చమురు ధరల సెగ.. ద్రవ్యోల్బణం భయాలతో ప్రపంచ బాండ్ల పతనం

మధ్యప్రాచ్యంలో మళ్లీ తీవ్రతరమైన సైనిక ఘర్షణలు, చమురు ధరల పెరుగుదల ప్రపంచ ఆర్థిక మార్కెట్లను కుదిపేస్తున్నాయి. ఇంధన ధరలు పెరగడంతో ద్రవ్యోల్బణం మళ్లీ వేగం పుంజుకునే అవకాశం ఉందన్న ఆందోళన పెట్టుబడిదారుల్లో పెరిగింది. దీంతో ప్రపంచవ్యాప్తంగా ప్రభుత్వ బాండ్లపై అమ్మకాల ఒత్తిడి మరింత తీవ్రమైంది. బాండ్ల ధరలు పడిపోవడంతో వాటి రాబడి శాతాలు గణనీయంగా పెరిగాయి. జపాన్‌, అమెరికా, జర్మనీ, ఫ్రాన్స్‌, ఆస్ట్రేలియా సహా ప్రధాన ఆర్థిక వ్యవస్థల్లో దీర్ఘకాలిక ప్రభుత్వ రుణాల రాబడులు బహుళ సంవత్సరాల గరిష్ఠ స్థాయులకు చేరుకున్నాయి. ఈ పరిణామాల్లో అత్యంత ముఖ్యమైనది జపాన్‌ పదేళ్ల ప్రభుత్వ బాండ్‌ రాబడి మూడు శాతానికి చేరుకోవడం. సెప్టెంబర్‌ ఒకటిన జపాన్‌ పదేళ్ల బెంచ్‌మార్క్‌ బాండ్‌ రాబడి మూడు శాతాన్ని తాకింది. ఇది 1996 తర్వాత నమోదైన అత్యధిక స్థాయి. దశాబ్దాలుగా అత్యల్ప వడ్డీ రేట్లకు, భారీ స్థాయిలో ప్రభుత్వ బాండ్ల కొనుగోళ్లకు ప్రసిద్ధి చెందిన జపాన్‌ రుణ మార్కెట్లో ఈ స్థాయి రాబడి రావడం పెద్ద మార్పుగా భావిస్తున్నారు. 

బాండ్‌ రాబడులు పెరగడం అంటే సాధారణంగా బాండ్‌ ధరలు పడిపోతున్నాయని అర్థం. పాత బాండ్లపై నిర్ణయించిన వడ్డీ రేట్లు కొత్తగా అందుబాటులోకి వచ్చే అధిక రాబడులతో పోలిస్తే ఆకర్షణ తగ్గినప్పుడు వాటి మార్కెట్‌ ధర తగ్గుతుంది. ధరలు తగ్గడంతో బాండ్‌ రాబడి పెరుగుతుంది. ప్రస్తుతం ప్రపంచ మార్కెట్లలో ఇదే ధోరణి కనిపిస్తోంది. పెట్టుబడిదారులు భవిష్యత్తులో వడ్డీ రేట్లు మరింత పెరిగే అవకాశం ఉందని అంచనా వేయడంతో దీర్ఘకాలిక బాండ్లను విక్రయిస్తున్నారు. 

అమెరికా పదేళ్ల ప్రభుత్వ బాండ్‌ రాబడి కూడా గణనీయంగా పెరిగింది. ఇది 4.75 శాతం స్థాయిని దాటి 4.78 శాతానికి చేరుకుంది. 2025 ప్రారంభం తర్వాత ఇది అత్యధిక స్థాయి. అమెరికా పదేళ్ల బాండ్‌ను ప్రపంచ ఆర్థిక మార్కెట్లలో అత్యంత ముఖ్యమైన బెంచ్‌మార్క్‌గా పరిగణిస్తారు. దాని రాబడిలో మార్పులు ఇతర దేశాల రుణ మార్కెట్లు, కార్పొరేట్‌ రుణాలు, గృహ రుణాలు మరియు అనేక రకాల ఆస్తుల విలువలపై ప్రభావం చూపుతాయి. 

యూరప్‌లో కూడా పరిస్థితి ఆందోళనకరంగా మారింది. ఫ్రాన్స్‌, జర్మనీ ప్రభుత్వ బాండ్ల రాబడులు అనేక సంవత్సరాల గరిష్ఠ స్థాయులకు చేరుకున్నాయి. జర్మనీ పదేళ్ల బాండ్‌ రాబడి 2011 తర్వాత అత్యధిక స్థాయికి చేరినట్లు తాజా మార్కెట్‌ సమాచారం వెల్లడించింది. యూరోపియన్‌ మార్కెట్లలో పెట్టుబడిదారులు అధిక ద్రవ్యోల్బణం నేపథ్యంలో కేంద్ర బ్యాంకులు వడ్డీ రేట్లను మరింత పెంచే అవకాశాలను అంచనా వేస్తున్నారు.