యువత మేలుకో అవగాహన సదస్సు నిర్వహించిన తెర్లాం ఎస్‌ఐ

తెర్లాం మండలం అమిటీ గ్రామంలో స్వామి వివేకానంద జయంతి సందర్భంగా “అభ్యుదయం – యువత మేలుకో” పేరుతో అవగాహన సదస్సు నిర్వహించారు. ఈ కార్యక్రమాన్ని తెర్లాం పోలీస్ స్టేషన్ ఎస్‌ఐ సాగర్ బాబు నిర్వహించి యువతకు ముఖ్య సూచనలు అందించారు.

ఈ సందర్భంగా ఎస్‌ఐ సాగర్ బాబు మాట్లాడుతూ యువత గంజాయి వంటి మాదకద్రవ్యాలకు దూరంగా ఉండాలని సూచించారు. మాదకద్రవ్యాల వినియోగం వల్ల వ్యక్తిగత జీవితం, కుటుంబ సంబంధాలు, సమాజంపై తీవ్రమైన ప్రతికూల ప్రభావాలు కలుగుతాయని ఆయన వివరించారు. యువత క్రమశిక్షణతో మంచి పౌరులుగా ఎదగాలని పిలుపునిచ్చారు.

పెద్దలను, తల్లిదండ్రులను గౌరవించడం, మహిళలను మర్యాదగా చూడడం వంటి సామాజిక విలువలను పాటించాలని ఆయన సూచించారు. సమాజ అభివృద్ధిలో యువత కీలక పాత్ర పోషించాలని పేర్కొంటూ, బాధ్యతాయుతమైన జీవన విధానాన్ని అలవర్చుకోవాలని సూచించారు.

ఈ సదస్సులో గ్రామ యువత పెద్ద సంఖ్యలో పాల్గొని ఎస్‌ఐ సూచనలను ఆసక్తిగా విన్నారు.