తమిళనాడులో రూ.12,642 కోట్ల గ్రామీణ ఉపాధి పథకానికి గ్రీన్ సిగ్నల్

తమిళనాడు ప్రభుత్వం గ్రామీణ ఉపాధి, జీవనోపాధి అభివృద్ధికి కేంద్ర ప్రభుత్వం ప్రవేశపెట్టిన వికసిత్ భారత్ గ్యారంటీ ఫర్ రోజ్‌గార్ అండ్ ఆజీవికా మిషన్ గ్రామీణ్ (వీబీ–జీ రామ్–జీ) పథకం అమలుకు కీలక నిర్ణయం తీసుకుంది. రాష్ట్ర గెజిట్‌లో అధికారికంగా ఈ పథకాన్ని ప్రకటించడం ద్వారా అమలుకు ఉన్న అన్ని పరిపాలనా అడ్డంకులను తొలగించింది. మొత్తం రూ.12,642 కోట్ల అంచనా వ్యయంతో అమలు కానున్న ఈ పథకం ద్వారా గ్రామీణ ప్రాంతాల్లో ఉపాధి అవకాశాలు పెరగడంతో పాటు మౌలిక వసతుల అభివృద్ధి, స్థిరమైన జీవనోపాధి కల్పనకు పెద్దపీట వేయనున్నారు. ఈ నిర్ణయంతో తమిళనాడు కూడా కొత్త గ్రామీణ ఉపాధి చట్టాన్ని అమలు చేస్తున్న రాష్ట్రాల జాబితాలో చేరింది. వీబీ–జీ రామ్–జీ పథకం దేశవ్యాప్తంగా జూలై 1 నుంచి అమల్లోకి వచ్చింది. ఇది గత రెండు దశాబ్దాలుగా అమలులో ఉన్న గ్రామీణ ఉపాధి హామీ వ్యవస్థ స్థానంలో కొత్త రూపంలో ప్రవేశపెట్టబడింది. ఈ పథకం కింద ప్రతి గ్రామీణ కుటుంబానికి సంవత్సరానికి 125 రోజుల వేతన ఉపాధి హామీ కల్పించబడుతుంది. ఇది గతంలో ఉన్న 100 రోజుల హామీతో పోలిస్తే మరింత విస్తృతమైనది. అలాగే గ్రామీణ అభివృద్ధి, జీవనోపాధి, శాశ్వత ఆస్తుల నిర్మాణం, గ్రామీణ మౌలిక సదుపాయాల కల్పన వంటి అంశాలను సమగ్రంగా అనుసంధానించేలా ఈ కొత్త వ్యవస్థ రూపొందించబడింది. తమిళనాడు ప్రభుత్వం జారీ చేసిన గెజిట్ ప్రకటనతో రాష్ట్రంలోని అన్ని జిల్లాల్లో ఈ పథకం అమలుకు అధికారిక మార్గం సుగమమైంది. గ్రామ పంచాయతీలు, జిల్లా యంత్రాంగం, గ్రామీణాభివృద్ధి శాఖలు కలిసి పనులను గుర్తించి అమలు చేయనున్నాయి. నీటి సంరక్షణ, చెరువుల అభివృద్ధి, గ్రామీణ రహదారులు, వ్యవసాయ మౌలిక వసతులు, వర్షపు నీటి నిల్వలు, పచ్చదనం పెంపు, గ్రామీణ జీవనోపాధి వనరుల అభివృద్ధి వంటి వందలాది అభివృద్ధి పనులు ఈ పథకం కింద చేపట్టే అవకాశం ఉంది. కేంద్ర ప్రభుత్వం ఇప్పటికే 318 రకాల అభివృద్ధి పనులను ఈ పథకంలో అనుమతించింది