టీజీ20లో టాప్ ప్లేస్ కోసం పోరు..

టీజీ20 లీగ్‌లో వరుస విజయాలతో దూసుకుపోతున్న హైదరాబాద్ ఈ ఛాంపియన్స్ జట్టు మరో కీలక సమరానికి సిద్ధమైంది. సోమవారం ఉప్పల్ స్టేడియం వేదికగా ఖమ్మం జట్టుతో తలపడనుంది. ఇప్పటికే మూడు మ్యాచ్‌ల్లో మూడు విజయాలు సాధించి పాయింట్ల పట్టికలో అగ్రస్థానంలో ఉన్న హైదరాబాద్ జట్టు తన విజయ పరంపరను కొనసాగించాలని చూస్తుండగా, గెలుపు జోష్‌లో ఉన్న ఖమ్మం జట్టు కూడా సంచలనం సృష్టించేందుకు సిద్ధమవుతోంది.

ఈ టోర్నీలో హైదరాబాద్ ప్రదర్శన ప్రత్యేక ఆకర్షణగా నిలిచింది. ఇప్పటివరకు ఆడిన మూడు మ్యాచ్‌ల్లోనూ ప్రత్యర్థులను చిత్తు చేస్తూ పూర్తి ఆధిపత్యం ప్రదర్శించింది. జట్టు బ్యాటింగ్, బౌలింగ్ విభాగాల్లో సమతూకంతో ఉండటం హైదరాబాద్‌కు ప్రధాన బలంగా మారింది. కెప్టెన్ అభిరథ్ రెడ్డి అద్భుత ఫామ్‌లో కొనసాగుతూ వరుస అర్ధశతకాలతో జట్టును ముందుండి నడిపిస్తున్నాడు. గత మ్యాచ్‌లో సాయి వికాస్ మెరుపు ఇన్నింగ్స్ ఆడి భారీ స్కోరు నమోదు చేయడం జట్టుకు మరింత బలం చేకూర్చింది.

నితిన్ నాయక్, ప్రణవ్ వర్మ, గణేశ్ వంటి ఆల్‌రౌండర్లు హైదరాబాద్‌కు అదనపు బలంగా నిలుస్తున్నారు. ఒక విభాగంలో ఆటగాడు విఫలమైనా మరొకరు బాధ్యత తీసుకోవడం జట్టు విజయాలకు కారణమవుతోంది. బ్యాటింగ్‌లో లోతు ఉండటం వల్ల ప్రత్యర్థి బౌలర్లకు ఒత్తిడి పెరుగుతోంది.

బౌలింగ్ విభాగంలో అజయ్ దేవ్ గౌడ్ అద్భుత ప్రదర్శన కనబరుస్తున్నాడు. ఇప్పటికే మూడు మ్యాచ్‌ల్లో ఎనిమిది వికెట్లు సాధించి టోర్నీలో అత్యంత ప్రభావవంతమైన బౌలర్లలో ఒకడిగా నిలిచాడు. ప్రణవ్ వర్మ కూడా ప్రతి మ్యాచ్‌లో వికెట్లు తీస్తూ కీలక పాత్ర పోషిస్తున్నాడు. వీరితో పాటు యువ బౌలర్లు కూడా రాణిస్తుండటంతో హైదరాబాద్ బౌలింగ్ యూనిట్ ప్రత్యర్థులకు సవాల్‌గా మారింది.

మరోవైపు ఖమ్మం జట్టు కూడా తక్కువేమీ కాదు. తొలి మ్యాచ్‌లో విజయంతో ప్రారంభించిన ఆ జట్టు రెండో మ్యాచ్‌లో ఓటమి చవిచూసినా, మూడో మ్యాచ్‌లో తిరిగి గెలుపు బాట పట్టింది. సీవీ మిలింద్, హిమతేజ, జైస్వాల్ వంటి ఆటగాళ్లు మంచి ఫామ్‌లో ఉండటం ఖమ్మం జట్టుకు కలిసొచ్చే అంశం. గత మ్యాచ్ విజయంతో ఆటగాళ్ల ఆత్మవిశ్వాసం కూడా పెరిగింది.

అయితే ప్రస్తుతం టోర్నీలో అత్యంత సమతూకంగా కనిపిస్తున్న హైదరాబాద్ జట్టును నిలువరించడం ఖమ్మంకు కఠిన పరీక్షగానే భావిస్తున్నారు. బ్యాటింగ్, బౌలింగ్, ఫీల్డింగ్ అన్ని విభాగాల్లో హైదరాబాద్ ఆధిపత్యం ప్రదర్శిస్తుండటంతో మ్యాచ్‌పై ఆసక్తి నెలకొంది.

పాయింట్ల పట్టికలో హైదరాబాద్ ఆరు పాయింట్లతో అగ్రస్థానంలో కొనసాగుతుండగా, ఖమ్మం నాలుగు పాయింట్లతో నాలుగో స్థానంలో ఉంది. ఈ మ్యాచ్‌లో విజయం సాధిస్తే హైదరాబాద్ తన అగ్రస్థానాన్ని మరింత బలోపేతం చేసుకోనుంది. మరోవైపు ఖమ్మం గెలిస్తే అగ్రజట్లకు గట్టి పోటీ ఇచ్చే అవకాశం ఉంటుంది.

ఉప్పల్ స్టేడియంలో జరగనున్న ఈ మ్యాచ్ అభిమానులకు మంచి వినోదాన్ని అందించే అవకాశముంది. ఒకవైపు వరుస విజయాలతో జోరు మీదున్న హైదరాబాద్, మరోవైపు ఆత్మవిశ్వాసంతో ఉన్న ఖమ్మం మధ్య జరిగే ఈ పోరు టీజీ20 లీగ్‌లో మరో ఆసక్తికర సమరంగా మారనుంది.