకు ఇళ్ల స్థలాలు, గృహ నిర్మాణం, పారిశ్రామిక భూసేకరణ, గ్రామీణ పారిశుధ్యం వంటి అంశాలకు ప్రాధాన్యం ఇచ్చి అధికారులు సమన్వయంతో పనిచేయాలని సోమిరెడ్డి స్పష్టం చేశారు. డేగపూడి–బండేపల్లి కాలువను పూర్తిచేయడం ద్వారా రైతుల దశాబ్దాల కలను నెరవేర్చడంతో పాటు, అర్హులైన పేద కుటుంబాలకు న్యాయం చేసి ప్రతి పేద కుటుంబానికి సొంతింటి కలను సాకారం చేయాలని కోరారు.