ప్రభుత్వ పాఠశాల విద్యార్థుల ప్రతిభకు ప్రోత్సాహమే భవిష్యత్తు పునాది: బోండా రవితేజ

విజయవాడ అజిత్‌సింగ్ నగర్‌లోని పీఎం శ్రీ ఎం.కే. బేగ్ మునిసిపల్ హైస్కూల్‌లో 2025–26 విద్యా సంవత్సరానికి సంబంధించిన పదవ తరగతి విద్యార్థుల ప్రతిభను గుర్తిస్తూ ఘన సన్మాన కార్యక్రమం నిర్వహించబడింది. ప్రభుత్వ విప్, విజయవాడ సెంట్రల్ నియోజకవర్గ శాసనసభ్యులు బోండా ఉమా మహేశ్వరరావు గారి సౌజన్యంతో ఆయన కుమారుడు బోండా రవితేజ ముఖ్య అతిథిగా పాల్గొన్నారు. ఈ సందర్భంగా ప్రతిభ కనబరిచిన 20 మంది విద్యార్థులను నగదు బహుమతులు, బ్యాగులు మరియు గిఫ్ట్‌లతో ఘనంగా సత్కరించారు.

ఈ కార్యక్రమంలో పదవ తరగతి వార్షిక పరీక్షల్లో అత్యుత్తమ ప్రతిభ చూపిన విద్యార్థులను ప్రత్యేకంగా అభినందించారు. ప్రథమ స్థానం సాధించిన షేక్ రాహేలా (581/600)కు రూ.10,000 నగదు బహుమతి అందజేయగా, ద్వితీయ స్థానం సాధించిన తోటకుచ్చి హారిక (563/600), తృతీయ స్థానం సాధించిన తరుణ్ భాష్య (554/600)లకు రూ.5,000 చొప్పున నగదు బహుమతులు అందించారు. మిగిలిన ప్రతిభావంతులైన విద్యార్థులకు కూడా ప్రోత్సాహక బహుమతులు అందించి వారి ఉత్సాహాన్ని పెంపొందించారు.

ఈ సందర్భంగా బోండా రవితేజ మాట్లాడుతూ విద్యే జీవితంలో ఉన్నత శిఖరాలను చేరుకునేందుకు ప్రధాన ఆయుధమని పేర్కొన్నారు. ప్రభుత్వ పాఠశాలల్లో చదివే విద్యార్థులు కూడా కష్టపడి చదివితే దేశ స్థాయిలో రాణించగలరని ఆయన తెలిపారు. ప్రతిభను ప్రోత్సహించడం ప్రతి ఒక్కరి బాధ్యత అని, భవిష్యత్తులో కూడా విద్యార్థులకు అవసరమైన సహాయ సహకారాలు అందిస్తామని హామీ ఇచ్చారు.

పాఠశాల ప్రధానోపాధ్యాయులు మైనం హుస్సేన్ మాట్లాడుతూ ఉపాధ్యాయుల కృషి, విద్యార్థుల పట్టుదల, తల్లిదండ్రుల సహకారంతోనే ఈ ఫలితాలు సాధ్యమయ్యాయని తెలిపారు. రాబోయే సంవత్సరాల్లో మరింత మెరుగైన ఫలితాలు సాధించేందుకు కృషి చేస్తామని పేర్కొన్నారు.

ఈ కార్యక్రమంలో డివిజన్ అధ్యక్షులు, పార్లమెంట్ స్థాయి కార్యదర్శులు, ఉపాధ్యాయులు, తల్లిదండ్రులు మరియు విద్యార్థులు పెద్ద సంఖ్యలో పాల్గొన్నారు.