న్యూయార్క్ హైరైజ్‌లో సపోర్ట్ బీమ్స్ వంగిపోవడంతో కలకలం

అమెరికాలోని న్యూయార్క్ నగరంలో నిర్మాణంలో ఉన్న ఓ ఎత్తైన భవనంలో నిర్మాణ భద్రతపై తీవ్ర ఆందోళనలు వ్యక్తమవుతున్నాయి. మంగళవారం ఉదయం భవనానికి ఆధారంగా ఉన్న రెండు ప్రధాన సపోర్ట్ కాలమ్‌లు (సపోర్ట్ బీమ్స్) వంగిపోవడంతో భవనం నిర్మాణ స్థిరత్వం దెబ్బతిన్నట్లు అధికారులు తెలిపారు. ఈ ఘటన అనంతరం భవనం నుంచి కార్మికులను అత్యవసరంగా బయటకు తరలించడమే కాకుండా, భద్రతా కారణాల దృష్ట్యా సమీపంలోని ఇతర భవనాలను కూడా ఖాళీ చేయించారు. సామాజిక మాధ్యమాల్లో వైరల్ అయిన వీడియోలో భవనం లోపల ఉన్న భారీ ఉక్కు సపోర్ట్ బీమ్ స్పష్టంగా వంగిపోయిన దృశ్యాలు కనిపించాయి. నిర్మాణానికి ప్రధాన ఆధారంగా ఉండే ఈ బీమ్‌లు బరువును సమతుల్యంగా మోయడానికి ఉపయోగపడతాయి. అలాంటి నిర్మాణ భాగాలు వంగిపోవడం భవనం స్థిరత్వంపై తీవ్ర ప్రభావం చూపే అవకాశముందని నిర్మాణ నిపుణులు పేర్కొంటున్నారు.

ఘటన సమయంలో భవనం నుంచి ఇటుకలు కింద పడుతున్నట్లు సమాచారం అందడంతో అగ్నిమాపక శాఖ, పోలీసులు, అత్యవసర సేవల సిబ్బంది వెంటనే సంఘటనా స్థలానికి చేరుకున్నారు. పరిస్థితిని అంచనా వేసిన అధికారులు నిర్మాణం పూర్తిగా సురక్షితంగా లేదని భావించి పరిసర ప్రాంతాలను కూడా భద్రతా వలయంలోకి తీసుకున్నారు. ఎలాంటి ప్రాణనష్టం జరగకుండా ముందస్తు చర్యలు చేపట్టడం వల్ల పెద్ద ప్రమాదం తప్పిందని అధికారులు తెలిపారు.