ట్రంప్‌ నిర్ణయానికి కోర్టులో భారీ ఎదురుదెబ్బ..!

అమెరికా అధ్యక్షుడు డొనాల్డ్‌ ట్రంప్‌ ప్రభుత్వానికి కోర్టులో భారీ ఎదురుదెబ్బ తగిలింది. 75 దేశాల పౌరులకు వలస వీసాల జారీ ప్రక్రియను నిలిపివేస్తూ ట్రంప్‌ ప్రభుత్వం తీసుకున్న నిర్ణయాన్ని అమెరికా ఫెడరల్‌ కోర్టు కొట్టివేసింది. న్యూయార్క్‌లోని దక్షిణ జిల్లా ఫెడరల్‌ న్యాయస్థానానికి చెందిన న్యాయమూర్తి జెన్నెట్‌ వర్గాస్‌ ఈ నిర్ణయం చట్ట విరుద్ధమని పేర్కొంటూ ఆదేశాలు జారీ చేశారు. వలస వీసాల విషయంలో దేశాల పౌరులందరినీ ఒకే విధంగా నిలిపివేయడం చట్టపరమైన నిబంధనలకు విరుద్ధమని కోర్టు స్పష్టం చేసింది.

ఈ ఏడాది జనవరి నుంచి అమెరికా విదేశాంగ శాఖ 75 దేశాల పౌరులకు వలస వీసాల జారీని నిలిపివేసింది. ఆయా దేశాల నుంచి వచ్చే వలసదారులు భవిష్యత్తులో అమెరికా ప్రభుత్వ సంక్షేమ పథకాలపై ఆధారపడే అవకాశం ఉందన్న కారణంతో ఈ విధానాన్ని అమలు చేశారు. అయితే ఆదాయ పరిస్థితి, వ్యక్తిగత అర్హతలు, వీసా నిబంధనలను పరిగణనలోకి తీసుకోకుండా కేవలం జాతీయత ఆధారంగా వీసా ప్రక్రియను నిలిపివేయడం చట్టబద్ధం కాదని కోర్టు తేల్చింది.

వీసా అర్హతను నిర్ణయించే అధికారం కాన్సులర్‌ అధికారులకు చట్టం ద్వారా కల్పించబడిందని న్యాయమూర్తి వర్గాస్‌ పేర్కొన్నారు. విదేశాంగ కార్యదర్శి మార్కో రూబియో ఆ అధికార పరిధిని మించి వ్యవహరించారని కోర్టు అభిప్రాయపడింది. జాతీయత ఆధారంగా 75 దేశాల పౌరులపై ఒకేసారి వీసా ప్రక్రియను నిలిపివేయడం అమెరికా వలస చట్టంలోని వివక్ష నిరోధక నిబంధనలకు కూడా విరుద్ధమని తీర్పులో స్పష్టం చేశారు.

కోర్టు తీర్పుతో ట్రంప్‌ ప్రభుత్వం అమలు చేసిన ఈ విస్తృత వీసా నిలిపివేతకు తాత్కాలికంగా అడ్డుకట్ట పడింది. ఈ నిర్ణయం వల్ల ప్రభావితమైన వలసదారులు, వారి కుటుంబ సభ్యులకు ఊరట లభించే అవకాశం ఉంది. వీసా దరఖాస్తులను వ్యక్తిగత అర్హతల ఆధారంగా పరిశీలించాల్సిన అవసరం ఉందని కోర్టు స్పష్టం చేయడం ఈ కేసులో కీలక అంశంగా మారింది. ఇప్పటికే వీసా ప్రక్రియ నిలిచిపోవడంతో ఇబ్బందులు ఎదుర్కొంటున్న పలువురు దరఖాస్తుదారులకు ఈ తీర్పు ప్రాధాన్యం సంతరించుకుంది.

ట్రంప్‌ ప్రభుత్వ వలస విధానాలపై అమెరికా న్యాయస్థానాల్లో జరుగుతున్న న్యాయపరమైన సవాళ్లలో ఈ తీర్పు మరో కీలక పరిణామంగా నిలిచింది. 75 దేశాల పౌరుల వలస వీసా ప్రక్రియను నిలిపివేసిన విధానం చట్టబద్ధతపై న్యాయస్థానం స్పష్టమైన అభిప్రాయం వ్యక్తం చేయడంతో తదుపరి పరిణామాలపై ఆసక్తి నెలకొంది. అమెరికా ప్రభుత్వం ఈ తీర్పును సవాలు చేసే అవకాశం కూడా ఉందని న్యాయ నిపుణులు భావిస్తున్నారు.