శిథిలాల కింద కుమారుడి ఏడుపు విన్న తల్లి

వెనిజులాలో సంభవించిన రెండు భయానక భూకంపాలు ఎన్నో కుటుంబాలను క్షణాల్లో ఛిన్నాభిన్నం చేశాయి. లా గ్వైరా ప్రాంతంలో నివసించే ఆండ్రెయినా వలేరియో అనే మహిళ జీవితంలో కూడా ఈ విపత్తు ఊహించలేని విషాదాన్ని మిగిల్చింది. భూకంపం వచ్చిన సమయంలో ఆమె పనికి వెళ్లి ఉండగా, ఆమెకు దాదాపు రెండేళ్ల వయసున్న కుమారుడు సాంటియాగో తన భాగస్వామి రామ్సెస్‌ మెన్డోజాతో కలిసి అత్తింట్లో ఉన్నాడు. భూకంపం తర్వాత ఆండ్రెయినా భయంతో వెంటనే అక్కడికి పరుగెత్తుకెళ్లింది. కానీ ఆమె కళ్ల ముందున్న దృశ్యం గుండె పగిలేలా చేసింది. వారి అపార్ట్‌మెంట్‌ భవనం పూర్తిగా కూలిపోయి శిథిలాల గుట్టగా మారిపోయింది.

ఆమె అక్కడికి చేరేసరికి తన బావమరిది సాముయేల్‌ మెన్డోజా శిథిలాల మధ్య తన కుటుంబ సభ్యుల కోసం వెతుకుతున్నాడు. ఆండ్రెయినా కుమారుడు, ఆమె భాగస్వామి మాత్రమే కాదు, రామ్సెస్‌ తల్లి, తండ్రి, తాతమ్మలు, సోదరి కూడా అదే శిథిలాల కింద చిక్కుకుపోయి ఉండొచ్చని కుటుంబం భావిస్తోంది. అయినప్పటికీ ఆండ్రెయినా ఆశ వదల్లేదు. శిథిలాల ముందు నిలబడి తన చిన్నారి సాంటియాగో పేరు పిలుస్తూనే ఉంది. ప్రతి చిన్న శబ్దం ఆమెకు ఆశగా మారుతోంది.

ఆ భవనంలో మరికొందరు పిల్లలు కూడా చిక్కుకుపోయి ఉన్నారని కుటుంబ సభ్యులు చెబుతున్నారు. తొమ్మిదేళ్ల లూకాస్‌, మూడేళ్ల అరాంజా పేర్లు కూడా వినిపిస్తున్నాయి. ఈ విషయం అక్కడి పరిస్థితిని మరింత విషాదంగా మార్చింది. ఒకే భవనం కూలిపోవడంతో పెద్దలు, పిల్లలు కలిసి లోపల చిక్కుకుపోయి ఉండొచ్చన్న ఆలోచన కుటుంబ సభ్యులను తీవ్రంగా కలచివేస్తోంది.

భూకంపం తర్వాత మొదటి ఉదయం శిథిలాల దగ్గర ఉన్న సాముయేల్‌ ఒక మహిళా స్వరం విన్నట్లు చెప్పాడు. మొదట ఆ స్వరం ఎవరిదో అర్థం కాలేదని, కానీ “సహాయం” అనే మాట మాత్రం స్పష్టంగా వినిపించిందని అతను తెలిపాడు. తర్వాతి రోజు ఆండ్రెయినా అక్కడికి తిరిగి వెళ్లినప్పుడు, శిథిలాల కింద నుంచి ఓ శిశువు ఏడుపు వినిపించిందని ఆమె చెప్పింది. ఆ ఏడుపు తన కుమారుడు సాంటియాగోదేనని ఆమె నమ్ముతోంది. ఆ శబ్దం ఆమెకు ఒకవైపు ఆశను, మరోవైపు అసహనాన్ని కలిగిస్తోంది. తన బిడ్డ ఇంకా ప్రాణాలతో ఉండొచ్చనే ఆశ ఆమెను అక్కడి నుంచి కదలనివ్వడం లేదు.

శనివారం ఎల్‌ సాల్వడార్‌, స్పెయిన్‌ నుంచి వచ్చిన రక్షణ బృందాలు అక్కడికి చేరుకున్నాయి. కానీ భవనం పూర్తిగా ప్రమాదకర స్థితిలో ఉండడంతో లోపలికి ప్రవేశించడం వారికి సాధ్యపడలేదు. అప్పటివరకు ఆ భవనం నుంచి ఎవరినీ బయటకు తీయలేకపోయారు. రక్షణ బృందాలు భవనం స్థిరత్వాన్ని పరిశీలిస్తూ, లోపలికి వెళ్లేందుకు మార్గం వెతుకుతున్నాయి. కానీ సమయం గడిచేకొద్దీ కుటుంబాల ఆందోళన మరింత పెరుగుతోంది.