వింబుల్డన్‌లో జొకోవిచ్ విజయారంభం.. 25వ గ్రాండ్‌స్లామ్‌పై గురి

సెర్బియా టెన్నిస్ దిగ్గజం నొవాక్ జొకోవిచ్ వింబుల్డన్ 2026 టోర్నీలో విజయంతో తన ప్రచారాన్ని ప్రారంభించాడు. చైనాకు చెందిన వూ యిబింగ్‌తో జరిగిన తొలి రౌండ్ పోరులో తీవ్ర ప్రతిఘటనను ఎదుర్కొన్న జొకోవిచ్ చివరకు 6-4, 5-7, 6-4, 6-4 సెట్ల తేడాతో విజయం సాధించి రెండో రౌండ్‌కు అర్హత సాధించాడు. ఈ విజయంతో వింబుల్డన్‌లో తన ఎనిమిదో టైటిల్ సాధించే లక్ష్యానికి మరో అడుగు ముందుకు వేశాడు. అలాగే కెరీర్‌లో 25వ గ్రాండ్‌స్లామ్ సింగిల్స్ టైటిల్‌ను అందుకోవాలన్న అతని కల కూడా సజీవంగా కొనసాగుతోంది. 39 ఏళ్ల జొకోవిచ్‌కు ఈ మ్యాచ్ అంత సులభంగా సాగలేదు. గాయాల కారణంగా కొంతకాలం టెన్నిస్‌కు దూరంగా ఉన్న వూ యిబింగ్ అద్భుతమైన ఆటతీరుతో అనుభవజ్ఞుడైన జొకోవిచ్‌ను ఒత్తిడిలోకి నెట్టాడు. తొలి సెట్‌ను కోల్పోయినప్పటికీ రెండో సెట్‌లో దూకుడుగా ఆడి మ్యాచ్‌ను సమం చేశాడు. బలమైన ఫోర్‌హ్యాండ్ షాట్లు, దూకుడైన రిటర్న్‌లతో జొకోవిచ్‌కు గట్టి సవాలు విసిరాడు. అయినప్పటికీ కీలక సమయాల్లో అనుభవాన్ని ప్రదర్శించిన జొకోవిచ్ మూడో, నాలుగో సెట్లలో ఆధిపత్యం చెలాయించి మ్యాచ్‌ను తన ఖాతాలో వేసుకున్నాడు. మ్యాచ్ మధ్యలో వాతావరణ మార్పుల కారణంగా సెంటర్ కోర్టు పైకప్పును మూసి మళ్లీ తెరవాల్సి రావడం కూడా ఆటగాళ్లకు సవాలుగా మారింది. కోర్టు పరిస్థితులు మారినా తన ఆటతీరును మార్చుకుని ముందుకు సాగడం అనుభవజ్ఞుడైన జొకోవిచ్ ప్రత్యేకతగా నిలిచింది. మ్యాచ్ అనంతరం మాట్లాడుతూ వూ యిబింగ్ అద్భుతంగా పోరాడాడని, అతని దూకుడు తనను తీవ్రంగా పరీక్షించిందని జొకోవిచ్ ప్రశంసించాడు. ఈ మ్యాచ్ శారీరకంగా కూడా ఎంతో కఠినంగా సాగిందని ఆయన అంగీకరించాడు వింబుల్డన్‌లో జొకోవిచ్‌కు ఇది మరో కీలక ప్రయాణం. ఇప్పటికే ఈ ప్రతిష్ఠాత్మక టోర్నీలో ఏడు సార్లు విజేతగా నిలిచిన ఆయన, ఈసారి టైటిల్ గెలిస్తే ఎనిమిదో వింబుల్డన్ ట్రోఫీని అందుకుని ఈ ఘనతలో రికార్డును సమం చేస్తాడు. అదే సమయంలో 25వ గ్రాండ్‌స్లామ్ సింగిల్స్ టైటిల్‌ను గెలుచుకున్న తొలి ఆటగాడిగా కూడా కొత్త చరిత్ర సృష్టించే అవకాశం ఉంది. ఈ కారణంగా ప్రపంచ టెన్నిస్ అభిమానుల దృష్టంతా ఇప్పుడు జొకోవిచ్‌పైనే నిలిచింది.