Actress: నిర్మాతతో పడుకోవాలన్నారు.. హీరోయిన్ సంచలన వ్యాఖ్యలు

నటి అంకితా లోఖండే తన కెరీర్ ప్రారంభంలో ఎదుర్కొన్న క్యాస్టింగ్ కౌచ్ అనుభవాన్ని వెల్లడించారు. నిర్మాతతో పడుకోవాలని చెప్పారని సంచలన వ్యాఖ్యలు చేశారు. -‘సినిమా ఛాన్స్ కావాలంటే నిర్మాతతో పడుకోవాలన్నారు’.. సంచలన విషయాలు బయట పెట్టిన సీరియల్ హీరోయిన్** బాలీవుడ్ నటి అంకితా లోఖండే తాజాగా చేసిన వ్యాఖ్యలు సినీ వర్గాల్లో చర్చనీయాంశంగా మారాయి. కెరీర్ ప్రారంభ రోజుల్లో తాను ఎదుర్కొన్న క్యాస్టింగ్ కౌచ్ అనుభవాన్ని ఆమె ఒక ప్రముఖ పాడ్‌కాస్ట్‌లో బహిరంగంగా వెల్లడించారు. సినిమా అవకాశం కోసం తన ఆత్మగౌరవాన్ని తాకట్టు పెట్టలేదని, అలాంటి ఆఫర్‌ను నేరుగా తిరస్కరించి బయటకు వచ్చానని అంకిత చెప్పిన మాటలు ఇప్పుడు సోషల్ మీడియాలో వైరల్ అవుతున్నాయి. అంకితా లోఖండే 'పవిత్ర రిష్తా' సీరియల్‌తో దేశవ్యాప్తంగా గుర్తింపు తెచ్చుకున్నారు. అనంతరం టెలివిజన్‌తో పాటు పలు సినిమాలు, రియాలిటీ షోలలోనూ కనిపించారు. ప్రస్తుతం వ్యాపారవేత్త వివేక్ జైన్‌ను వివాహం చేసుకుని వ్యక్తిగత జీవితాన్ని కొనసాగిస్తున్న ఆమె, తరచూ ఇంటర్వ్యూలు, పాడ్‌కాస్ట్‌లలో పాల్గొంటూ తన జీవితంలోని అనుభవాలను పంచుకుంటున్నారు. ఈ సందర్భంగా మాట్లాడుతూ.. తనకు కేవలం 19 ఏళ్ల వయసు ఉన్నప్పుడు ముంబైలో ఓ దక్షిణాది సినిమా కోసం ఆడిషన్ ఇచ్చానని చెప్పారు. హీరోయిన్‌గా ఎదగాలనే కలతో ఎంతో ఉత్సాహంగా వెళ్లిన తనకు అక్కడ ఎదురైన అనుభవం జీవితాంతం మర్చిపోలేనిదిగా మిగిలిపోయిందన్నారు. ఆడిషన్ అనంతరం తనతో మాట్లాడిన వ్యక్తి "ఈ సినిమా చేయాలంటే నువ్వు రాజీ పడాలి" అని చెప్పాడని అంకిత వెల్లడించారు. అతను ఏం సూచిస్తున్నాడో తనకు అప్పుడే అర్థమైందని, అయినప్పటికీ అతని నోటి నుంచే స్పష్టంగా వినాలనే ఉద్దేశంతో తాను ఏమీ తెలియనట్లు మాట్లాడానని తెలిపారు. "నేను బాగా నటిస్తాను, అందరితో స్నేహంగా ఉంటాను" అని చెప్పినా, చివరకు అతను "నిర్మాతతో పడుకోవాలి" అని నేరుగా చెప్పాడని ఆమె గుర్తు చేసుకున్నారు. అయితే ఆ మాటలు విన్న వెంటనే తాను ఏమాత్రం భయపడలేదని అంకిత తెలిపారు. "నేను సినిమా అవకాశం కోసం ఎవరితోనూ రాజీ పడను. టాలెంట్‌ను నమ్ముకొని ఇండస్ట్రీకి వచ్చాను. అలాంటి అవకాశాలు నాకు అవసరం లేదు" అని అతని ముఖం మీదే చెప్పానని వెల్లడించారు. ఆ తర్వాత పరిస్థితిని చక్కదిద్దే ప్రయత్నంలో ఆ వ్యక్తి "మీరు అలా అనుకోవద్దు.. మీకు సినిమా అవకాశం ఇస్తాను" అని చెప్పినా, అప్పటికే తాను నిర్ణయం తీసుకున్నానని అంకిత తెలిపారు. "మీరు అవకాశం ఇచ్చినా నేను ఆ సినిమా చేయను. నాకు అలాంటి అవకాశం అవసరం లేదు" అని చెప్పి అక్కడి నుంచి వెళ్లిపోయానని వివరించారు. సినీ పరిశ్రమలో ప్రతిభకు అవకాశాలు రావాలని, ఎవరికీ ఇలాంటి పరిస్థితులు ఎదురుకాకూడదని అంకిత అభిప్రాయపడ్డారు. ముఖ్యంగా కొత్తగా ఇండస్ట్రీలోకి వచ్చే అమ్మాయిలు ధైర్యంగా ఉండాలని, తమ ఆత్మగౌరవాన్ని ఎప్పుడూ కోల్పోవద్దని ఆమె సూచించారు. అంకిత చేసిన ఈ వ్యాఖ్యలు ప్రస్తుతం సోషల్ మీడియాలో విస్తృతంగా చర్చకు దారితీశాయి. కొందరు ఆమె ధైర్యాన్ని ప్రశంసిస్తుండగా, మరికొందరు క్యాస్టింగ్ కౌచ్ వంటి సమస్యలు ఇంకా పూర్తిగా అంతరించిపోలేదని అభిప్రాయపడుతున్నారు. గతంలో కూడా పలువురు నటీమణులు ఇలాంటి అనుభవాలను పంచుకున్నప్పటికీ, అంకితా లోఖండే తన కెరీర్ ప్రారంభంలో ఎదుర్కొన్న ఘటనను మరోసారి గుర్తు చేస్తూ సినీ పరిశ్రమలో మహిళల భద్రత, గౌరవంపై చర్చను ముందుకు తీసుకొచ్చారు.