మొన్న మావి గన్, నిన్న విజయవాడ.. రేపు ఏమిటి జగన్?: వెంకట నరసయ్య

రాష్ట్ర మాజీ డైరెక్టర్, రాజంపేట నియోజకవర్గ టీడీపీ సీనియర్ నాయకుడు కొమరా వెంకట నరసయ్య రాష్ట్ర రాజధాని అంశంపై మాజీ ముఖ్యమంత్రి జగన్ రెడ్డి చేస్తున్న ప్రకటనలను తీవ్రంగా విమర్శించారు. సిద్ధవటం మండలం మాధవరం గ్రామంలో జరిగిన సమావేశంలో ఆయన మాట్లాడుతూ, రోజుకో భిన్న ప్రకటనలు చేయడం వల్ల ప్రజల్లో గందరగోళం నెలకొంటోందని వ్యాఖ్యానించారు.

జగన్ రెడ్డి పాలన తుగ్లక్ పాలనను గుర్తుకు తెస్తోందని ఆయన ఆరోపించారు. మూడు రాజధానులు, తర్వాత వివిధ ప్రాంతాలపై భిన్న ప్రకటనలు చేయడం రాష్ట్ర ప్రజల్లో అస్థిరతకు కారణమవుతోందని అన్నారు. ప్రజలు ఇచ్చిన అవకాశాన్ని సద్వినియోగం చేయకుండా పాలనలో విఫలమయ్యారని ఆయన విమర్శించారు.

గత ఎన్నికల్లో పార్టీకి భారీ పరాజయం రావడం ప్రజల అసంతృప్తికి సంకేతమని పేర్కొన్నారు. పార్టీ అంతర్గతంగా కూడా నాయకుల మధ్య సమన్వయం లేకుండా గ్రూపులు ఏర్పడిన పరిస్థితిని ఆయన ప్రస్తావించారు. ఇన్చార్జి వ్యవహార శైలి వల్లే పార్టీ బలహీనపడుతోందని విమర్శించారు.

రాబోయే ఎన్నికలను దృష్టిలో ఉంచుకుని సమర్థవంతమైన, స్థిరమైన నాయకత్వాన్ని ఏర్పాటు చేయాలని టీడీపీ అధిష్టానాన్ని కోరారు. పార్టీకి జరుగుతున్న నష్టం నివారించేందుకు చంద్రబాబు నాయుడు, నారా లోకేష్ తక్షణ చర్యలు తీసుకోవాలని ఆయన విజ్ఞప్తి చేశారు.

ఈ సమావేశంలో పలువురు టీడీపీ సీనియర్ నాయకులు పాల్గొని పార్టీ పరిస్థితులపై అభిప్రాయాలు వ్యక్తం చేశారు.