బీసీలకు 34% రిజర్వేషన్లపై చంద్రబాబుకు వెంకటేష్ ధన్యవాదాలు

బీసీలకు స్థానిక సంస్థల ఎన్నికల్లో 34 శాతం రిజర్వేషన్లు కల్పించేందుకు కూటమి ప్రభుత్వం తీసుకున్న నిర్ణయంపై గుంటూరుకు చెందిన తాళ్ల వెంకటేష్ యాదవ్ హర్షం వ్యక్తం చేశారు. ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్, బీజేపీ నాయకత్వం, కూటమి ప్రభుత్వానికి బీసీల తరఫున ప్రత్యేక ధన్యవాదాలు తెలిపారు. ఈ నిర్ణయం బీసీల రాజకీయ సాధికారతకు చారిత్రాత్మక అడుగుగా అభివర్ణిస్తూ చంద్రబాబు చిత్రపటానికి పాలాభిషేకం నిర్వహించారు.

తెలుగుదేశం పార్టీ ఆవిర్భావం నుంచే బడుగు, బలహీన వర్గాలకు రాజకీయ ప్రాధాన్యత కల్పిస్తోందని తాళ్ల వెంకటేష్ యాదవ్ తెలిపారు. ఎన్టీ రామారావు ముఖ్యమంత్రిగా ఉన్న సమయంలో స్థానిక సంస్థల్లో బీసీలకు 20 శాతం రిజర్వేషన్లు కల్పించారని, అనంతరం చంద్రబాబు నాయుడు నాయకత్వంలో వాటిని 34 శాతానికి పెంచిన ఘనత తెలుగుదేశం పార్టీకి దక్కుతుందని పేర్కొన్నారు. బీసీల రాజకీయ ఎదుగుదలకు ఈ నిర్ణయాలు ఎంతో ఉపయోగపడ్డాయని అన్నారు.

అయితే గత వైఎస్సార్ కాంగ్రెస్ పార్టీ ప్రభుత్వం బీసీలకు ఉన్న 34 శాతం రిజర్వేషన్లను 24 శాతానికి తగ్గించిందని వెంకటేష్ యాదవ్ ఆరోపించారు. దీనివల్ల రాష్ట్రవ్యాప్తంగా సుమారు 16,800 మంది బీసీల రాజకీయ ప్రాతినిధ్యానికి నష్టం జరిగిందని ఆయన పేర్కొన్నారు. ప్రస్తుత కూటమి ప్రభుత్వం ఎన్నికల సమయంలో ఇచ్చిన హామీ మేరకు తిరిగి 34 శాతం రిజర్వేషన్లు కల్పించేందుకు చర్యలు తీసుకోవడం బీసీలకు న్యాయం చేయడమేనని అన్నారు.

రాబోయే స్థానిక సంస్థల ఎన్నికల్లో గ్రామీణ ప్రాంతాల్లోని ఎంపీటీసీ, జెడ్పీటీసీ, గ్రామపంచాయతీ ఎన్నికల్లో బీసీలకు 34 శాతం రిజర్వేషన్లు కల్పించాలని ప్రభుత్వం నిర్ణయించడం అభినందనీయమని తెలిపారు. పట్టణ ప్రాంతాల్లోని మున్సిపాలిటీలు, నగరపాలక సంస్థల్లో కూడా బీసీలకు 33.33 శాతం ప్రాతినిధ్యం కల్పించేందుకు ప్రభుత్వం తీసుకున్న నిర్ణయం సామాజిక, రాజకీయ సమానత్వానికి దోహదపడుతుందని అన్నారు.

చంద్రబాబు నాయుడు నాయకత్వంలోని కూటమి ప్రభుత్వం బీసీల సంక్షేమం, అభివృద్ధి, రాజకీయ సాధికారతకు ప్రాధాన్యం ఇస్తోందని వెంకటేష్ యాదవ్ పేర్కొన్నారు. నారా లోకేష్ యువగళం పాదయాత్ర సమయంలో బీసీలు ఎదుర్కొంటున్న సమస్యలను తెలుసుకున్నారని, అధికారంలోకి వచ్చిన తర్వాత వారి సంక్షేమానికి అనేక చర్యలు తీసుకుంటున్నారని తెలిపారు. వడ్డెరలు, మత్స్యకారులు, చేనేత కార్మికులు తదితర వర్గాలకు ప్రభుత్వం కల్పిస్తున్న ప్రయోజనాలను ఆయన ప్రస్తావించారు.

వడ్డెరలకు మైనింగ్ రంగంలో 33 శాతం రిజర్వేషన్ కల్పించడం, మత్స్యకారులకు ఆర్థిక సహాయం అందించడం, చేనేత కార్మికులకు ఉచిత విద్యుత్ సదుపాయాలు కల్పించడం వంటి చర్యలు బీసీల సంక్షేమంపై ప్రభుత్వానికి ఉన్న శ్రద్ధను చూపుతున్నాయని అన్నారు. బడుగు, బలహీన వర్గాలకు ఆర్థికంగా, సామాజికంగా, రాజకీయంగా అండగా నిలవాలన్న లక్ష్యంతో ప్రభుత్వం పనిచేస్తోందని తెలిపారు.

చట్టసభల్లో వెనుకబడిన వర్గాలకు ప్రాతినిధ్యం కల్పించే విషయంలో కూడా తెలుగుదేశం పార్టీ ప్రత్యేక శ్రద్ధ చూపుతోందని వెంకటేష్ యాదవ్ అన్నారు. సాధారణ కుటుంబాల నుంచి వచ్చిన బీసీ నాయకులకు రాజకీయంగా ఎదిగే అవకాశాలు కల్పిస్తున్నారని పేర్కొన్నారు. పార్టీ కోసం పనిచేసిన వారికి తగిన గుర్తింపు ఇవ్వడం ద్వారా నాయకత్వాన్ని ప్రోత్సహిస్తున్నారని తెలిపారు.

బీసీలకు 34 శాతం రిజర్వేషన్ల నిర్ణయం కేవలం ఒక ప్రభుత్వ నిర్ణయం కాదని, బీసీల రాజకీయ సాధికారతకు బలమైన పునాది అని వెంకటేష్ యాదవ్ అన్నారు. భవిష్యత్తులో కూడా బడుగు, బలహీన వర్గాలకు మరిన్ని అవకాశాలు కల్పించాలని కోరారు. చంద్రబాబు నాయుడు, నారా లోకేష్ నాయకత్వంలో కూటమి ప్రభుత్వం బీసీలకు అండగా నిలుస్తుందని ఆశాభావం వ్యక్తం చేశారు.

ఈ కార్యక్రమంలో తెలుగుదేశం పార్టీ రాష్ట్ర కార్యదర్శి నందిరామ, నియోజకవర్గ పరిశీలకులు బద్రి, డివిజన్ అధ్యక్షులు లక్ష్మయ్య, సంపత్, మాజీ కార్పొరేటర్ ఎలుక వీరాంజలి, గుంటూరు జిల్లా బీసీ తెలుగుదేశం పార్టీ అధ్యక్షుడు వేములకొండ శ్రీనివాస్ గౌడ్, కార్పొరేషన్ రాష్ట్ర కమిటీ సభ్యురాలు న్యాయవాది శైలజ రజక, గుంటూరు సంయుక్త కార్యదర్శి మధు సంజయ్ రజక, కార్పొరేషన్ డైరెక్టర్ రాజకొండ గట్టు శ్రీనివాస్ తదితరులు పాల్గొన్నారు.