పాకిస్థాన్‌లో ఘోర బస్సు ప్రమాదం.. 40 మంది దుర్మరణం

పాకిస్థాన్‌లో మరో ఘోర రోడ్డు ప్రమాదం తీవ్ర విషాదాన్ని మిగిల్చింది. బలోచిస్థాన్ ప్రావిన్స్‌లో ప్రయాణికులతో వెళ్తున్న ఓ బస్సు అదుపుతప్పి లోతైన లోయలో పడిపోవడంతో కనీసం 40 మంది ప్రాణాలు కోల్పోయారు. మరో ఎనిమిది మంది తీవ్రంగా గాయపడినట్లు అధికారులు వెల్లడించారు. ఈ ప్రమాదం దేశవ్యాప్తంగా తీవ్ర విషాదాన్ని రేకెత్తించింది. ప్రభుత్వం వెంటనే సహాయక చర్యలు చేపట్టి గాయపడిన వారిని సమీప ఆసుపత్రులకు తరలించింది ఈ ప్రమాదం బలోచిస్థాన్‌లోని దానా సర్ ప్రాంతం సమీపంలో జరిగింది. క్వెట్టా నుంచి ఇస్లామాబాద్‌కు వెళ్తున్న ప్రయాణికుల బస్సు కొండ ప్రాంతంలోని ప్రమాదకర మలుపు వద్ద ఒక్కసారిగా అదుపు తప్పింది. అనంతరం రహదారి పక్కనున్న లోతైన లోయలోకి దూసుకెళ్లింది. బస్సులో మొత్తం 48 మంది ప్రయాణిస్తున్నట్లు అధికారులు తెలిపారు. ప్రమాదం జరిగిన వెంటనే స్థానికులు, సహాయక బృందాలు ఘటనా స్థలానికి చేరుకుని సహాయక చర్యలు ప్రారంభించాయి  ప్రాథమిక సమాచారం ప్రకారం, బస్సు అధిక వేగంతో ప్రయాణిస్తుండగా డ్రైవర్ వాహనంపై నియంత్రణ కోల్పోయినట్లు తెలుస్తోంది. అలాగే మరో బస్సు చెడిపోవడంతో అందులోని కొంతమంది ప్రయాణికులను కూడా ఈ బస్సులో ఎక్కించడంతో వాహనం అధికంగా నిండిపోయిందని అధికారులు వెల్లడించారు. దీంతో ప్రమాద తీవ్రత మరింత పెరిగిందని భావిస్తున్నారు. అయితే ప్రమాదానికి ఖచ్చితమైన కారణాలపై పూర్తి స్థాయి దర్యాప్తు కొనసాగుతోంది.