అమెరికా ఓటమిపై అభిమానుల ఆవేదన.. వివాదం మళ్లీ తెరపై

ప్రపంచకప్ సహ ఆతిథ్య దేశమైన అమెరికా బెల్జియం చేతిలో 4-1 తేడాతో ఓటమి పాలై టోర్నీ నుంచి నిష్క్రమించడంతో అమెరికా అభిమానులు తీవ్ర నిరాశకు గురయ్యారు. మ్యాచ్ ముగిసిన అనంతరం స్టేడియం వెలుపల, అభిమానుల సమావేశాల్లో, సామాజిక మాధ్యమాల్లో నిరాశ, ఆవేదన, ఆగ్రహం వ్యక్తమయ్యాయి. ఈ ఓటమి కేవలం క్రీడాపరమైన పరాజయంగా మాత్రమే కాకుండా, మ్యాచ్‌కు ముందు చోటుచేసుకున్న రెడ్ కార్డు వివాదం కారణంగా మరింత చర్చనీయాంశమైంది అమెరికా స్టార్ ఫార్వర్డ్ ఫోలారిన్ బలోగన్‌కు గత మ్యాచ్‌లో రెడ్ కార్డు పడటంతో ఒక మ్యాచ్ నిషేధం విధించారు. అయితే అనంతరం ఆ నిషేధాన్ని ఎత్తివేయడంతో ఆయన బెల్జియంపై జరిగిన ప్రీక్వార్టర్ మ్యాచ్‌లో ఆడే అవకాశం పొందారు. ఈ నిర్ణయం ప్రపంచ ఫుట్‌బాల్‌లో పెద్ద వివాదానికి దారితీసింది. అమెరికా అధ్యక్షుడు డొనాల్డ్ ట్రంప్ ఫిఫా అధ్యక్షుడితో మాట్లాడిన తర్వాత ఈ నిర్ణయం వెలువడిందని వెల్లడించడం వివాదాన్ని మరింత తీవ్రతరం చేసింది. ఫిఫా నిర్ణయంపై యూరోపియన్ ఫుట్‌బాల్ వర్గాలు, బెల్జియం ఫుట్‌బాల్ సమాఖ్య తీవ్ర అభ్యంతరం వ్యక్తం చేశాయి మ్యాచ్ అనంతరం అమెరికా అభిమానులు స్పందిస్తూ జట్టు ప్రదర్శనపై తీవ్ర నిరాశ వ్యక్తం చేశారు. కొందరు అభిమానులు అమెరికా మెరుగ్గా ఆడలేదని అంగీకరించగా, మరికొందరు మ్యాచ్‌కు ముందు జరిగిన వివాదం జట్టుపై అనవసర ఒత్తిడి తీసుకువచ్చిందని అభిప్రాయపడ్డారు. ఒక అభిమాని మాట్లాడుతూ, "ఈ ప్రపంచకప్‌లో ప్రపంచం మొత్తం అమెరికాకు వ్యతిరేకంగా నిలిచినట్టే అనిపించింది" అని వ్యాఖ్యానించారు. మరికొందరు ఆటగాళ్లు వివాదాలకు దూరంగా ఉండి తమ ఆటపైనే దృష్టి పెట్టారని పేర్కొన్నారు