ఏఐపై భారీ దృష్టి.. నియామకాలకు ఎస్ఏపీ బ్రేక్

యూరప్‌లో అతిపెద్ద సాఫ్ట్‌వేర్ సంస్థగా గుర్తింపు పొందిన ఎస్ఏపీ కీలక నిర్ణయం తీసుకుంది. కృత్రిమ మేధస్సు అభివృద్ధిపై భారీగా పెట్టుబడులు పెట్టేందుకు సాధారణ నియామకాలు, అంతర్గత ప్రయాణాలు, సరఫరాదారుల ఖర్చులపై నియంత్రణలు విధించాలని సంస్థ నిర్ణయించింది. ఇకపై కొత్త నియామకాలు ప్రధానంగా కృత్రిమ మేధస్సుకు సంబంధించిన కీలక పాత్రలకే పరిమితం చేస్తామని సంస్థ ఉద్యోగులకు పంపిన అంతర్గత సమాచారంలో తెలిపింది ఎస్ఏపీ కార్యనిర్వాహక బోర్డు ఉద్యోగులకు పంపిన సమాచారంలో, భవిష్యత్తులో సంస్థ దీర్ఘకాల విజయానికి అవసరమైన ఎంపిక చేసిన ప్రొఫైళ్లపై మాత్రమే దృష్టి పెడతామని పేర్కొంది. ముఖ్యంగా ప్రధాన కృత్రిమ మేధస్సు పాత్రలు, డేటా, ఆటోమేషన్, ఉత్పత్తి అభివృద్ధి వంటి విభాగాలకు ప్రాధాన్యం ఇవ్వనున్నట్లు తెలిపింది. కృత్రిమ మేధస్సుతో సంబంధం లేని అంతర్గత ప్రయాణాలను తాత్కాలికంగా నిలిపివేస్తామని, సరఫరాదారులపై చేసే ఖర్చులను కూడా సమీక్షించి పొదుపు మార్గాలు అన్వేషిస్తామని స్పష్టం చేసింది. కంపెనీ ఈ నిర్ణయాన్ని సాధారణ ఖర్చు కోతగా కాకుండా, వ్యూహాత్మక పెట్టుబడి మార్పుగా వివరిస్తోంది. పరిశ్రమ భవిష్యత్తును కృత్రిమ మేధస్సు వేగంగా మార్చుతున్న నేపథ్యంలో, తమ ఉత్పత్తులు, సేవలు, క్లౌడ్ పరిష్కారాలు, ఆటోమేషన్ సామర్థ్యాల్లో పెద్ద ఎత్తున పెట్టుబడి పెట్టాల్సిన అవసరం ఉందని సంస్థ భావిస్తోంది. అవసరమైన చోట డేటా, కృత్రిమ మేధస్సు రంగాల్లో వ్యూహాత్మక కొనుగోళ్లు కూడా పరిశీలిస్తామని బోర్డు తెలిపింది.