ఇరాన్ యుద్ధానికి మరో నిధుల డిమాండ్.. వైట్ హౌస్ ప్రతిపాదన

ఇరాన్ యుద్ధంపై అమెరికా కాంగ్రెస్ తీవ్ర అభ్యంతరం వ్యక్తం చేసిన మరుసటి రోజే వైట్ హౌస్ భారీ నిధుల ప్రతిపాదనను ముందుకు తీసుకొచ్చింది. యుద్ధ కార్యకలాపాలు, రక్షణ అవసరాలు, విదేశీ భద్రతా కార్యక్రమాల కోసం 87.6 బిలియన్ డాలర్ల అదనపు నిధులను ఆమోదించాలని శాసనసభ్యులను కోరినట్లు సమాచారం. ఇటీవల కాంగ్రెస్‌లో ఇరాన్‌పై సైనిక చర్యలను విమర్శిస్తూ ఆమోదించిన తీర్మానం రాజకీయ చర్చలకు దారితీసిన నేపథ్యంలో ఈ ప్రతిపాదన ప్రాధాన్యత సంతరించుకుంది.

ప్రభుత్వం మాత్రం ఈ నిధులు కేవలం యుద్ధానికి మాత్రమే కాకుండా అమెరికా సైనిక దళాల నిర్వహణ, మిత్రదేశాల భద్రత, వ్యూహాత్మక కార్యకలాపాల కోసం అవసరమని వివరిస్తోంది. మరోవైపు ప్రతిపక్ష నేతలు, కొందరు అధికార పార్టీ సభ్యులు కూడా యుద్ధ వ్యయాలపై ప్రశ్నలు లేవనెత్తుతున్నారు. ప్రజాధనం వినియోగంపై మరింత పారదర్శకత అవసరమని వారు అభిప్రాయపడుతున్నారు. ఈ నిధుల ప్రతిపాదనపై కాంగ్రెస్‌లో తీవ్ర చర్చ జరిగే అవకాశముండగా, అమెరికా విదేశాంగ విధానం మరియు ఇరాన్ అంశం మరోసారి రాజకీయ కేంద్రబిందువుగా మారింది.